گەمژێ ژ هەمیان بەخت سپیتر؟!

ردوان گولی
دژیانێدا هندەك جاران دەلیڤە و شانس بۆ هندەك كەسان پەیدابوونە، و ب پلەكێ چووینە سەرێ ملەكێ، دەرگەهێن رزقی بو هاتینە ڤەكرنو هیچ ئاستەنگ و ئاریشە نەكەفتینە رێكا وان. كێم جاران ئەڤ دەلیڤە دووبارە دبن، هەر وەكی ئەم دكوردەواریێدا دبێژین(خودێ هێلینا تەیرێ كورە چێ دكەت، كەو ب داری كەت، دوعا دەی بابانە، ئەگەر خودێ دا نا بێژیت تو كورێ كێی)، ئەز پشتەڤانیا چ كەسان ناكەم بێ پلان و نەخشە هیچ پروژەكێ بازرگانی ئەنجام بدەن، بەلێ ئەڤە هاتیە رویدان بەری چەند چەرخان و دیرووكێ ئەڤ سەرهاتیا هاوەلاتیێ ئەمریكی توماركریە.
ئەڤ ناسناڤە هاتیە گوتن دەربارەی هاوەلاتیێ ئەمریكی(تیموسی دیكستر ژدایكبوویێ 1747) و پشتی بوویە گەنج بریاردا كارێ بازرگانیێ بكەت، و هەردەم هزردكر ئەو بازرگانەكێ زیرەك و بلیمەتە و بازرگانێن راستەقینە یاری و ترانێن خوە پێدكرن ژبەر گەمژەیی و بێ ئاقلییا وی، جارەكا ئێك ژ بازرگانان  وەكی ترانە و پێكەنین گوتێ: ئەرێ تو دزانی گزیرتێن هندا روژئاڤا(جزر الهند الغربیە) نوكە زور پێدڤی ئینجیلێنە و دەستگوركانن، و هەر وەكی یا دیار دیكستری هیچ پێزانین و هزر ل سەر سەقایی و پلا گەرماتیا ڤان گزیرتان نەبوو، ئەوی (40) هزار پەرتووكێن ئینجیلێ و (40) هزار جوتە دەستگوركێن دەستی كرین، و هەر ژبەر بەختێ وی یێ سپی دەمێ كەل و پەلێن وی گەهشتین، بزاڤەكا ئولی یا مەسیحی ل گزیرتێن هندا روژئاڤا سەرهلدا، و هەمی پەرتووك ب بهایەكێ زور باش و قازانج هاتن فروتن.
هەروەسا چەندین پاپورێن روسی گەهشتن گزیرتێن هندا روژئاڤا، و هەمی دەستگورك كرین چونكە سەقا ل روسیا زور یێ سارە و ئەو پێدڤینە، و بڤێ چەندێ بازرگانان حەسیدی پێ برن و چاڤ پێ رانەبوون، و هاندانا وی دان بو كرینا كومرێ و رەوانەی (نیوكاسل) بكەت ل ئینگلترا، ئەوی نە دزانی كو(نیوكاسل) سەنتەرێ دروستكرنا كومرێیە ل وێرێ، و ئێكسەر بازرگان دیكستر رابوو بكرێ گرتنا چەند پاپوران و هەمی باركرن ب كەرستێ كومری ژ بنسلفانیا و رەوانەی ئینگلترا كرن، و شوینا دیكستر ببیت یاریپێكەر هەمیان، جارەكا ستێرا بەختێ وی هاتە خوارێ، ئاگرەكێ ئێكجار مەزن كەتە ناڤ كومرێ نیوكاسل و كوگەهێن وان ڤالا بوون، دەمێ پاپورێن وی گەهشتین بەندەرێ نیوكاسل، هەمی ژێ هاتەكرین ب بهایەكێ زور باش و گەلەك قازانج و مفا ژێ كر..