ڕۆژ بەری گوپیتکا چیای، ئەنیا مە ماچی دکەت

2 رۆژ پێش ئێستا

عبدالعزیز ألکی
ڕوستەم وەکو بنە بیهەکا دئاڤێدا هەموو گیانێ وی دلەرزی، ژبێ خەوییێ چاڤێن وی وەکو پەلە عەورێن ئێڤارییا ل بەر ڕویێ ڕوژێ ل دەمێ ئاڤابوونێ سور ببوون، دڵوپێن خوهێ وەکو دڵوپێن زڤستانێ ژ بانێ ماڵا هەژارەکی بباریت، وەسا دناڤ پرچ و  رهـێن وی دهاتنە خوارێ و خۆ بەرددانە سەر دەستکێ مەڕبێلێ. دەستکێ مەڕبێلێژی مینا سەیەکێ هار و برسی و کێڤریشکەك ب دەستی کەتبیت، وەسا ناڤ دەستێن مە کەڵاشت بوو، نیڤا دەستێن مە ببو بێدەرا پەقێن زەر و برینێت سور. پشتی دەمژمێرەکێ ژ کارکرنێ  ڕوژەکا گەرم و سوتێنەر دەشتا ناڤکوڕێ ڕوهن کر، خوین د دەمارێن مەدا دکەلی، هەلم ژ عەردێ رپساندی و شێدار بلند بوو، ڕوستەم ب نانێ تڤەنگێ مەزن ببوو،  لەوڕا هێشتا زوی ژ دەست و پییا کەفت، بسەرێن هچکا خوها ئەنیا خو هشك کر و جگارەکا ناپولی ژ بەریکا خو ئینادەر و ڕوینشتە نیڤا ڕێزێن باجانکا،  بەستەزمانێ هەژار یاری ب برینێن نیڤا دەستێ خو دکر و دگەل هندێ هاتە زمان و گوت:

ــ برا ماژڤێ دوزەخێ دژوار تر هەیە..؟! بۆ پاریا ژیانێ، بەری مریشکا ئەم دکلێسێ خوڤە لیس دبین و بەری دیکل بانگ دەت ئەم ژخەوێ ڕادبین، دەمێ ڕوژ چاڤێن خۆ د پەرخینیت بەری کوپیتکا چیای ڕون کەت، ئەنیا مە ماچی دکەت...!!

ــ کوڕێ بابوی ڕوژا نازدارییا ئاڤا بوو، نیڤا دەستێ تە زەڤی و پرێزەکا بەرهەمدارە، بلا دلێ تە بتە نەسوژیت، ئەو پەق و برینێن تێدا توڤێ گوڵ و نێرگزایە کاتە دای..!!، پێدڤییە ژ ئەڤڕو پێڤە لژێر یاسایێ "هەتا نیڤا دەستی ڕەش نەبیت تاما دەڤی خوش نابیت" بژین، دزانم تویێ ب نانێ تڤەنگێ مەزن بوی و ئەڤ کارە بوتە ب زەحمەتە، لێ ببورینا دەمی دێ وەکو مە فێری ژیانا "مێری"ا بی...!! ئێدی وەرزەڬ دێ هەبیت و وەرزەك نابیت، ئێدی  ل وەرزێ هەبونێ هەمی سەحارا و بەری کوپیتکا چیا ودەشتا پان دێ ڕوژ ئەنیا تە لەق دەت و دەستکێ مەڕبێلێ تژی دەستێ تە دەق کەت، دا ل وەرزێ نەبونێ ئاغایێ دیوانا خو بی...!