هێجەتێن بێ شەرمانە

سەردار هێتوتی
ژێرخانا ئابووری و ئاڤاکرنا وێ کارێ هەر کەس و مرۆڤەکی نینە، بۆ ڤێ مەبەستێ کەسێن ب باوەر و خۆدان ئەزموون و نەترس پێدڤینە، چونکی ل گشت وەڵاتان و تایبەت ل وەڵاتێن جیهانا سیێ کەسێن مافیا و بازرگانێن سیاسی و خۆدان هزرێن بەرتەنگێن دەڤەر و عەشیران د زاڵن ل سەر گشت سکتەران.
دگەل هاتنا ساڵا نوی یا زاینی، هندەک ب ناڤ بەرپرسێن گرێدایێ کەرتێن ئابووری د دیوانێن خۆ یێن گرتی باش قیراندبوو درەوا و دگۆت مە کارەکێ مەزنێ کری و د سەرێ سالێ دا ل دهۆکێ دێ موعجیزە رویدەن و دێ هند گەریدە و توریستڤان هێنە دهۆکێ جهێ وان ل ناڤا هوتێل و موتێل و گۆندێن گەشتوگۆزارێ ناکەن و دبیت نەچار ببین جهێن ئایینی بۆ وان ڤاڵا بکەین دا شەڤا خۆ ل وێرێ بورینن، لێ پشتی جەژنێن سەرساڵێ خڵاس بووی و دیتی گۆتن ئەو نینە یا وان ئینایە زمان ل هێجەتان گەریان و بێی شەرمانە وەڵاتێ قەترێ گونەهبارکر کو بویە مێهڤاندارا موندیالا ساڵا 2022 و خەلک ژ بەر وێ نەشیانە بهێنە دهۆکێ!.

دپرسم، ئەوا کو هەوە گۆتی هەمی راستی ژی بیت! لێ هەوە چ کریە بۆ دهۆکێ؟ ئایا ب توریزما ملی و چەند کەپرا و دوو سێ هوتێلێن بێ سەروبەر و خارنگەهێن کێم خزمەت، کیژ مرۆڤە دێ هێتە دهۆکێ ژ بلی عەرەبەکێ ناڤەراست و باشوور نەبیت و ئەو ژی بۆ دیتنا وەڵاتێ خۆ (ل گورەی هزرا وی) دهێتە شیمالی و نە ژ بۆ جانی و خزمەتا دهۆکێ.

لەوما هێڤی خازم د سەری دا ئەگەر هین بخازن دهۆک ببیتە ناڤەندەکا توریزمێ ل سەر ئاستێ کوردستانێ، ڤان بەرپرسێن بێ شیان لادەن و پلانا وەرارا دهۆکێ بێخنە کاری.