ئیماراتێ چ ژ هەرێما کوردستانێ دڤێت؟!

خورشید ئەحمەد سورچی
هەرێما کوردستانێ (KR) پشتی کو ل سالا ٢٠٠٥ وەک قەوارەکا سیاسی و دەستوری هاتە چارچۆڤەکرن، هەر زی دەست ب درستکرنا پەیوەندیان کر لسەر ئاستێ هەرێمی و ناڤدەولەتی، هەروەسا ژبەر جوگرافیا وێ یا سیاسی گرنگیا وێ ڕوژ ب ڕوژ زێدەتر لێدهات. هەروەکی یا ئاشکراییە کو (KR) هەڤسنورە دگەل هەرئێک ژ (تورکیا و ئیران و سوریا) ئەڤێ ژی پتر ڕول یێ داییە هەرێمێ ژبەر  پرسا ئاسایشا ڤان دەولەتان، چونکی ئەڤ هەرسێک دەولەتە، هەرێمێ وەک مەترسی دبینن لسەر ئاسایشا خو.

دەولەتێن کەنداڤی ژبەر مەترسیا ئیرانێ د دەڤەرێ دا یێن چوینە بن سیهوانەکێ بناڤێ جڤاتا هاریکاریا کەنداڤی (GCC)، هەروەکی یا دیار کو پشتی ژناڤچوونا ڕژێما بەعس دەستێوەردانێن ئیرانێ ێن بەرەف بلندترین ئاست ڤەچوین د عێراقێ دا، بڤێ چەندێژی مەترسیا سەر دەولەتێن کەنداڤی یا زێدەتر لێهاتی، ژبەرکو هەڤسنورن دگەل عێراقێ. ئیمارات ئێک ژوان ئەندامێن (GCC)ییە کو هەرگاڤ ئیرانێ دادنێت وەک مەزنترین مەترسی ل ڕوژهەلاتا ناڤین و بگرە دەولەتێن کەنداڤی ژی، لەوڕا ئەڤە چەندین سالە یا د سیڕاعێ دگەل ئیرانێ ب ڕێکا کومەکا ئامرازێن دیار و نەدیار.

دنوکەدا پەیوەندێن ئیماراتێ دگەل هەرێمێ د ئەکتیڤ و خوشن ژڕوویێ ئابوری و سیاسی ڤە. بەلێ یا گرنگ ئەو ئەم بزانین کا ئیماراتێ چ ژمە دڤێت؟ و بوچی گرنگیی ب پەیوەندیێن خو ددەت دگەل (KR)؟
هەروەکی یا دیار ئیماراتێ چاڤ یال زالدەستیا هەرێمی ل ڕوژهەلاتا ناڤین، لەورا وێ دڤێت کوردان وەک کارتەک بکاربینیت دژی ئیرانێ و ب ڕێکا کوردان ژی دڤێت جورە هەڤسەنگیەکێ پەیداکەت ل عێراقێ هەمبەر شیعەیان، زێدەباریی هندێ کو (KR) مەلبەندەکێ گرنگێ وزێ یە و ئەڤێ چەندێژی زێدەتر پەیوەندیێن ئیماراتێ ێن خوشتر لێکری، بەلێ پەیوەندیێن وێ پتر د سیاسی نە ئەڤەژی ژبەر ئەو فاکتەرێن هاتینە دیارکرن.