ئەردهەژ کارەسستەک مرۆڤایەتی و ب کراسەکێ سیاسی

مستەفا بامەرنی
هەلبەتە رژێمێن داگیرکەرێن کوردستانێ، رژێمێن شوفێنی بونە و بهەمی شیانێن خو، هەولدایە گەلێ کورد لبەر نەتەوێن سەردەست بکەنە رەشە. ڤان رژێما بشێوازەکێ رێکخستی و پەروەردەیی، پەروردا نفشێن خو یێن ئێک لدویف ئێک کریە کو دوژمناهیا هەبونا گەلێ کورد و کوردستانێ بکەن، بتایبەت رژێما تورکی و دەستهەلادارێن وان ئێک لدویف ئێک هەتا ئەڤرو هەبونا گەلێ مە و وولاتێ مە رەدکەن و گەلێ کورد ب تیرورست دزانن، ئەڤ چەندەژی برێکا پەروەردەیەکا شوفێنی و رێکخستی ئەنجامدایە.
گەلێ کورد لهەر چار پارچێن کوردستانێ دبەرهنگاریا مان و نەمانا خودا، دوژمناهیا ئەرەب و تورک و فارسا وەک نەتەوە نەکریە، بەلکو بەرهنگاریا رژێمێن دەستهەلاتدار یێن دکتاتور فاشست کریە، ژبو دابینکرنا ئازادی و مافێن رەوایێن خو.
پشتی ئەردهەژا بەری چەند روژا ل باکورێ کورستانێ و تورکیا و ل روژئاڤا و سوریێ بدەهان هزارا خەلکێ سڤیل بونە قوربانیێن ڤێ کارەساتا سروشتی و مروڤایەتی، بەشێ هەرە مەزنێ ڤان قوربانیا ژ گەلێ کوردن و لدەڤەرێن کوردی بوینە. لهەمبەری ڤێ کارەساتا مرەڤی گەلێ کورد ل کوردستانێ و ژ دەرڤەی کوردستانێ بهەمی شیانێت خو چ لسەر ئاستێ تاکێ کورد و چ لسەر ئاستێ حکومەتا هەرێمێ و چ لسەر ئاستێ دەزگەهو رێکخراوێن خێرخازیێن کوردی، وەک ئێکەمین کاروانێن هاریکاریا، خو گەهاندە ڤان دەڤەرێن زیان لێکەفتین و بێی جوداهی هاریکاریا وان قوربانیا کر. ب گەواهدیا خەلکێ باکورێ کوردستانێ دبێژن: حکومەتا تورکیا لدەمێن پێتڤی و بلەز خو ل دەڤەرێن کوردا نەکرە خودان، بەلکو چەند روژێن ئێکێ ژ کارەساتا ئەردهەژێ خەلکێ وان دەڤەرا بخو و لدویف شیانێت خو هەولدایە کو قوربانیێن خو لژێر کاڤلە خانیادا بینە دەرێ. ژلایەکێ دیڤە هەلویستێ کوردا یێ مروڤایەتی دڤێ کارەساتا مروڤایەتی دا، کارڤەدانەک و کارتێکرنەک ئەرێنی هەبو لسەر گوهورینا هزرا گەلەک هاوولاتی و رەگەزپەرستێن تورک بەرامبەر گەلێ کورد.

بۆ نمونە:
روژنامەڤانەکێ تورک نڤێسی «دەیکا شەهیدەکێ کورد موچێ کورێ خو یێ شەهید وەک هاریکاری پێشکێشی قوربانیێت ئەردهەژێ کرن ل تورکیا»، هاوولاتیەکێ دی یێ تورک گوتی: «ئەز شەهمزارم بەرامبەر گەلێ کورد، چنکو من هەمی ژیێ خو ئەو ب تیرورست دزانین»و هەوەسا ژنەکا تورک دکرە هەوار و گوتی؛ «ئێدی بەس درەوابکەن.. ئەڤە سەد سالن هین درەوا لمە دکەن دبێژن؛ کورد تیرورستن و کورد دوژمنێن مەنە و کوردستان جهێ تیرورستایە… بەس درەوا بکەن مە کورد دیتن و ئەو بەری هەمیا دهەوارا مە هاتن».
 هەروەسا ل روژئاڤایێ کوردستانێ ژی حکومەتا سوریێ هاریکاریا قوربانیێن ڤێ ئەردهەژێ لدەڤەرێن کوردی نەکر و دیسا ژلایێ دی هێزێن ئوپوسوزیانا سوریێ بشێوەیەکێ دادپەروەرانە هاریکاری نە گەهاندنە کوردێن لدەڤەرا عەفرینێ، بوینە قوربانیێت ئەردهەژێ، بەلکو بەروڤاژی لدویف دەزگەهێ رەوانگەها مافێ مروڤان لس وریێ کو دبێژیتن: هێزێن ئوپوسوزیونا سوریایێ ئەوێن پالپشتیا خو ژ تورکیا وەردگرن لدەڤەرا لژێر کونترولا وان  لدەڤەرا عەفرینێ دەست بسەر کاروانێ هاریکاریا دا گرت و بخو برن و گەلێ کورد ژ وان هاریکاریا بێ بەهر کرن، هەوەسا هێزێن ئوپوسوزیانا سوریێ رێکنەدا وان کاروانێن هاریکاریا ئەوێن ژ دەڤەرێن ژێر دەستهەلاتداریا کوردا دا ل روژئاڤا دهێن بگەهنە خەلکێ لێ قەومایێ ڤێ ئەردهەژێ.
دەست سەرداگرتن و بێ بەهرکرنا کوردا ژ هاریکاریێن مروڤی لژێر ڤێ کارەساتا دلتەزین، سیاسی کرنا ڤێ کارەساتا مروڤایەتیە و بەرهەمێ هزرا توندرەو شوفێنزم و دوژمنکارانەیا رژێما تورکیا و ڤان هێزێن ئوپوسوزیونا سوریێ ژلایەکی ڤە و رژێما سوریێ ژلایێ دیڤە بەرامبەر گەلێ کورد و دوزا کوردی یا رەوایە..