خه‌ونا من یا ئه‌نتیكه ب كولاڤكێ ئه‌جنانڤه!!
4 مانگ پێش ئێستا
مسته‌فا عه‌بدورحمان ئه‌ره‌دنى
شه‌ڤه‌كێ دخه‌و بوم ومن دیت ژ ئه‌سمانێ فریشته‌ك هاته
خوارێ ول هنداڤ سه‌رێ من راوه‌ستیا وئه‌ز هشیار كرم وگوت، خۆ هشیار بكه ونه‌بێژه
خه‌ونه، ئه‌ز فریشتێ یه‌زدانى مه وئه‌ڤه كولاڤه‌كه هوین دبێژنێ (كولاڤێ ئه‌جنا)، یه‌زدانى بوته یێ هنارتی وبكه سه‌رێ خۆ، نه‌كه‌س
ته دبینیت و هه‌ر ولاتێ تو بچیێ دێ زمانێ
وى ولاتى زانى وپێ ئاخڤى.
من گوتێ، دێ شێم چ ب ڤى كولاڤى كه‌م؟.
گوت: هه‌ر تشتێ ته بڤێت تو دشێى پێ بكه‌ى وكه‌س داخوازا
ته ره‌د ناكه‌ت.
من گوت، دشێم كوردستانێ بكه‌م وولاته‌ك سه‌ربه‌خۆ.
گوت: به‌لێ، چونكه تو دشێى ب ڤى گولاڤى بچیه لایێ سه‌رۆكێن
وولاتان وهه‌ر داخوازا ته هه‌بیت دێ بۆ ته جهبجهكه‌ن وكه‌س نه‌شێت داخوازێن ته ره‌د
بكه‌ت، چونكه دێ بێژى ئه‌ز فریشته مه وژ لایێ یه‌زدانى ڤه هاتیمه وپه‌یام هه‌لگرم
چونكه كه‌س ته نابینیت وبتنێ گوه ل ده‌نگى دبن ژبه‌ر هندێ هه‌مى داخوازیێن ته دێ
جهبجه كه‌ن.
من كولاڤ ژ فریشته‌ى وه‌ردگرت وسوپاسیا یه‌زدانى كر.
من كولاڤ كره سه‌رێ خۆ ئه‌ز به‌رزه دبوم وكه‌سێ ئه‌ز نه‌دیتم، ئێكه‌م پێنگاڤا من وكولاڤى
ڤێكئێخستن وكومكرنا هه‌مى پارت وئالیێن كوردستانى بوو ل بن ئێك سیهوانه وبتنێ ئێك
حكومه‌ت وده‌ستهه‌لات من هێلا، من گوته وان ئێك بون ژ هه‌وه وكوردستانه‌كا سه‌ربخۆ
ژمن، ئه‌ڤه فه‌رمانه‌كا یه‌زدانى یه.
پشتى هینگى دچومه لایێ هه‌مى سه‌رۆك و رێبه‌رێن وولاتێن
جیهانێ یێن ئوروپا وئه‌مریكا وئاسیا وعه‌ره‌بان وهه‌رێمى، هه‌مووان بریاردا برێكا
راگه‌هاندنێن خۆ وكومبونێن به‌رفره‌ه ده‌وله‌تا كوردستانا سه‌ربه‌خۆ راگه‌هینن
ودان پێدانێ پێ بكه‌ن نه‌ك كوردستانا باشور به‌لكو چوار وولاتێن كوردستانى (كوردستانا
باشور و باكور ورۆژهه‌لات و رۆژئاڤا) واته كوردستان بو چوار ده‌وله‌تێن سه‌ربخۆ،
هه‌ر وه‌سان من برێكا كولاڤكێ ئه‌جنان ولاتێن زل هێز نه‌چار كرن كو هه‌ر ولاته‌ك پێنچ
فرۆكێن شه‌ركه‌رێن پێشكه‌فتى وتانك وزریپوش وموشه‌ك وچه‌كێ گران بده‌ته كوردستانێ
بێ به‌رامبه‌ر وگه‌نجێن كوردان فێرى ب كارئینانا وان فرۆك وچه‌كان بكه‌ت، ودیسان
هه‌ر وولاته‌كێ زه‌نگین یێن جیهانى و عه‌ره‌بان سالانه (ملیاره‌ك) دولار پێشكێشى
كوردستانێ بكه‌ت ژبۆ ئاڤه‌دانكرنا كوردستانێ.
دناڤ كوردستانێدا من كومبونه‌ك دگه‌ل سه‌رۆك وسه‌روكایه‌تیا
هه‌رێمێ دكر ومن گوت برێڤه‌برنا كوردستانێ ژ هه‌وه وچاكسازى ژ من، هه‌مى رازى
دبون چونكه كولاڤى نه‌چار دكرن ملكه‌چى گوتنێن من بن.
من ده‌ست ب چاكسازیا كر، ل به‌راهیێ گه‌نده‌لكار هه‌مى
من دگرتن وزینداندكرن، نه‌خۆشخانێن تایبه‌ت من راكرن وهه‌موو كرنه حكومى،
خواندنگه‌ه و زانكو یێن تایبه‌ت هه‌موو من هه‌لوه‌شاندن وكرنه یێن حكومى، بانزینخانه
هه‌موو من گرتن وكرنه حكومى، باج من نه‌هێلا ل سه‌ر خه‌لكى، ئاف و كاره‌ب من ژ ده‌ستێن
كومپانیا ئینانه‌ده‌رێ وكرنه حكومى و تشته‌كێ كێم بهێت وه‌رگرتن، ئه‌ردێن(مساتحه)
هه‌مى من ڤه‌گه‌راندن بۆ حكومه‌تێ، بها ونرخ بۆ كه‌ل وپه‌ل وئاهێن خورانێ هاتن
دانان وهه‌ر بازرگانه‌كێ قورخكرنێ بكه‌ت بریار هات دان بهێت سێداره‌دان، ئینانا ده‌رمانا
بۆ ئه‌ركێ حكومه‌تێ وب هه‌روه ل نه‌خۆشخانا
بۆ نه‌خۆشان بهێن دان، دكتور ونه‌خۆشخانه ل گوندان ژى وه‌كو یێن باژێران بن، بوریێن
گازێ وغازێ بۆ هه‌مى مالان هاتن كێشان وب بهایه‌كێ گه‌له‌ك ئه‌رزان،كاره‌با24
كاتژمێرى هات دابین كرن، جوداهیا جینایه‌تى ل كوردستانێ هات راكرن هه‌موو خه‌لكێ
كوردستانێ برایێن ئێكن جودایا ئاینى ونه‌ته‌وه‌ى من نه‌هێلا، داربرین وتێكدانا سرۆشتى
مه كره مه‌زنترین تاوان، كه‌س ل كوردستانێ كرێچى نه‌ما وهه‌ر زارۆیه‌كێ ژ دایكبوو
دبوو دبۆ خودان موچه، ب ده‌هان هزاران
كومپانیا حكومه‌تێ ئاڤاكرن وخه‌لكى تێدا كار كر كه‌س نه‌ما بێ موچه، موچێن هه‌مى
فه‌رمانبه‌ران من زێده‌كرن ژ یێن وولاتێن جیهانێ هه‌میێ پتر.
سه‌رۆك و رێبه‌رێن جیهانێ هه‌میان به‌رێ خۆ دا كوردستانێ
وسه‌ره‌دان دكرن، كوردستان بۆ به‌هشتا سه‌ر دونیایێ دادپه‌روه‌رى وه‌كهه‌ڤى ویه‌كسانى
هاته چه‌سپاندن كه‌س هه‌ژار وبێ ده‌ستهه‌لات وبرسى ل كوردستانێ نه‌ما ب هزاران
سكرێن ئاڤێ هاتن چێكرن ده‌ڤه‌رێن گه‌شت وگوزارى هاتن چێكرن وگه‌شه و وه‌راره‌كا
نه‌چاڤه‌رێكرى په‌یدابوو،كه‌س نه‌شیا بێژیت ئه‌ز ڤێ ناكه‌م چونكه فه‌رمانه‌كا یه‌زدانى
بوو وكولاڤێ ئه‌جنا دسه‌رێ من بوو فه‌رمانێن من ئێكسه‌ر دهاتن جهبجهكرن.
پشتى كو ئه‌ڤه هه‌مى هاتیه كرن ل ده‌شته‌كا به‌رفره
خه‌لك ونوینه‌رێن هه‌مى ولاتێن كوردان كوم
بون داكو ئه‌ز بچم وبۆ وان گوتاره‌كێ پێشكێش بكه‌م، ده‌نگێ خه‌لكێ بلند دبوو ژ كه‌یف
وخوشیاندا دروشم دگوتن ئه‌ز ژى گه‌له‌ك ب كه‌یف بوم چونكه ب رێكا كولاڤكێ ئه‌جنا شیام
چوار وولاتێن سه‌ربه‌خۆ وه‌كو كوردستان ئاڤاكه‌م، من ژى هه‌ر دكره هه‌وار وله‌ز
دكر داكو بگه‌هم جهێ كوردستانى لێ كومبوین وگوتاره‌كێ بۆ پێشكێش بكه‌م ومن پێن خۆ
سڤك دكرن وحلكه‌حلكا من ب سه‌ر وارانڤه دچوو دوێ چونێدا هشیار بوم ژ خه‌وێ كو
خوهه‌كێ ئه‌ز یێ دایم وشلبویم ژ خوهێ به‌رێ خۆ ده‌مێ خه‌ونه وتاریه وكاره‌ب نینه
ب له‌په‌قوتێ من ده‌ستێ خۆ ل تێله‌فونا خۆ گێراند داكو گلوپا وێ به‌رده‌مێ وبچم
كلاسه‌كێ ئاڤێ ڤه‌خۆم چونكه حه‌فكا من هشك ببوو،خوزى هشیار نه‌ببام وهه‌ر دخه‌ودابامه
وژ وان خوشیان ده‌رنه‌كه‌فت بام.