سوحبه‌تا زێره‌ڤانێ بڤه!!

19/11/2022

د. عبدالباقي مایی   
وه‌كی هه‌رجار ئه‌ز به‌ری چه‌ند رۆژه‌كا چوومه‌ مه‌له‌ڤانگه‌هه‌كێ ل باژێرێ دهوكێ. به‌ری بچم ناڤ بركا مه‌له‌ڤانیا، من وه‌كی هه‌می جاران پشتی دووشكرنێ ده‌ستپێكێ قه‌ستا قولته‌ینكێن په‌قشكان كر. من دیت گه‌نجه‌كێ ١٦-١٧ سالی یێ خوه‌ دئێكێ ژ هه‌ردوو قولته‌ینكاندا دگه‌ڤزینیت. من كه‌یف پێهات و ده‌ستخوشی لێكر. كورك ما به‌هتی و راوه‌ستا ئێدی چ بزاڤ نه‌كر. من هزر كر دیاره‌ ئه‌و ژمن ترسا ئێدی من ده‌ست ب دان و ستاندنا سوحبه‌تێ كر. من پسیار ژێكر: - ئاڤا گه‌رمه‌؟ وی ب سه‌رهه‌ژاندنێ به‌رسڤا من ب نه‌رینی دا. ژ به‌ر دا ره‌وشا وی یا ده‌رونی پتر تێكنه‌ده‌م من قه‌ستا قولته‌ینكا دی كر ژ ره‌خ ویڤه‌. به‌ری روینم من دیت زه‌لامه‌ك هاته‌ نك وی گه‌نجی ئو نمنمه‌كا نزم دگه‌ل ئاخفت. بێی ئه‌ز بزانم كا چ گوتێ، ئه‌ز ژ له‌زا وی گه‌نجی تێگه‌هه‌شتم كو ئه‌ڤه‌ سه‌میانێ وی بۆ ئه‌مر لێ كر، رابیت بچیت ناڤ بركا مه‌له‌ڤانیا. ئه‌و زه‌لام چوو دناڤ وێ بركێدا روینشت ئو ته‌ماشه‌ی من كر. هه‌روه‌كی دڤێت تشته‌كی بێژیت. بۆ په‌یداكرنا بسته‌هیێ من ژی دگه‌ل بشكورینه‌كێ پسیار ژێ كر: ئه‌و قولته‌ین یا گه‌رمه‌؟ زه‌لامی ب ده‌نگه‌كێ عه‌سكه‌ركانی و ره‌حه‌ت به‌رسڤا مندا: - به‌لێ یا گه‌رمه‌. بوچی ما یا ته‌ یا چاوایه‌؟ من ژی به‌رسڤا ویدا: - نه‌خێر ئه‌ڤه‌ پیچه‌ك یا ساره‌. زه‌لامی گوته‌ من: حه‌زكه‌ی وه‌ره‌ ڤێرێ ما نێ جهێ مه‌ هه‌ردووكا یێ هه‌ی. من ژی سوپاسیا وی كر ئو ئه‌ز چوم ل قولته‌ینكا وی به‌رامبه‌ری وی روینشتم. ئینا زه‌لامی به‌رده‌وامی دا سوحبه‌تا مه‌ ئو گوت: - ڤی زه‌مانی مروڤی بسته‌هی ب كه‌سێ نینه‌. من ژی ب ترانه‌ڤه‌ گوت: - بوچی برا؟ ما چ قه‌ومیه‌؟ ئینا زه‌لامی گوته‌ من: ساخ بی چ نه‌ قه‌ومیه‌، به‌لێ هه‌ما ئه‌ڤ زه‌مانه‌ جهێ باوه‌ریێ نینه‌. خودێ د قورئانا پیروزدا دبێژیت…..، ئو پاشی گوت: روژه‌كێ پێغمبه‌رێ خودێ سلاڤێن خودێ ل سه‌ر بن گوت…. ئینا من ژی ئاخفتنا وی بری و گوتێ: دیاره‌ ته‌ گه‌له‌ك پێزانین یێن هه‌ین ئان گه‌له‌ك یێ د دلێ ته‌دا ته‌‌ دڤێت ده‌رێژ ب كه‌ی. گوته‌ من: راسته،‌ هه‌ر چه‌نده‌ من چ خاندن نه‌ كریه‌ به‌لێ ژ مه‌جبوری من یا خوه‌ فێری خاندن و نڤێسینێ كری ئو من دكانه‌كا ئامویرێن كه‌هره‌بێ یا ڤه‌كری. گه‌له‌ك خه‌لك دێ هێن تشتا ژ ده‌ف من به‌ن پاره‌ نینه‌ نرخێ وی بده‌ن. دێ بێژن دێ پاشی بۆ ته‌ ئینم. دێ چن ئو نا هێنه‌ڤه‌. دنیا یا هاتی گوهورین. كه‌س جهێ باوه‌ریێ نینه‌. من تشتێن خوه‌ ژ چینێ دئینان. نوكه‌ یا بو من دیاربوی ئه‌و هه‌می زه‌غەلن ئێدی من بریارا خوه‌ یا دای ژ یابانی بینم. من پسیار ژێ كر: تو بێژی بوچی هوسا دنیا بێ باوه‌ری مایه‌؟ گوته‌ من: هه‌ر به‌ره‌ك ل جهێ خوه‌ یێ ب بهایه‌.


ده‌ما ئه‌ز ژ قولته‌ینكێ ده‌ركه‌فتیم ئو من قه‌ستا بركا مه‌له‌ڤانیا كری. من دیت گه‌نجێ مه‌ یێ ل سه‌ر رێكا بركێ ل سه‌ر كورسیكه‌كێ روینشتیه‌. من پسیار ژێ كر: - ئه‌رێ بوچی ئه‌ڤ ده‌رازینكه‌ یا دێم بوی: زڤری ئو گوته‌ من: - ئه‌و دزانن. من گوتێ: ئه‌و كینه‌؟ ما تو ل ڤێرێ شول ناكه‌ی؟ به‌رسڤا من دا ئو گوت: - نه‌خێر . من گوتێ: - پا تو ل ڤێرێ روینشتی چ دكه‌ی؟ سه‌رێ خوه‌ چه‌ماند و گوت: ئه‌ز یێ دگه‌ل عه‌میدی (هێدی بده‌ستێ خوه‌ ئیشاره‌ت دا ژورا قولته‌ینكێن په‌قژكا). من گوتێ: ئاها؟! ئانكو تو زێره‌ڤانێ عه‌میدیی!!  پا تو بڤه‌ی ئه‌م نه‌وێرین دگه‌ل ته ‌ باخڤین!!. بشكورینه‌ك ل سه‌ر لێڤا دیار بو ئو به‌رێ خوه‌ ژ من گرت.