د رۆژا زمانێ دایكێدا مه‌ چ كر و مه‌ چ دڤێت..؟

موسه‌ده‌ق تۆڤى
د رۆژا 21ێ شباتێ، كو ب رۆژا زمانێ دایكێ هاتییه‌ ده‌سنیشانكرن، چه‌ندین چالاكى ل ناڤه‌ندێن ئه‌كادیمى و ره‌وشه‌نبیریێن جودایێن كوردستانێ هاتنه‌كرن، هندى په‌یوه‌ندى ب دهۆكێڤه‌ هه‌ى د یه‌ك ده‌مدا دو چالاكى دهاتنه‌ گێران، زانكۆیا نه‌ورۆز ب هه‌ڤكارییا ئێكه‌تییا نڤیسه‌رێن كورد تایێ دهۆكێ و چه‌ند ئالییه‌كێن دن به‌رنامه‌كێ رێك و پێك د دو په‌نه‌لاندا په‌نه‌لێ سپێدى ل زانكۆیا نه‌ورۆز و په‌نه‌لی ئێڤارى ل ئیكه‌تییا نڤیسه‌ران هاته‌پێشكه‌شكرن، د هه‌ر په‌نه‌له‌كێدا چوار سمینار زێده‌بارى چه‌ند په‌یڤه‌كان هاتنه‌پێشكه‌شكرن، د هه‌مان ده‌مدا و ل دانێ سپێدێ زانكۆیا دهۆكێ چالاكییه‌كا ب ڤى ره‌نگى ل ناڤ زانكۆیێ هه‌بوو و تێدا چه‌ند سمیناره‌ك هاتنه‌پێشكه‌شكرن.
ئه‌ز د هه‌ردو په‌نه‌لێن زانكۆیا نه‌ورۆز و نڤیسه‌راندا ئاماده‌بووم، ئه‌ز د وێ باوه‌رێدا مه‌ چالاكیێن دن یێن دهۆكێ و جهێن دى ژى مینا ڤێ چالاكیێ بوونه‌ دگه‌ل چه‌ند زێده‌كرن و كیمكرنه‌كان چه‌ند كه‌سه‌كان هنده‌ك سمینار خواندینه‌، لێ د ڤان هه‌موو چالاكییاندا مه‌ چ كر و چ ده‌ستڤه‌ئینا..؟ ئه‌ز دبێژم د هه‌موو وان چالاكییاندا وه‌ك یا ئه‌ز تێدا ئاماده‌بوویم مه‌ چ نه‌كریه‌ و چ ده‌ستڤه‌ نه‌ئینایه‌ و دێ خوه‌ گرین هه‌تا ساله‌كا دى كا دێ تشته‌كى كه‌ین یان نه‌..!! له‌وما ژى ئه‌ز دێ چه‌ند پێشنیازه‌كان به‌رچاڤكه‌م كو پیویست بوو مه‌ ب كریار د ڤێ رۆژێدا كربان یێن ده‌سپێكربان، پێشنیازێن من ژى گشتینه‌ لێ تایبه‌تمه‌ندییا پارێزگه‌ها دهۆكێ هه‌مبێزدكه‌ن، ژبه‌ركو ئه‌ڤێ پارێزگه‌هێ ب خوه‌ ئه‌و تایبه‌تمه‌ندى تێدا هه‌نه‌:
پێدڤى بوو د ڤێ رۆژێدا مه‌ پێنگاڤا به‌راهیێ هاڤێتبا بۆ دامه‌زراندنا سازییه‌كا ره‌وشه‌نبیرى زمانڤانى، كو ببیته‌ بنگه‌هه‌ك بۆ چاره‌سه‌ركرنا وان ئاریشه‌یان یێن د وارێن په‌روه‌رده‌ و فێركرنێ و راگه‌هاندنێ و پێویستیێن كارگێرى به‌رۆكا زمانێ كوردى ل ڤێ پارێزگه‌هێ دگرن.  
هه‌ر د وارێ په‌روه‌ردێدا پێشنیازدكه‌م بریار بێته‌دان چ سازییا ئامه‌ژه‌پێكرى یان سازییه‌كا دیتر یا پێكهاتى ژ كه‌سانێن زمانڤان و په‌روه‌رده‌كار و ئه‌كادیمى و ره‌وشه‌نبیر و تایبه‌تمه‌ند د زووترین ده‌مدا پێداچوون و ڤه‌وژارتنێ د به‌رنامه‌یێن خواندنێ یێن د قوناغێن جودا یین ل سنوورێ پارێزگه‌ها دهۆكێ دهێنه‌ خواندن بكه‌ن وبریارێ ل سه‌ر شێوازه‌كێ ستاندارد و رێنڤیسه‌كا هه‌ڤگرتى بۆ ڤان به‌رنامه‌یان بده‌ن.
پێشنیاز دكه‌م ئیكه‌تییا نڤیسه‌ران یان زانكۆیه‌ك ژ زانكۆیێن پارێزگه‌هێ پێشنیازه‌كێ ژ پێش هه‌موو ئالیێن په‌یوه‌ندیدار و ب راوێژ دگه‌ل وان به‌رهه‌ڤ بكه‌ت و پێشكه‌شى ئه‌نجومه‌نێ وه‌زیران و د رێكا وانرا بۆ وه‌زاره‌تا په‌روه‌ده‌یێ و وه‌زاره‌تا خواندنا بلند پێشكه‌ش بكه‌ن و تیدا بخوازن ژ ده‌سپێكا سالا نوویا خواندنێ وانه‌یه‌كا خواندنا كرمانجییا باكوور ل خواندنگه‌هێن ب كرمانجییا باشوور دخویننن و وانه‌یه‌كا كرمانجییا باشوور ل خواندنگه‌هێن ب كرمانجییا باكوور دخوینن بیته‌ خواندن و د هه‌مان ده‌مدا وانه‌یه‌كا فێربوونا خواندن و نڤیسینا كوردى ب تیپێن لاتینى ل سه‌رانسه‌رى باشوورێ كوردستانێ بێته‌خواندن، كه‌سین تایبه‌تمه‌ند و په‌روه‌رده‌كار چاوانییا خواندنا ڤان وانه‌یان و ده‌مژمێرێن وان د هه‌فتیێدا و رێزێن (پولین) لێ دهینه‌خواندن ده‌سنیشانبكه‌ن.