شاشییێن مرۆڤ ب زانابوون دکت، ناهێنە راستڤەکرن

نیشان بامەرنی
هێشتا ساڵا ١٩٩٧ێ بوو. ئەز رۆژەکێ یێ ل جڤاتەکا هەندەک کادرێن حزبی و پێشمەرگەیان ڕۆنشتی بووم، یەکی ژ وان گۆتە من؛ تو چاوان ئاڤەدانکرن و پێشکەفتنا دەولەتا مە یا کوردی دبینی! من ژی گۆتێ وەکی چ؟. ئینا گۆت هەما هەر ژ دەروازەیێ برەهیمخەلیلا و حەتا دگەهیتە هەولێرێ و ئەڤ قەسر و قوسیرێن هاتینە ئاڤاکرن؟!!
من ژی گۆتی ئەگەر تو پرسیارا من بکەی، راستە ئەڤ تشتە پێدڤینە بۆ مرۆڤی، لێ نە بۆ ئاڤاکرنا دەولەت و پێشخستان مرۆڤان. ئینا گۆتە من باشە پا ئەم دێ چاوان پێشکەڤین؟ من ژی گۆتێ؛ د سەری دا ئاڤاکرنا مەژیەکێ کوردی. ئینا گۆتی چاوان؟ من ژی گۆتێ؛ پەروەردەکاریەکا ئازاد ل دبستانان، دانانا مەڵایێن نەتەوەپەروەر ل مزگەفتان، ئاڤاکرنا هەمی بوارێن ئابۆری یێن گرێدایی کوردستانێ، بۆ نموونە چاندنێ، لەشکەرەکێ کوردستانی یێ یەکگرتی، دادوەریەکا راستەقینە، ئو یا ژ هەموویان گرنگتر سیستەمەک هەبت ئەڤان ب رێڤە ببت.
هەلبەت بوو گەنگەشە ل سەر ڤان پرسان و ئەم نەگەهشتینە چ ئەنجامێن ئەرێنی. ئینا یەکی ژ وان گۆتە من، دا ئەز بۆ برایێ خوە ببیژم. تە راستی بڤێت، هەمی تشت خەلەت یێ ب رێڤە دچن و ئەم دزانن. ئو ئەگەر ئەم ژی وەنەکەن بۆ مە ناقەتیێت، ڤێجار هەما بهێلە. من ژی گۆتێ سوپاس و مالا تە ئاڤا.

ب هەر حال، مەبەست ل ڤێرە یا دیارە. دەما مرۆڤ شاشیەکێ بکت بێی کو بزانت، چ دبت کەسەک ئالیکارییا مرۆڤی بکت و راستڤەبکت. لێ دەما مرۆڤ ب زانابوون شاشیان بکت، نەک سیھ ساڵ و سەد سال بچن، بەلکۆ چ جاران ئەو شاشی راست ڤە نابن. ئو ئەز د وێ باوەرێ دا مە، هەر کەسەک یێ زانا و نەزان ڤی تشتی دبینت و دزانت.
ئەڤجا ئەز هیڤیدارم ئەڤ کەسە ڤەگەرەکێ ل خوە بکن، ئەگەر نە، ئەڤ شاشیێن ب زانابوون تێنە کرن، نە بەس کەسانێن بێدەستهەڵات، بەلکۆ بەری هەر کەسەکی دەستهەڵاتدار ب خوە دێ ژ بن چن و دەولەتا کوردی ژو وەکە دوژمنێن مە دبێژن دێ بتە خەون.
لەوما ژی ئەڤە ئەرکێ مە هەموویانە، لێ ب تایبەت یێن وان کەسێن خوە بەرپرسیار دزانن. ئەز هیڤیدارم ئەم ڤێ یەکێ ژ بیر نەکن ئەگەر نە، ئەم دێ خوینا شەهیدێن خوە ب ئاڤێ فرۆشن و دێ دیرۆک نەعلەتان ل مە کت.
دوماهیێ من دڤێت بێژم، ئەز نە کەسەکێ رەشبینم و من باوەری ب مللەتێ خوە نینە. بەلکۆ هەر کەسەکێ شاشیان ب زانابوون بکت، ئەز جاەکا دن ژی دبیژم، ل خوە ڤەگەرت و رێزێ ل خوینا شەهید و مللەتی خوە بگرت. تەنێ راستی یا د وان دا.