میدالییەک ژبۆ کەرى! یەک ژ شاکارێن نڤێسەرێ مەزن (عەزیز نەسین)

جاسم محمد شرنەخی
پشتى هاوڵاتیێ چێل چوویە لایێ حاکمی و ب میدالیەکا خزمەتێ هاتیە خەلاتکرن، گڕەک بەربوو هێستڕێ، ئەو ژى  بەرێ دایە قەسرا حوکمڕانیێ، دەمێ ل بەر دەستێن قڕالی ڕاوەستای، ژێ داخوازکر مینا چێلێ بهێتە خەلاتکرن، لێ حاکمى زوى داخوازا وى بجھـ نەئانى، هەتا پڕسیار ژێ نەکرى: ئەرێ ما تە چ خزمەت بۆ حکۆمەتێ و حاکمى کریە، هەتا ھەژی خەلاتکرنێ ببی؟!
هێسترێ بەرسڤدا: چەوان من چ کریە؟!
ما نە هوین بار و چەک و فیشەکان ب پشتا من دبنە چەپەران، ئەز نەبام چەوا هوین دا سەرکەڤن؟!
- حاکمى گۆتێ: تو ڕاست دبێژى، ڕابوو میدالیەک ژ پلە دوو ب ستویێ هێسترێڤە کر.
ئەو ب دلشادى و زیچکانڤە هاتە دەڤ کەرى، کەرێ پڕسیار ژێ کر، تە خێرە؟
هێسترێ گۆتێ: ژ کەیفێن میدالیێدا، ما تو نزانى حاکمى ئەز خەلات کریمە؟!
غێرەت و حەسیداهیێ خوە ل دل و سەرێ کەریدا، ب زڕینڤە چوویە دەڤ حاکمى و گۆتیێ: من ژى خەلاتێ خوە دڤێت.
- حاکمى گۆتێ ئەم دزانن، هاوڵاتیێن مە ژ چێل و هێستران چ بۆ مە کرینە هەتا حوکمێ مە بهێز کەفتى، گۆشت و شیر و کەڤلێن وان مە مفا ژێ دیتیە، و بار ل سەر پشتێن هاوڵاتیێن هێستر بوویە، لەوا هەردوو جوین هەژى خەلاتان بوون، لێ تە چ کریە؟!
- کەرى گۆت: یێ ژ هەمییا پتر کرین، ئەز و کەرێن وەکى منن، ئەگەر ب هزاران شیرەتکارێن وەکى من ل دەور و بەرێن جەنابێ هەوە نەبان، ئەرێ هوین دا شێن ل سەر کورسیێ ڕویننە خوار؟
ئەرێ ئەگەر کەر نەبان دا حوکمێ وە هندە ساڵان بەردەوام بت؟!
 دیسان ئەگەر ڕەعییەتا هەوە نە کەربان؛ ڕۆژەکێ ب تنێ ژى هەوە دکارى حوکمى بکن؟!
وى دەمى حاکمى موکومبوو کو کەر ڕاست دبێژت، لەوا گۆتى: دڤێت  میدالییا وى ژ یێن هەردوو هاوڵاتیێن هێستر و چێل جودا بت، لەوا فەرمان دا دەرگەهێن هەمى ستەڤلان بۆ وى بھێنە ڤەکرن، ئەو ژى مینا هەمى هاوڵاتیێن دیترێن (کەر) چ بڤێت ڕێپێداى بت بۆ خوە ژ ستەڤڵێ ببەت.