ما ژیێ من یێ خواندنێ یە؟!!

داریان سعید
ل هەموو پارچەیێن ڤی روویێ ئەردی، خواندن ب گرنگترین رەوشەنبیریەت دهێتە زانین. ژبەر ڤێ یەكێ فەرە ئەم مێشكێن خۆ فیری هندێ بكەین كو خواندنێ چ ژیێن دەستنیشانكری نینن، و هەموو دەما فەرە یێ بەرهەڤ بی بۆ كوومڤەكرنا زانیارییان دمێشكێ خودا، ئەڤجا چ ئەڤ خواندنا یا فێرگەهێ و باوەرنامێ بیت یان ژی خواندنا پەرتووكێن دەرەكی بیت.
 ئەگەر بهێن و سەحكەینە وەلاتێن پێشكەڤتی دهەر بوارەكی دا دێ بو مە دیار بیت كو ستوینێ سەرەكێ یێ وان پالپشتییا خۆ پێ كری بۆ گەهشتنا وان دەستكەڤت و پێشكەڤتنا هەر خواندن بوویە، لەوما ئێدی دڤی سەردەمێ پێشكەڤتی دا دڤێت بومە یا خوویا بیت هەردەم دەمێ خواندنێ یە و چجاران درەنگ نینە، گەلەك جاران هەركەس ژمە بۆ پەیتكرنا ماسولكەیێن خو یان بدەستڤەئینانا ساخلەمییەكا باش یا لەشی قەستا هولێن وەرزشێ دكەین و راهێنانێن ماسولكەییان دكەن، ئەرێ هەوە چجار نە دایە هزرا خو ئەرێ مێشكێ مە ژی پێتڤی ب پەیتكرن و راهێنانا نینە!؟
چ پێنەڤیت هوون دێ بێژن بەلێ، ئەوما ل ڤێرە بوومە خویا بوو كو باشترین راهێنانێن مێشكی ئەو ژی خواندنە، ژبلی دەما تۆ دچییە دڤێ جیهانێ دا گەلەك دێ ئاشقی پەرتووكێ بی و چجار كەس نەشێت هەڤالینییا هەوە جودا كەت، و ژبۆ بدەستڤەئینانا ئەنجامێن باش لسەر تە پێتڤییە وەكو خشتەیەك یان پلانەك تە هەبیت یا رۆژانە یان حەفتییانە و ئەو پەرتوكێن تو د هەلبژێری د دەستنیشانكری بن، ل وی دەمی تو دێ پتر یێ پەهلەوان بی د وەرگرتنا زانیارییان دا، ئێدی بلا چەكێ من و تە ل شوونا تڤەنگ و كلاشینكوڤ بیت ئەم دێ چەكێ خو كەینە پەرتووك، و چجار درەنگ نینە بو خواندنێ و هەر دەم ژیێ تە یێ خواندنێ یە .