دوژمن و تالانکرنا چاندا کوردی

نیشان بامەرنی
بەری ڤێ نەورۆزێ مە وانەیەک ل سەر بابەتێ ئەڤینییێ هەبوو. خوەندەکاران ڤیا ل فلمێ مەم و زینێ بنێرین. مە ژی گۆت گەلەک باشە. دێ ئەم ژی ئەڤین، چاند، دیرۆک و ئەدەبیاتا خوە د نەورۆزێ دا نیشا دەین.
ئەم ل چەند فلمەکان گەریاین، مە یەک دیت کڤانتیت و کڤالیتەیا وێنەیان گەلەك یا جوان بوو. لێ پشتی مە ل فلمی نێری موخابن، ناڤەرۆکەکا دوور ژ هەمی؛ کوردەوارییێ، نەورۆزێ، دیرۆکا کوردان، چاندا کوردان، هێما و رەسەنییا کوردان، دوور ژ ئاخێ، ئەحمەدێ خانی و ئەدەبیاتا کوردی هاتییە چێکرن. وەکە کو چیرۆکەکا ئەڤینیێ کەسەکی ل تورکیا بۆ خوە نڤیساندبت پشتی هنگێ کربتە فلم.

فلم ب ڤی ئاوایی دەستپێدکت:
مەمو ب فەرمانا میرێ کوردان تێ گرتن، مالباتا وی دچنە دەف پولیسێن دولەتا تورک شکیاتێ دکن. ژ بلی بەکوی و میری کەسەکێ دن جلکێن کوردی ل بەر نین. ئەو ژی وێ یەکێ نیشان ددەت میرەکێ کورد یێ نەزان و بەکۆیەک کورد یێ خراب و فتنەچی.
پشتی هینگێ ترمبێل، موبایل، وێنەیێن رەنگین و فەرمانگەهێن حوکمەتا تورک، وەکە کو چ نەورۆز نەبوونە و مەم و زین چیرۆکەکا تورکی یا چێکریە و ئەڤرۆکە کریە فلمەک و ب زمانێ کوردی نیشانی مە ددەن. ئانکۆ دبێژنە مە، ئەم دێ وە ب رێیا زمانێ وە کوژین.
د دوماهیکا فلمی ژی دا پۆلیسێن دەولەتا تورک تاجدینی دگرن. پشتی هینگێ ژی شوونا تاجدینی کورەک ببت و ناڤێ وی بکەنە مەم، کچەک دبتن و ناڤێ وێ دکەنە زین و دایکا وێ ستی، ل سەر گۆرێ زینێ دبێژتێ؛ دێ پاشی ڤێ چیرۆکێ بۆ ڤەگێریت.

ب هەر حال، یا من دڤێت بێژم. ئەگەر هندی دوژمنێن مە چاند و دیرۆکا مە تالان دکن و بۆ خوە دگورهرن، نیڤەکا وێ ئەم خوەدی ل چاند، زمان، کوردەواری، وەلاتپەروەری و دیرۆکا خوە دەرکەتباینا، بێی شک و گۆمان نووکە ئەم دەولەت باین. لێ نووکە ژی من ئومێدەکا مەزن یا هەی دسەری دا، ب تایبەت رێبەر و سازیێن کوردان، ئو ب وان رە ئەم وەکە مللەت دەستپێ بکن، ئەو رۆژ ژی یا نێزیکە و دێ گەهینێ.