راپەرینێ ل کێ پیروزکەم؟!

بێستون بەرواری
دکەم ناکەم، دڤان رۆژێن دیروکی دا، ب چەند رێزاسالڤەگەرا راپەرینا پیروزا ئادارا ١٩٩١ێ پیروزبکەم، چەند بیرهاتنێن ئەوان رۆژا بنڤیسم و هندەک وێنێن وی دەمی بەڵاڤ بکەم. مخابن ئەز نزانم پیروزباهیێ ل کێ بکەم! من هزرا وی خەلکێ پالەوانێ راپەرێن دەسپێکری و وان پێشمەرگێن قارەمانێن پشتەڤانیا وی خەلکی کرین، کو دوان رۆژان دا بوێرەکی و ب گیانفیدایی کارین دام و دەزگەهێن رژیمێ لسەر ئاخا باشور رامالن و مزگینیا ئازادیێ بگەهیننە چار کورنەتێن کوردستانێ. بەلێ دزانم ئەو پالەوان و ئەو قارەمان نهو دوەستیای و خەمگینن، نهو ئەو یان پاسەوانێن بەردەرگەهێ ڤیللا بەرپرسەکینە یان ژی نهو خانەنشینن د سرێ دانە لبەر دەرگەهێ بانقەکێ، کو بەلکی پارێ کریا خانیکێ خوە و پارێ چەند ئامپێرێن کارەبێ بدەن.

من هزرا مالباتێن رێزدارێن وان جانگوریا کر ئەوێن ب خوینا جانێ خوە دارا ئازادیێ ئاڤداین، بەلێ صەد مخابن ئەو  ژی هێشتا یێ ل هەستیێن باب و برا و کوڕ و کچان دگەرن دمەلویل و شەپرزەنە! من هزرا وان گەنج و لاوا کر کو هیڤیێن رەنگین و خەونێن خوش ب راپەرینێڤە ددیتن، بەلێ مخابن ئەو هیڤی هەمی د بەحرا ئیجەدا بئاڤێداچوون و بەرزەبون!
من هزرا کادر و فەرماندێن شورشێ کر، صەد مخابن گەلەک ژوان ژبو پلە و پوستا نهو بوینە بازرگان و شریکە دز، ئەوێن دی ژی لدوری وڵاتی ئاخینک و نالینا د هەلکێشن و روندکا درێژن! من هزرا نڤیسکار و رۆژنامەڤانا کر دیسا مخابن ئەوێن خودان ناڤ و نیشان دهولقوت و زرنابێژن، قەلەمێ خوەیێ فروتی و ماینە بێوژدان! ئەو کتا مایی دبنچاڤن بەس ئەو باخڤن جهێ وان زیندانن!
من هزرا  میر و گزیرا کر و خودان قەسر و قوسیرا، کومپانی و خودان بیرا، پلە بەرزا و شریکەدزا، پەرلەمانتارا و قوماندارا، ملیونێرا و زکتێڕا، دوهی برسی و ئەڤرو تێرا کر هەمی بوینە فسفسپالەوانێن راپەرینێ و دەستکەفتێن لسەر خوە طاپوو کرین هەرکەسێ  پیروزباهیێ لوان بکەت دێ لێبارن هزار نفرین.
راپەرین ل خەلکێ قارەمان کو راپەری پیروز، لهەرکەسێ بەشداری کری و پشتەڤانی کری پیروز، لهەرکەسێ روحا راپەرینێ هەیی و ژبو ئارمانجێن راپەرینێ تێکوشیت پیروز، لچالاکڤانین ئازادیخواز و بتایبەتی لچالاکڤانێن دکونجا زیندانێ دا پیروز.