ئەم ل سەر ئاخا خوە غەریب و كرێچیینە؟!

ردوان گولی
 راستە وەلاتێ مە یێ تژی خێرەبێرە و زەنگینە ب هەمی سامان و كەرەستێن پری بها، بەلێ ژیانا هاوەلاتیێ ئاسایی نە هاتیە گهورین بەرەڤ باشتر، بەلكو بەروڤاژی یا خراپتر لێ هاتی، و حكومەتا مە یا هەمی سامانان دفروشت و ژ گایی گوهی نیشا خەلكی نادەت، پترولێ رەوانەی دەرڤە دكەت و بتنێ هاوەلاتی هەڤپشكێن دویكێلی و هەواینە، و پارە دچن سەر حسابا بەرپرسان ل بانكان.
 ل وەلاتێن خەلكی پترول یا بووی فاكتەرێ دابینكرنا پێداویستیێن ژیانێ، و بیابان یێن كرین جهێن دلڤەكەر و توریست ژ هەمی جیهانێ سەرەدانا وان دكەن، و ل دەڤ مە ل كوردستانێ پترول یا بووی نەفرەت و نەهامەتی بۆ خەلكێ هەژار، چونكە هەر وەكی كورد دبێژن رەزێ ل ملكێ ناڤ یێ منە و بەر یێ خەلكێ ! بەرپرسێن هیچ و پیچ دەرگەهێن كوردستانێ بو خەلكێ بیانی ڤەكرینە، و پارێزگەهێن كوردستانێ پری یانێن شەڤێ و قومارخانە و جهێن بێ رەوشتیێ كرینە ووو، و هەر تشتێ پارە پێڤە بێن بەرپرسێن هەرێمێ ئامادەنە بكەن، بلا مەترسی ژی بیت ل سەر جڤاكێ كوردی، كرینا خانی و پارچێن ئەردی ژلایێ عەرەبانڤە ل كوردستانێ، ئەز دبینم ئەڤە دێ بیت عەرەبكرنەكا سپی ل پاشەروژەكا نێزیك، راستە یاسا عێراقێ رێ ددەت هەر هاوەلاتیەكێ عێراقێ خانی و ئەردی ل كیڤە بكرت، بەلێ دڤێت خواندن و هزرەكا كویر ل سەر ڤێ ئێكێ بكەین.
تورەڤان و نڤیسكارێ تورك (عەزیز نیسین) كورتە چیروكەك دەربارەی خێزانەكێ ل مالەكا مەزن نڤیس بوو، هیچ تشتەك نەبوو ئاستەنگ ژورەكێ بكرێ بدەن، و پاشی ژورەكا دیتر، و ژورا سیێ ژی بكرێ دا، و بڤێ چەندێ گەلەك پارە كەتە دەستێ ئەندامێن خێزانێ، و ئەڤ پارە هاتن مەزاختن ل سەر وان كەل و پەلێن نە پێدڤی، بەلێ زور دەم پێڤە نەچوو كرێداران گازندە ژ كێماتیا ئاڤێ كرن، ئەڤ خێزانە رازی بوو هندەك پارا ژ وان دەینكەت هەتا هێلا ئاڤێ چێكەن، و پاشی پارە دەینكرن ژبو چاكرنا بوریێن ئاڤێ و سەرشویێ وو، و پاشی پارە دەینكرن بو چاكرنا رێكێن دهێنە مالێ و باغچەی، و چونكە ئەوان نە شیان پارێ وان بدەن و بزڤرینن، گەلەك خەلكێ غەریب هاتن و چەند ژورێن دیتر بكرێ گرتن، و پاشی رازی بوون ئەو كەسێن غەریب زالگەهیێ ل سەر باغچەی بكەن، و پاشی خانی هەمی بو وان هێلا و چوون سەربانی نڤستن، و هیچ چارەیەك نە دیت بتنێ خودانێن رەسەن یێن خانی ببن خزمەتكارێن غەریبان، و لڤێرێ كورێ هەرە مەزن كرە قێری ئەڤ خانیە نوكە نە یێ مەیە و ئەم یێن بووین كەسێن غەریب، بەلێ بابێ وی گەلەك تورە بوو دەمێ ئەڤ گوتنە بهیستی، و هەر بلەز چوو سندوقەكا نهێنی ڤەكر و كاغەزەكا كەڤن، دەرئێخست دوپات دكر ئەڤە خانیێ وانە وەكی میرات ژ باب و باپیران بو مایە.
عەزیز نیسین هاتە گرتن پشتی ئەڤ چیروكە بەلاڤەكری، و داواكارێ گشتیێ لەشكەری ئەوێ دادگەهیا وی دكر گوتێ: مەرەما تە ژ خانی د چیروكێدا نیشتیمانە، عەزیز نیسین گرنژی گرنژینەكا پری ترانە و گوت: مادەم هوین هندە زیرەك و تێگەهشتینە، هەوە بوچی دەرگەه و ژورێن وەلاتی بو غەریبان ڤەكرن، هەتا ئەم داگیركرین ب دەینا و ئەم بووینە غەریب، دسەرهندێرا مە گروڤە و سەنەد هەنە ئەم خودانین و ئەم كەیف خوشین؟!