سیاسەتا مژیلكرنا خەلكی

ردوان گولی
 ل دویڤ تیور و هزرا رەخنەگر و هزرڤانێ ئەمریكی (ئاڤرام نعوم تشومسكی(Avram Noam Chomsky)، ئەوی چەند رێك و شێواز سەخمەراتی كونترولكرنا خەلكی ژلایێ دەستهەلاتێڤە دەستنیشانكرینە (مژیلكرن، ئافراندنا گرفت و چارەسەركرن، هێدی هێدی، پاشئێخستن، ئاخفتنكرن دگەل گشت خەلكی هەر وەكی دگەل زارۆكەكی د ئاخڤی، بكارهینانا لایێ هەست و زوزان نەك هزركرن، هێلانا خەلكی دناڤ گەمژەیی و نە زانینێدا، هاندانا خەلكی ب گشتی هەتا رازی بن ب نە زانینا خوە، گوهارتنا تێگەهێ داخوازا مافان ب هەستكرنا گونەهكرنێ و سەرپێچیێ، نیاسینا خەلكی پتر ژ خەلكی ب خوە). ئەگەر بتنێ تەماشەی سیاسەتا مژیلكرنێ بكەین، دێ بینی هندەك كەسێن هیچ و پیچ ئینان سەر شانویێ، و هەمی دەرگەهێن گرتی بو ڤەكرن و كرن نموونە و چاڤلێكەر و پێشەوازی ب داهول و زرنا لێ هاتە كرن، و ل ئاهەنگێن سەر سال و هەلكەفتێن دیتر سەرێ سەر چەمكی یێ وانە! ئەڤە كینە و كێلویا وان ب چەندێ؟ ئەڤان چ چەپەرێن شەرێ دوژمنان ژناڤبرینە؟ بەرهەمێ ڤان توخمە مروڤان چیە دناڤ جڤاكیدا؟ بتنێ خەبەرگوتن و كارێن دویر ژ هەمی تیتال و دابونەریتێن جڤاكی، هەتا خەلك ئاریشە و گرفتێن خوە یێن سەرەكی مینا مووچە و گاز و غاز و ئاڤ و خواندن و پەروەردە وووو، ژبیربكەت و چاڤێن وان ل ڤان لێهبوكان بن.
ل سەردەمێ ئیمپراتورێ روما نیرونێ سەرداچوویی، پاپورێن پری و تژی زێر هاتن رەوانەكرن بۆ مسرێ، هەتا رەملێ بینن بو مەیدانا خوە لێكدانێ (كولیزیوم --- Colosseum) ئەو جهێ شەر دناڤبەرا  كویلاندا دهاتە دروستكرن، و شەر دناڤبەرا مروڤ و گیانەوەرێن درندەدا د هاتە ئەنجامدان. و هێشتا ئەڤ پاپورە دناڤ دەریاییدابوون، خەلكێ روما شورەشەك دژی دەستهەلاتدرێن خوە كرن، چونكە برسەكا مەزن بسەر خەلكیدا هاتبوو، و گەلەك ژ باژێری هاتە خرابكرن و تێكدان، و دەمێ پاپور گەهشتین مسرێ مەزنە ئەفسەرێ بەرپرس ژ كاروانی پرسیار ژ حاكمێ رومانی ل مسرێ كر كا چ پێدڤیە ئەو بكەت، ئەرێ بڤی زێری گەنمی بگرت و بزڤرت هەتا روما قورتالكەت یان ژی فەرمانا ئیمپراتور نیرونی جێبەجێ بكەت؟! حاكمێ مسرێ مەندەهوش بوو ژ پرسیارا وی، و گوتێ: هەلبەت دڤێت بزڤری دەڤ قەیسەری ب لەزترین دەم، و ب بهایێ ڤی زێری رەملێ لگەل خوە هەلگری. و تشتێ سەیر و سەرنج راكێش دەمێ زڤری و رەمل بری یارییان دەستپێكر و شورەشا خەلكێ هەژار  بدوماهیك هات!!
خەلك سەرقال و مژیلی یاریا بوو، ئێدی ژ كەیف و خوشیا ئەو شورەش و برس ژبیركرن!!. و هەتا ئەڤروكە ژی ئەڤ سیاسەتا مژیلكرنا خەلكی یا بەردەوامە ژلایێ دەستهەلاتدارێن بێ وژدانڤە هەمبەری گەل و مللەتێن غافل و نەفستی، مینا یاریێن تەپا پێ و سینەما و ئاهەنگێن سەرێ سالی ووو، و دبیت مەزنترین دەستكەفتێ ڤان جورە دەستهەلاتان ئەوبیت، كو خەلكێ خوە رازیكەن و قائیلكەن، كو دەربازبوونا تیما تەپا پێ بو قوناغا دوماهیكێ دەستكەفتەكێ ئێكجار مەزن بوو، بەلێ هەرفاندن و خەمساریكرنا سیستەمێ خواندنێ و تەندروستیێ و خزمەتكرن ووو، كارەكێ زور نورمال و سروشتیە .