چاکسازییا کۆردى.. ئەڤە بیناسازی، کا خزمەتێن دن؟! پشکا (9)
4 مانگ پێش ئێستا
جاسم محمد شرنەخى
بەهرەک
ژ حکۆمەتێن ڕۆژهەلاتا ناڤین ب پڕۆپاکندە و
ب کریار ژى د هۆشیێن وەڵاتیێن خوەدا دچینن، ئەو حەتمەن بەرامبەر بژارەیەکێ ژ دوو
بژارەیانن، پاشان ل سەر دفنا وان ئێکێ ژبۆ وان ئێکلا دکن وەکۆ نمۆنە: د ناڤبەرا جۆت
بژارەیا ئازادى یان ئێمناهى، پێشخستنا ژێرخانەیا وەڵاتى یان ژى دابینکرنا ژیارا خەلکێ
و نانێ وان، دێ بینى ئێمناهییەکا بۆ دەستەهەڵاتێ باش ل سەر خەلکێ دسەپینن، جاران
خوە دەرئێخستنا گرنگیدانێ ب بیناسازیێ ل سەر حەسێبا خوەشگۆزارانیێ و بەرهەڤکرنا پێدڤیێن
ژیارەکا مرۆڤانە خوەیا دکن، هەر وەکى جۆت بژارەیێن ناڤهاتین دژبەرێن دیالتیکینە، وەکى
شەڤ و رۆژان، گەر یەک هەبت ئەستەمە یا دیتر جهێ خوە ببینت، ب ڕامانەکا ڕۆهنتر ئەگەر
حکۆمەتێ بچەک کارێ ئاڤادانکرنێ ئەنجام دا،
شەقام ڕاکرن و سەر ژنوى قیر کرن، پارک زێدە کرن، باغچێن جوان دروست کرن، حۆکمڕان وەسا
خوە دەر دئێخن هەر وەکى ب شێوەیەکێ سۆمبۆلیزم و میناکى تەڤ ڕۆل و ئەرکێن خوە ئەداکرین،
لەوا ئەو دبینن ئەرکێ خەلکێیە هەمى ب هویر و گرڤە پەسنا بەژن و باڵا سەرۆکێ حکۆمەتێ
و حاکمێن وى ل شار و باژێران بکەن، ب کریارێن وان وەکۆ دەستکەفتی و چۆنەسەریێن (ئینجازاتێن)
نمۆنەیی سترانان ڤەلۆرینن.
ل هەرێما
کۆردستانێ ئەڤ چەندا بۆرى یا ئاشکەرا و زیقە، ب خرابترین شێوە بەرچاڤ دبت.
هەر دەمێ
بەحسێ چاکسازییا زەڕۆری بھێتە کرن، دۆسەیا
تەخسیرى و شکەستنا حکۆمەتێ و زولما وێ بەرامبەر هاوڵاتییان بهێتە ڤەکرن، دێ بینى
مل ب مل هەمى مەلاقێن دەستهەڵاتێ ل گەل ئەقل سڤکێن نزانن ماف و ئەرکێن وان و یێن
حکۆمەتێ چنە، تەڤ ڤێ زڕنایا نەخۆش لێ ددن: "هەما باشە مە ئێمناهى و ئاڕامی هەیە"، "کا دا خوە ل گەل ناڤەند
و ژێرییا عیراقێ بەراوردە بکین"، "ڕەوشا مە گەلەک ژ یا وان چێترە".
ژلایەکێ دویترڤە ڕاگەهاندنا دەستهەڵاتداران و سۆشیاڵ
میدیایا وێ یا سیبەر و خۆدان خامەیێن کرێگرتى، دێ بینى ژبۆ حکۆمەتێ فۆکسێن ڕۆناهیێ
دئێخنە ل سەر بلندبوونا باڵەخانەیان و ئاڤاهیێن بلندێن بزنسمەن و بەرهەمهێنەر و مەزنە
گەندەڵکارێن وەڵاتى ئەوێن ب مال و مولک و سامان و قویتێ خەلکێ کۆردستانێ پڕۆژەیێن
خوەیێن حەڕام چێکرین، ئەو لەشکەرێ ئلکترۆنی و نڤێسەر و ڕۆژنامەڤانێن حزبی دکنە ھەوار:
ئەھا ئەڤەیە چاکسازییا مەزن!
ھۆسان ئەڤێ "دەستکەفتییا" سەقەت و کێم
ئەو مەزن دکن و ھەوڵ ددن بفرۆشنە جەماوەرى، هەر وەسان دهێن بۆ مە بەحسێ قیرکرنا جادە و ئاڤاکرن و پێشڤەبرنا ژۆنگەهێن
گشتى وەکى پارک و باغچەیان دکن، جاران ژى نێڤ ڕەوشەنبیر و چارێک ڕەوشەنبیر ژى خوەبەخشانە
ل دۆر ڤێ تەکلنگییا حکۆمەتێ دنڤێسن، ئەو ژى پارچە وەسلەکا سەمایێ بۆ "چۆنەسەریێن"
حکۆمەتێ دڕەقسن.
ئەگەر بچەکێ ئەقل و هۆش بهێتە ب کارئانین، دێ شەرمزارییا
تەرکەخەمى و شەکەستنێ ل شوینا هەمبازکرن و شانازیکرنێ وەکى تاڤا هاڤینێ ل نیڤا ئەسمانى
بەرچاڤ بتن، دێ خوەیابت کا حکۆمەتێ چەند تەخسیرییا ئاستێ تاوانێ د چەندین ئەرک و
لایەناندا کریە، وى دەمى ئەگەر چەند ب نیازەکا ساف و ب باشى کریارێن حکۆمەتەکا خوەجهى
بهێتە هەلسانگاندن، ئەو کریار و دەستکەفتى و چۆنەسەریێن وێ ب چاکى بهێنە ل قەلەم
دان، هەر تەخسیرى و شەکەستنا حکۆمەتێ دەهـ قات بەرچاڤ بتن، چونکى گرنگیدان ب ژێرخانەیا
وەڵاتى ڕامانا چ ل سەر خوەنەهێلییا حکۆمەتێ نادت، بەلکى ئەو تەنها بەرپرسى و ئەرکەکێ
گرنگە ژ ئەرکێن دەستهەڵاتێ، چەندین ئەرکێن دیتر ژى هەنە!
ژ بلى ئەرکێ بیناسازیێ و ئاڤاکرنا ژێرخانەیا وەڵاتى
مینا چێکرنا جادە و پر و پارکان، چەندین ئەرک و پەیوەڕێن (وەزیفەیێن) دن هەنە، هەمى
زان و بسپۆرێن بیاڤێ سیاسەت و حکۆمڕانیێ ل سەر بەرپرسییا حکۆمەتێ یەک دەنگن ئەڤێن
ل خوارێ هندەک ژ وانن:
- ئەرکێن
لەشکەرى.
- ئەرکێن ئەمنى.
- ئەرکێن یاسادانانی (تەشریعی)
-ئەرکێـن دادوەری (قەزائی)
- ئەرکێن گرێداى خزمەتێن بنگەھین (زەرۆرى) ژبۆ
هاوڵاتییان: مينا وان خزمەتگوزاریانە يێن تایبەت ب پەروەردە، فێرکرن، تەندروستی، پشتەڤانییا کۆمەڵایەتی و تەندروستی، و گەهشتن
ب دادپەروەرییا جڤاکى ل ناڤ هەمى وەڵاتیاندا.
- ئەرکێن گڕێداى ڕێکخستنا ئابۆرێ نیشتمانی:
دەربارەى سیستەمێ ئابۆرى و ئاراستەکرنا وى پێدڤییە
حکۆمەتێ ڕۆڵەکێ ئێکلاکەر هەبت، لازمە کار بۆ باشترکرن و پەرەپێدانا ئابۆریێ وەڵاتى
بهێتە کرن، بزاڤێن بەردەوام ژبۆ هندى بکت سامان و ژێدەرێن بنەڕەتی و هۆکارێن بەرهەمهێنانێ
زێدە ببن، و ئامرازێن داهاتێن نیشتمانی د دەستێن ژمارەکا کەساندا قۆرخ نەبت، و دابەشکرنا
دادپەروەرانە پەیدا ببت.
ل ڤێرێ
ھندەک پرسیارێن سادەیێن وەکى ئاڤ و باى پێدڤى خوە فەرز دکن مینا:
- ئەو سوپایێ گەنجان ژ دەرچوویێن زانکۆ و پەیمانگەهان
کو ژمارەیا وان نێزیکی (200) هزار کەسانن، ئەڤە نزیکى دەهـ ساڵانە حکۆمەتێ دەرگەهێن
دامەزارندنێ ل بەرامبەر وان یێن داخستین، ل کەرتێ تایبەت ژى کارى بۆ خوە نابینن، ئەرێ
گەلۆ بیناسازى و ئاڤاھیێن قڕالی یێن بەرپرسان دێ ژیانا تارییا گەنجان گەش کن؟!، دێ باڵەخانە بنە ئەگەرێ وێ چەندێ بشێن هەڤژینیێ
پێکبینن؟!
- ئەرێ ب ئەنجامدانا ئەرکێ بیناسازییا ژێرخانەیى
دێ ئاتافا هەژاریێ چارەسەر بت؟!
- ئەرێ ب ئاڤاکرنا هندەک پر و پارکان شەرمزارییا
تاوانێن گەندەڵیێ دێ هێنە شویشتن؟!
بەرسڤێن ڤان پرسیاران هند ڕۆهنن هەوجەى گۆتنێ نینن!
ـ چاکسازییا کوردى و پرسیارێن سادە و یێن ئاڵۆز! (پشکا ئێکێ)
https://www.rwangauraxna.com/ba/detail.aspx?IDNews=6868
ـــــــ چاکسازییا کوردى.. ئەڤ کریارە پێڤاژوویە یانژى شەرە؟
(پشکا دویێ)
https://rwangauraxna.com/ba/detail.aspx?IDNews=6883
ـ چاکسازییا کوردى.. دوژمن و هەڤڕکێن وێ (پشکا سیێ)
https://rwangauraxna.com/ba/detail.aspx?IDNews=6894
ـ چاکسازییا کوردى، دناڤبەرا تەکلایەنى و تەڤگریێدا
(پشکا 4).
https://rwangauraxna.com/ba/detail.aspx?IDNews=6921
ـ چاکسازییا کوردى د ناڤبەرا پەیکەرسازى و تڕانەسازیێدا(پشکا
پێنجێ)
https://rwangauraxna.com/ba/detail.aspx?IDNews=6942
ـ چاکسازییا کوردى.. دەرازینک: چاکسازییا سیاسى (6)
https://rwangauraxna.com/ba/detail.aspx?IDNews=6966
ـ چاکسازییا کوردى، چاککرنا پەروەردێ پشکا (7)
https://rwangauraxna.com/ba/detail.aspx?IDNews=6982
ـ چاکسازییا کوردى.. گوهوڕینا پڕۆگرامێن خواندنێ
(پشکا8)
https://rwangauraxna.com/ba/detail.aspx?IDNews=7000