نھا مەترسیدارترین سەردەمە!
3 مانگ پێش ئێستا
عادل ئۆره‌ماری
ژیان ب چه‌ند قۆناغ
و سه‌رده‌مان یا ده‌ربازبووی، هه‌تاكۆ گه‌هشتییه ڤی سه‌رده‌می كۆ دشێن بێژین، نها
سه‌رده‌مه‌كێ ب له‌ز و بچیكه! ژبه‌ر چه‌ندین شوره‌شێن گۆڕانكار ژوان ژی شوره‌شا پێشه‌سازی
و شوره‌شا پزیشكی، شوره‌شا ڕاگه‌یاندنێ، شوره‌شا ته‌كنه‌لۆژی، دگه‌ل شوره‌شێن دینی
و هزری، كۆ هه‌ر ئێك ژڤان گۆرانكارییێن مه‌زن دگه‌ل خۆ ئیناینه چ باشی بیت یان ژی
خراب و كاریگه‌ری لسه‌ر جیهانێ كرینه.
بۆچی مه ل سه‌ری
گۆت: نها مه‌ترسیدارترین سه‌رده‌مه! ژبه‌ركۆ
پێدڤیێن ژیانكرنێ دنۆكه‌دا ب ساناهی دكهڤنه به‌رده‌ست د زۆربه‌ی بیاڤاندا ئاریشه
دهه‌بوونا تشتاندا نینه، هندی ئاریشه د نه‌زانینا بكار ئینانا وانا هه‌ی، كۆ ئه‌ڤ
یه‌كه ژی دبیته تێكدانا ده‌رونێ تاكی و پاشی به‌ره‌ڤ تێكدانا كۆمه‌لگه‌هێ و زێده‌كرنا
تاوان و خرابییان، كۆ ئێدی تشت ژ حاله‌تی دبنه دیارده.
ئه‌گه‌ر ئه‌م سه‌حكه‌ینێ د ئه‌ڤرۆكه‌دا (جیهان یا بوویه گۆنده‌كێ بچیك!) ژبه‌ر ڕاگه‌یاندنێ
و میدیا نوی كۆ تۆرێن كۆمه‌ڵایه‌تی بخۆڤه دگریت، تۆ دشێی ل هه‌رجهێ لێ بی، زانیاریان
بده‌ی و وه‌رگری ژی ل سه‌ر هه‌ر بابه‌ته‌كی یان هه‌ر روویدانه‌كا په‌یدا دبیت،
چونكی دنهادا هه‌ر كه‌س خۆدی كه‌نالێ خۆیێ تایبه‌ته و لدیف خۆ تشتا به‌لاڤ دكه‌ت،
چ باش بیت یان ژی خراب!
ئه‌وا ئه‌ز ژێ دترسم دنۆكه‌دا پتر ژ هه‌ر سه‌رده‌مه‌كی
خرابی ب ساناهی و بله‌ز دهێنه‌كرن و دهه‌مان ده‌م ژی دا، تاوان و خرابیێن هه‌می سه‌رده‌مان
دنۆكه‌دا خرڤه‌بینه و دهێنه‌كرن بۆ نموونه:
(كۆشتن، خۆكۆشتن، زیناكرن، شه‌ڕكرن، دزیكرن، دره‌وكرن، حیله‌كرن،
خۆ مه‌زنكرن، بێ دینكرن، تاڵانكرن، بێ ڕێزكرن، نه‌هێلانا ئه‌خلاقی، جڤیندان، چڤێلیكرن
و له‌وچه‌هیكرن، نێربازیكرن، نامیس فرۆشتن، ئانكۆ خرابیكرن ب هه‌می شێوان و گۆڕینا
باشیێ ب خرابیێ رێك وه‌كێ (قه‌ومێ لۆتی) و
چه‌ندین نموونێن دیتر.
دگه‌ل ڤێ هه‌میێ
ژی دا ئه‌م ته‌ڕ و حشكا پێكڤه ناسووژین، باش ژی یێن هه‌ین و باشی ژی دنۆكه‌دا ب
ساناهیتر ژ جاران دهێته‌كرن.
لێ من تنێ وه‌ك
واقع و نموونه گۆتن داكۆ سه‌ربووران ژێ وه‌رگرین و هشیارێ خۆبین و بۆ پێشڤه بچین،
نه‌ك ژناڤ بچین له‌وما دووباره دێ بیژمه‌ڤه نها مه‌ترسیدارترین سه‌رده‌مه ژبۆ
ناڤچوونان، چونكی كار و كاردانه‌ڤه ب ساناهی و بله‌ز دهێنه ئه‌نجامدان، له‌وما
هزركرن د هه‌ركاره‌كی دا دنۆكه‌دا
ژ هه‌ر تشتی
گرنگتره، ژمێژه یا هاتیه گۆتن:
ئه‌گه‌ر سه‌ره‌تا بیر له كۆتایی نه‌كه‌ی، له كۆتایی بیر
له سه‌ره‌تا ده‌كه‌ی!