چما جلێن کۆردی ل ھەمی ناڤەندان نابنە ئاسایی؟!

جاسم محمد شرنەخى
ھەر نەتەوە و گەل و مللەتەکێ جیھانێ ھەبت، جلەکێ خوەیێ یان ژی چەندین چەند تەرز و جۆرەکێن جلێن کلاسیکی و کەلتۆری و مللی ھەنە، بەھرەکا باش ژ وەڵاتێن جیھانێ ئەم دبینن سەرەڕای پێشکەفتن و ھێزا وان ژ ھەمی لایەکێڤە، لێ خەملا کەلتۆری یا جلێن وان یێن نەتەوەیی زۆر یا بەربەڵاڤە، قەد ھەمبەر بکارئینان و ل بەر خوەکرنا ھەمی جلێ مللی - ژ شمکی ھەتا کۆمکی- یان ژی ھندەک ژ جلێ فلۆکلۆری  ھیچ سنۆرەک، ڕێگریەکا یاسایی و عورفی نینە، کەسەک ژ ھاوڵاتی و حکۆمەتا وان ب چاڤێ کێم دیتنێ بەرێ خوە نادەتە وى جۆرێ خەملاندنێ- وەکۆ میناک - زۆر ب ئاسایی و سەربلندی دێ بینی سەرکردە، سەرۆکێ حکۆمەتێ، سەرۆک کۆمار، ڕێڤەبەر، فەرمانبەر و ھەتا قوتابیێ پاکستانی، مالیزی، ھندی...ھتد، و چەندین وەڵاتێن عەرەبی ژ کەنداڤییان بگرە ھەتا بگەھییە مۆریتانییان یێن ب جلێن خوەیێن مللی دھێنە دەواما خوەیا فەرمی!

یا دیارە ژی، ناسنامەیا وان مللەتان قەت وەکی یا مە د مەترسیێدا نینە، بەلێ ئەم کۆرد سەرەڕای پێدڤیبوونا ب ڕەسەناتییا خوە و پارازتنا ناسناما خوەیا نەتەوەیی، ئەبەد ئەم پویتەی ب نۆڕماڵکرنا جلێن خوەیێن مللی نادین، ھەر چەندە ئەڤ جلە بخوە ئێک ژ ھۆکارێن پارێزەریێیە ل ناسنامەیا نەتەوەیی.
ھیڤییە یێن شۆلەژی گۆھ ھەبان، دا قەفتەکا پێشنییارێن تایبەت دڤی بیاڤیدا پێشکێش کین، بباوەرم دا خزمەتا پڕسا سڕۆشتیکرن و نۆرماڵیکرنا جلێ کۆردەواریێ ڕەسەن و ب ستار و جوان و گۆنجای ھێتە کرن.
-------------