داھێنانێن سادی دپەیڤێن ھەلبەستێن سترانادا و دیتنەک..

روندك بامەرنی
چ جارا وان سترانا نەبێژە یێ بەیڤێن وان خەمۆکیێ و بێزاریێ بۆ تە و خەلکی پەیدادکەن، ئەگەر تۆ نەشێی برێکا سترانا خۆ پەیامەکا ئاڤاکەر بگەھینی کو پەیڤێن تۆ دھەلبژێری، چەند خەم تێدا بیت، ھوسا دوماھیکا وێ ژی ڕۆناھیەک ھەبیت ڕحا تە و مڕۆڤا بێ گەش بکەت وێ چالێنجێ نەکە!، چنکو موزیکە "زادێ ڕحێ" یە و زادێ ڕحێ دڤێت بھشیاری بھێتە سەخبێرکرن.
 وەک گوھدارێ سترانا ژی بھشیاری گوھداریا سترانا بکە، کانێ چەند خزمەتا رحا تە دکەت، تەشادبکەت و خەموکیێ و بێزاریێ ژ تە دیرکەت.
ڕۆژەکێ من پسیار ژ ھەلبەستڤانەکێ مەزن کر، بۆچی ھەلبەستێن سترانێ ھەر بخەموکی دنڤێسی، ما چاوایە ئەگەر دوماھیکا وێ پەیام ببیتە خۆشی و ھیڤی، تایبەت ھەلبەستێن دلداریێ؟
بەرسڤ دا و گۆت: "نێ ھەکە ھۆسا نەنڤێسین کارتێکرنێ ل ھەستێن گۆھدارا ناکەت و یا سەر کەفتی نابیت".
ل ڤێرێ بۆ من دیار بۆ ھەلبەستڤانێ ڤێ ھزڕێ بکەت، بجورەکێ "سادیەتێ" سەرەدەریێ دگەل ھەستێن گوھدارا دکەت، بێی گوھدار ھەست پێ بکەت.
 مڕۆڤ ھەمی گاڤا پێتڤی ب چارا و ھیڤی و ئۆمیدا ھەیە، جارەکادی دداکەتنێن خۆدا ڤەژیت و بھێز بکەڤیت، نەخاسمە پەیڤ دجادوگەرن و دشێن ھێزێ و لاوازیێ بدەن. دشێن برینا چارەکەن و برینا نویکەن و پتر کوورکەن.
ئەفلاتون دبێژیت: "ھەلبەستڤان گەلەک درەوا دکەن، داکو ژ خۆ ژ غڕۆڕا ئێشانا ڕاستیا داکەتنا خۆ ب پارێزن ھەلبەستا دڤەھینن"، لەوا ھەلبەستڤان نەکرنە دناڤ(الجمهورية الفاضلة) دا لێ من دیتنەک دیتر ھەیە. ڤەھاندنا ھەلبەستێ ھۆنەرەکێ گەلەک جوانە ئەگەر ھەلبەستڤان داھێنانێ وەسا بکەت ژ ڤەرێژا خەمێت خۆ و مڕۆڤایەتیێ بکەتە باخچێن ب گول گەلواز، مینا پەیڤێن ھەلبەستڤانێ مەزن ماموستا "محسن قۆچان"، ئەوێ ھەری پێژنێن خۆ بڕوناھیێ و نازکی دھەلبەستێ دا ھێلاین ژبۆ چارەسەرکرنا گرفتەو خەمێن مللەتی و دلدارا، کو ھەلبەستێن وی دەمێ دبنە ستران نیرھەکا ڤەشارتی ژێ دچیت رحێ ساخ دکەت، ھینگی پەیڤ و ئاواز و مۆزیکە و دەنگێ ستران بێژی دبیتە موزائیکەکا خۆش و تەڤاڤکری. ھەلبەستێن وی یێن بوینە ستران ڕێڤینگ، وەرە پەری، بارۆڤێن ئەشقێ..
گەلەک ھەلبەستڤان ھەنە لێ یێن سەرەنجا من کێشاین ھندەک نمونە ژ ھەلبەستێن وان دیتین، کو ئەنەرجیەکا پوزتیڤ ددەنە گۆھداری مینا ھەلبەستڤان و ماموستایێن ھێژا (عبدالعزیز سلیمان، غەریب قادڕ، محمد نێروەیی، ئەدیب چەلکی، ڕزگار کێستەیی، سلمان شێخ مەمی و عبدالرحمن حاجی... ھتد).