کەوە و دۆژمنێ سەرێ خۆیە

نەوزاد ئامێدی
وەکی هەرجار، دفەیسبوکا کوردادا هۆسەیە، نە ژبەر رەمەزانێ، لێ ژبەر ڕاپۆرتەکا ئەمریکی بەهسێ هەرێما کوردستانێ یا کری، بشێوەکێ خراب. و دەهەمان دەمدا بەهسێ بریارا دادگەهەکا فەرەنسی ژبۆ ڕاوەستیانا هناردەکرنا گازا هەرێمێ، و زڤراندنا وێ بوو دەستێ عیراقێ.
لڤێرە چەند تێبینیەکێن بچیک. ئەڤ شێوێ ڕاپۆرتا رۆژانە لهەمی دەزگەهێن ئەمریکی دەردکەڤن، چ ئەڤ دەزگەهە یێت پاراستنێ بن یان قۆنسلخانە و بالیوزخانێت ئەمریکا بن ل دونیایێ. لێ ئەڤ جۆرە نڤیسینێن تێنە بەڵاڤکرن بۆ رایا گشتی، بەس بوو مژیلکرنا خەلکێ یە. چنکۆ ئەمریکا نەبوویە ئەمریکا ب رێکا بەڵاڤکرنا سیاسەتا خۆ لسەر ماڵپەرێن فەیسبوکێ، و پشتەڤانیا ئازادیێن خەلکێ بن دەست. یا دووێ وەکی من گوتی رۆژانە ب دەهان بریارێن دادگەها و ڕاپۆرتێن تێنە دەرڤە و بەڵاڤ دبن، بۆ مەسەلێن ڕاگەهاندنێ. لێ چەند ژوان تێنە ب جهـ ئینان دسیاسەتا دەرڤە، کێمتر ئێک ژسەدێ. ئەگەر نا، نۆکە دونیا بەهەشت با و ئارامی یا بەر بەڵاڤ با.
لێ تشتێ هەردەم من بێزار دکەت و دامای دکەت، ئەوە خەلکەکێ گەلەک خۆش باوەر مەیێ هەی، و وەکی نیسکێ زی سەردا دچن و زی تێنە خار. گرنگ نینە کا زێدماتکێن ڤێ بریارێ دێ چ بن لسەر هەرێمێ، گرنگ ئەوە دەستهەڵاتێ تێکدەین. گرنگ نینە سەد لسەر سەدێ جارەکادی بزڤرینە بن دەستێ داگیرکەرەکێ دی، یا گرنگ ئەوە دەستهەڵاتێ تێکدەم. لێ خۆزی ئەڤێ هەوە دڤێت کۆ بکەڤینە بن دەستا، دەولەتەکا باشبا. ژبلی هەمی کارەساتێن کوردا لسەر دەستێ وا، ئێک ژ خراپترین دەولەتێن دونیایێ یە ژهەمی لایەکی ڤە، گەندەلیێ، پیسیێ، مافێ مرۆڤا، خیانەتێ، خزمەت گوزاریێ… کێم ڕاپۆرتەکا نیڤدەولەتیا خراب یا هەی عیراق لسەرێ لیستێ نەبیت، و کێم ڕاپۆرتەکا نیڤ دەولەتیا باش یاهەی عیراق لبنی نەبیت، یەک وەڵاتێ ھەی مونافسا عیراقێ لسەر دوماھیێ دکەت، ئەوژی سۆماڵە. لێ ژبلی هەمی تشتەکی، ناڤێ داگیرکەری بتنێ بەسە کۆ مە نەرەحەت کەت و بۆ مە دیارکەت دێ یا مای بیتە جەهنەم و خۆلیسەری.
دژاتیا دەستهەڵاتێ و گەندەڵیێ، کێمیا خزمەت گوزاریا، خرابیا کێسێ مافێ مرۆڤا… بکەن لێ نەکەڤنە دتەڵهەیا داگیرکەراندا، چۆنکە وێ گاڤێ بەس کۆشتن و دەردەسەریێ و برسێ دێ بوو زاڕۆکێن خۆ هێلێن. هەروەسا زی زی باوەریا خۆ ب ڕاپۆرتێن وەڵاتێن زلهێز نەئینن، وا هاژ ژ گرتیێن زیندانا نینە، یا وا و یا گرنگ، بەرژەوەندیا وەڵاتێن وایە. ئەڤجا ئەو بەرژەوەندی لکیرێنە و دگەل کێنە، ئوە لوێرێ دحازرن.
بیرا من هاتە نۆکتەکێ دەمێ من ئەڤ دەربرینە دنڤیسی، دێ ڤێ نڤیسینێ پێ ب دوماهی ئینم. دبێژن کابرایەکی بدەستێ چەپێ زاد دخار، مەڵایەکی گوتێ: تو دزانی شەیتان دگەل وا خوارنێ دخون ئەوێ ب دەستێ چەپێ خوارنێ دخۆن. گوتن: ژ سادەیا خۆ، ڕابۆ ژەهر کرە دناڤ زادێ خۆدا دا شەیتانی پێ ب کۆژیت.
هیڤیدکەم کۆ گوهێ خۆ نەدەنە ڤی مەڵای، چۆنکە ئەوژی بدەستێ چەپێ خوارنێ دخۆت. و ژیانا خۆژی ژەهەر نەکەن، چۆنکە هەر دێ هین پێ مرن.