یاسا وەكی گركەكا ھەڤیرییە ب كەیفا خوە دئینن و دبەن

ئامەد بریفكانی
ل هەرێما کوردستانێ، جاران مێر هاتینە کوشتن، زوری ل نامیسا کەسانەکی هاتیەکرن، زەڤی هاتینە داگیرکرن، ماڵ هاتینە تاڵانکرن، پاریێ ژیانێ ژ کەسانەکی هاتیە قوتکرن، زللە لێدان و گەفلێکرن و شکاندن و بێڕێزیکرن ب مرۆڤان هاتیەکرن، ئەڤە و گەلەک کەیسێن دیتر یێن بڤی ڕەنگی، توز کەفتیە سەر فایلێن وان و هاتینە نڤاندن، یان ژی هەر د بنیاتدا ڕێ نەهاتیەدان سکاڵا بهێتە تۆمارکرن.
ب دەهان جاران تاوانبار نەهاتینە سزادان و یاسایێن دارستانێ هاتینە بجهئینان، پرسیار ژی ئەوە: ئەرێ بۆچی و چەوا کەسانەک کو تاوانبارن ژ یاسایێ قورتال دبن..؟

دبیت بەرسڤ بۆ هەمیا یا ڕوون و ئاشکەرا بیت، لێ ئەم دێ ژلایەکێ دیڤە بەحس کەین و بەشەک ژ وان دەرگەهێن دادگەهێ دیارکەین، یێن کو تاوانبار تێدا ژ یاسایێ دڕەڤن.
ئێک. ئێشا دەرونی: گەلەک جاران تاوانبار ب بهانەیا هەبوونا نەخۆشیا دەرونی، ژ یاسا و دادگەهێ ڕەڤیە و نەهاتیە سزادان.
دوو. مەست و سەرخۆش: جاران ژی کەسانەکێ تاوانبار، ب بهانەیا وێ چەندێ، کو هاژ خۆ نەبوو یان نەزانی یان سەرخۆش بوو، ناکەڤیتە بەر دارێ یاسایێ.
سێ. ئەز نەبووم: ئەڤە ژ هەمی حالەتان زێدەترە و مەترسیدارترە، کەسانەکێ تاوانبار دێ تاوانێ ئێخیتە سەر ڕەشەکەکێ خۆ، یان ژی کەسەکی یان تشتەکێ دی ئینیتە دناڤ بابەتیدا، یان ژی دێ بێژیت، ئەو هندەکا ب مەرەم یا ئێخستیە سەر من، یان ژی ب چەکێ من یان ب تێلەفونا من یان ب ئەکاونتێ من، (پشتی دزی) تاوان یا ئەنجامدای. هەر وەکو مەزن دبێژن (ئەگەر دیتم ئەزم، ئەگەر نەدیتم دزم).

یا پێدڤی بوو (یاسا سەروەر با) و یاسا وەکو مرنێ با، کەس ژێ خلاس نەببا، لێ ل هەرێما کوردستانێ، حزب دسەر هەر تشتەکیدایە و بریارێن حزبێ هەمی تشتا دڕاوەستینن، و یاسا لدویڤ بەڕژەوەندیێن حزبێ دهێتە شروڤەکرن، لەوما ژی جاران تاوانبار ژ یاسایێ قورتال دبن، ژبەرکو بەشەکا تاوانباران پارێزبەندی هەیە!