47 سالییا وه‌غه‌را ژه‌نه‌رال ئیحسان نورى پاشایێ بێ خودان
3 مانگ پێش ئێستا
موسه‌ده‌ق تۆڤى
به‌رى 47 سالان وه‌كى ئه‌ڤرۆ ل تاخه‌كێ تارانا پایته‌ختا
ئیرانێ سه‌ركرده‌یێ شۆرشا ئاگرى ژه‌نه‌رال ئیحسان نورى پاشا (1892 - 25 ئادارا
1976)ێ وه‌غه‌را داویێ كر، ئه‌و 46 سال بوو ب غه‌ریبى و بێ خودانى وه‌ك په‌نابه‌ره‌كێ
سیاسی ل ئیرانێ دژیا، زێده‌بارى چه‌ند جار گرتن و زیندانكرن و سرگۆنكرنێ و به‌رده‌وام
ل ژێر زێره‌ڤانیێ د وان 46 سالاندا نه مافێن وه‌لاتییه‌كێ ئاسایى هه‌بوون نه ژى
مافێن په‌نابه‌ریێ ل دووڤ یاسایێن ناڤده‌وله‌تى، د هه‌ژارییه‌كا دژواردا و ل ژێر
زێره‌ڤانییا هه‌ردو سازیێن هه‌ولگریێن ئیرانێ و تركیا و د بازنه‌كا دوورپێچكریدا
دژیا، د وى سه‌رده‌میدا نه سازییه‌كا مافێن مرۆڤى ل وى وه‌لاتى هه‌بوو، نه ژی
یێن ناڤده‌وله‌تى ئه‌گه‌ر هه‌بن ژى دكارین د هه‌وارا وى بچن، نه ماف هه‌بوو بۆ
خوه رێنجبه‌رییه‌كێ بكه‌ت، نه ژى ئه‌و مه‌هانه‌یا ده‌وله‌تێ بناڤێ په‌نابه‌ریێ
ددایێ تێرا هندێ هه‌بوو ژیانه‌كا ب ئاسایى پێ بژیت، نه ژى وه‌لاتیێن كوردێن ئیرانێ
(كته‌كا كێم نه‌بیت) خوه لێ دكره خودان، ده‌مێ وه‌غه‌را داویێ كرى هه‌یى نه‌ییێن
وى ل دووڤ دراڤێ ئیرانیێ وى چاخى تنێ 16 – 17دولار بوون و كته‌كا كێما خه‌لكى ل
رێوره‌سمێن ب خاكسپاردنا وى ئاماده‌بوون.
46 سالان (1930 – 1976)ێ د وێ ره‌وشێدا ژیا، ئه‌ڤه 47
سال ژى ب سه‌ر مرنا ویرا ده‌ربازبوون، كوردان ب دروستى خوه لێ نه‌كریه خودان،
بیرهاتنا وه‌غه‌را وى ب بێ ده‌نگى دهێت و ب بێده‌نگى دبۆریت، نه سازییه‌ك ره‌وشه‌نبیرى
نه سازییه‌ك ئه‌كادیمى نه ژى حزبه‌ك یان حكومه‌ت خوه ل بیرهاتنا وى دكه‌ن
خودان، بلا خوانده‌ڤان ئه‌ڤرۆ ببینن چ بۆ دهێته‌كرن...!! چاوان دێ ب بێ ده‌نگى ده‌ربازبیت....!!.
ژ سالا 1998ێ هه‌تا نها من ب ئه‌ركێ خوه زانییه خزمه‌ته‌كێ
بۆ ڤى نه‌مرى بكه‌م و هه‌رسال ژى ب گوهێن خه‌لكه‌كێ په‌یوه‌ندیداردا دخوینم خوه
لێ بكه‌نه خودان.. خه‌مه‌كێ ژێ بخۆن.. بیرهاتنا وى ساخكه‌نه‌ڤه.. به‌لێ دیاره
ئه‌م كورد د رێزگرتنا نه‌مرێن خوه‌دا ژى ب ئاقله‌كێ به‌رته‌نگێ حزبى ئه‌شیره‌تى سه‌رده‌ریێ
دكه‌ن، ڤى نه‌مرى ژى نه حزبه‌ك هه‌یه نه ژى ئه‌شیره‌ته‌ك و نه ژى سامانه‌ك ل
پشت خوه هێلایه، تنێ دیرۆكا شۆرشا ئاگرى 1927 – 1930ێ و چه‌ند په‌رتووكه‌كێن
دیرۆكى و چه‌ند هه‌لویسته‌كێن نه‌ته‌وه‌یى ل دووڤ خوه هێلانه.