(صباح)....خەلەت بۆ یان گەفكرن...؟!

كوڤان حسێن
سادەترین كارێ‌ رۆژنامەڤانی نەمازە رۆژناما چاپ دبیت، پێداجونەكا هیرە نەك ب بابەتێن سیاسی بتنێ‌ دا بگرە زمان و شێوە ژی پێتڤی ب پێداجونێ‌ یە و دەربازبونا بابەتەك ب ڤی قەباری گرنگ د رۆژنامەكا ب مالێ‌ دەولەتێ‌ دهێتە خودانكرن، ژمن ڤە كاەركێ‌ ئاسان و سادە نینە و ئەڤە ژمن ڤە دجیتە خانا گەفكرنێ‌ نوكە وەك هشیاریەك بو كوردستانێ‌ بكاردئینن.
كوردستان راستە كیانەك دەستوریە بەلێ‌ كەنگی هەڤبەشێن مە رێز ل دەستوری گرتیە و وەك دیار بیرەك هە یە ل عێراقێ‌ ب ڤێ‌ ئارەستێ‌ دا بیر دكەتن، ئەگە بو بجیتە سەری و نوگە ئەو ب گرانی جاڤدێریا رەنگڤەدانێ‌ دكەن لسەر هەمی ئاستی. پاشتی دیارە ج ئاراستایەك ل بەغدایە و ج بیركرنەك مەزهەبی و شوفینی هەیە و دجەندین كەنالان دا دیار كریە كوردستان نەك زێدە یە بەلكو بارگرانیە ژی بو عێراقا عەرەبی. لێ‌ ئەو هەمی بوجون بون دخانا ئازادیا رادەربرینێ‌ دابون. لێ‌ نوكە رۆژناما دەولەتێ‌ بیتە مینبەرا ڤێ‌ گوتارێ‌  ژ راستی پاشەكشیەكا مەزنە و ئاماژەكا مەترسیدارە. لێ‌ بێگومان وان ژی خاندنێن خو هەنە، مسوگەر دزانن راستەو خو حكم كرن ل كوردستانێ‌ وەك سالێن پێنجیا ژراستی كەسێ‌ تاقەتا وێ‌ نینە و كارەك ئاسان نینە.
ئەڤە دجیتە خانا گڤاشتنا لسەر كوردستانێ‌ و پاشی ژ رەوشا شەپرزەیا سیاسیا كوردستانێ‌ هاتیە لبەر جاڤكرن، هەتا بیرەكا هوسا مەترسیدار دەرباسی بیرا چڤاكی بكەن. ب زمانەك سادە بێژن ئەڤەژی هەیە بەلكو ئەڤە ژی دشیان دایە وەك جەوا برینا بودجێ‌ و بریارێن دادگەها فیدرالی دشیان دابون و نە دیرە ژی جاڤپیسیەك نافخو ژی هەبیت دڤی واری دا، جونگە ناسكرنا كوردستانێ‌ و نافخویا وێ‌ و خاندنا خەلكێ‌ پیێتڤی ب تاپورەكێ‌ تایبەتی هەیە.
كەنگی عێراق هندە نازك بویە د خەما راپرسیەكا كەسێ‌ هایژێ‌ نە دبیت و ئەنجامێن راپرسیا رێفراندومێ‌ لبەر چاڤ نەگریت. خوزی عێراق دەربازی قوناغەكا وەسا بیت بریارا لسەر بنەمایێ‌ راپرسیان بدەتن. ئەرێ‌ جەند عێراقیا دڤێت وەك (كوێتێ‌) بن پشتی بیست سالێن هەرەسا سیاسی و چڤاكی و هەتا دوماهیكێ‌ ئەگەر بسیار بڤی رەنگە زانسی و درست بیت.
ئەڤ بابەتە بێ‌ گونەه نینە ئەڤ كارە ل جیهانێ‌ هاتینە ئەنجام دان وەك (هندێ‌) دژی (كەشمیرێ‌) ئەنجام دای ب بریارەكا سیاسی هەمی دەزگەهێن حكمێ‌ زاتی هەلوەشاندن یان لاواز كرن.
كوردستان پێتڤی ب راوەستیانەكا ئێگ گرتیە و دوماهیك ئینانە ب ڤێ‌ رەوشا نە تەندرست یا سیاسی ل كوردستانێ‌. هندی ل كوردستانی گرژێن سیاسی هەبن دێ‌ نەیارێن مافێن دەستوری ب دەرفەت زانن ژهرا خو دارێژن ب هەمی رەنگ و شیوەیان, ژیانا سیاسیا كوردستانێ‌ ئەگەر بومە ئاسایی بیت د خانا ململانا شەریفا سیاسی دا ئەڤە بو نەیارێن مە ێن سیاسی دەرفەتە ئەو پرۆژێ‌ خو گەرم كەن.