قۆناغا ئێکێ و زانکۆ

1 مانگ پێش ئێستا

مەدینا محەمەد ئەحمەد
ل دەستپێکێ پیرۆزباهییا وان دکەم و داخوازا سەرکەڤتنێ بۆ وان دکەم.
       زانکۆ: ئەو جهە یێ پشتی ب دویماهی هینانا قوتابخانێ, قوتابی لێ دخوینن.
زانکۆ ژ چەند کۆلیژان پێکدهێت و هەر کۆلیژەک ژ چەند پشکان پێکدهێت. پترییا پشکان خواندنا وان (4) سالن. زانکۆ جودایە ژ قوتابخانێ, ل قوتابخانێ مامۆستا هەمی تشتان بۆ ته شڕۆڤە دکەت, ل زانکۆیێ بەس دێ مامۆستا هندەک ڕێکان و مەلزەمان دت تە و داخوازا ڕاپۆرت و سمیناران ژ تە کەت. تو وەک قوتابی پێدڤییە دویڤچوونێ بۆ بکەی چ ل پەرتووکخانێ بیت یان ل جهەک دی. چەند ڕۆژەک یێن هەی د ناڤبەرا وی دەمێ ناڤ هاتین ڕاگەهاندن و دەستپێکرنا دەوامێ, د وان ڕۆژاندا بزاڤێ بکە هندەک پێزانین گشتی دەربارەی پشکا خوە بزانی.
دەمێ تو دچی زانکۆیێ وەک کەسەک خەریب تەماشەی دەوروبەرێن خوە نەکە. دەستپێکێ هەڕە سەرەدانا سەرۆکاتییا پشکا خوە بکە, خشتێ ڕۆژانە یێ وانێن خوە وەربگرە و بزانە هۆلا تە یا خواندنێ کیژکە. د هۆلا خواندنێڤە کورسیکەکێ (مەقعەدەکێ) ل سەر ناڤێ خوە حجز نەکە, چونکی نه قوتابخانەیە. دروستە هەر وانەکێ تو ل جهەکێ بی. ڕێزی ل مامۆستا و دکتۆرێن خوە بگرە, جوانترە تو ل دویڤ باوەرناما وان گازی وان بکەی (ماستەر هەبیت ب "مامۆستا" گازی بکە, دکتۆرا هەبیت ب پەیڤا "دکتۆر" گازی بکە) و ل کیڤە ببینی سلاڤی وان بکە.

 بلا هەردەم تێنڤیس (دەفتەر, سجلە)، لگەل تە بیت دەمێ دکتۆر تشتێن گرنگ دەربارەی بابەتی دبێژیت بنڤیسە. نەهێلە خواندنا ته بکەڤیت سەر ئێک بۆ شەڤا بەری ئەزموونێ. خوە ژ کڕینا ڕاپۆرت و ڤەکۆلێنان دویر بئێخە تو ب خوە چێکە بۆ تە باشتر و سەرفەرازترە. ئەو دەمژمێرێن ڤالا ب دەرفەت نەبینە بۆ پیاسان, هەڕە پەرتووکخانێ پەرتووکەکێ ل سەر بیاڤێ خوە بخوینە یان ل گەل کۆمەک هەڤالا دانوستاندنێ ل سەر بابەتەکی بکەن.
باش بزانە تو چ لگەل خوە نابی زانکۆیێ و کەس چ تشتی گەل تە نابینیت ژبلی پەروەردەیا دایکوبابێن تە. هشیاری ناڤێ وان و کەرامەتا خوە بە. ڕەفتارەکا وەسا نەکە کو تو نەشێن هەر چار سالان سەرێ خوە بلند بکەی. چونکی زانکۆ بلندترین جهێ زانست و مەعریفێیە و ئاڤاکرنا کەسایەتییا تەیە, ناڤێ خوە و یێ زانکۆیێ نەشکێنە.
نۆرمالە تە گەلەک هەڤال نەبن (هندی کێم تێکەلی بی دێ ئارامتر بی) و بزانە دێ هەڤالینییا کی کەی, د زانکۆیێدا خەلک دێ تە ب هەڤالا/ـێ تە, تە ناس کەن. ئەگەر تو کچ بی بلا پڕانییا هەڤالێن تە کچ بن و ئەگەر تو کوڕ بی بلا پڕانییا هەڤالێن تە کوڕ بن. بۆچییە تو لگەل ڕەگەزێ بەرامبەر بی ئەگەر تە چ کارێن گرنگ نەبن؟ (زانکۆ + عەشق = ❎)، لگەل هندێ ژی گۆشەگیر و ناڤچاڤ گرێ ژی نەبە. ل دەمێ تو دچی هۆلا خواندنێڤە یان هەڤالێن گرۆپی ببینی ب جوانترین شێوە سلاڤ بکە.
گەلەک گەلەک نۆرماله تو حەفتییێ هەمییێ ب دەستەک یان دوویێن جلکان بچی. بارێ خێزانا خوە گران نەکە. چونکی تو دچی بۆ خواندنێ نەکو  نمایشکرنا جلوبەرگ, پێلاڤ, دەمژمێر, چانتە, مۆبایل ... بۆ کوڕان ژی جاددەیێن زانکۆیێ نە جهێ فەخفەخا ترومبێلان و بلندکرنا دەنگێ سترانەنە, ب ڤێ ڕەفتارێ تنێ تو د چاڤێ قوتابییاندا کێم دبی.
دەمێ تو ژ زانکۆیێ دەربچی بلا کەسایەتییا تە تەمام بهێتە گوهۆڕین (ئاڤا ببی و ببی کەسەک تێگەهشتی).