هەرێما کوردستانێ دناڤبەرا بەرەیێ (شیعی و سون )دا

خورشید ئەحمەد سورچی
کوردستان یا هاتیە دەوردان ب سێ دەولەتێن شیعی کو ئەوژی (ئیران و عێراقا شیعی و سوریا یا عەلەویە)، هەروەسا ئاراستەکێ وێ ژی یا دەوردایە ب تورکیا یا سونی، یا ئاشکراییە کو د ڕوژهەلاتا ناڤین دنوکەدا شەڕێ مەزهەبگەریێ یە و خۆفەرزکرنا مەزهەبان یا بوویە دیاردە و فەڕزیاتەک ژلایێ دەولەتێن خودان هێزێن سونی و کۆمارا ئیسلامی یا ئیرانی، کو ئەڤێ چەندێ ژی کارتێکرنەکا ڕاستەوخو ب هەرێمێ ڤە یا هەیی .

پشتی کو ل سالا ٢٠٠٥ هەرێم وەک قەوارەکا یاسایی دناڤ دەستوری دا هاتە چارچۆڤەکرن، ڕێک ل پێش هەرێمێ ڤەبوو بو درستکرنا پەیوەندیان لسەر ئاستێ ئەقلیمی و ناڤدەولەتی، ڕەنگە خو نێزیکرنا کوردان ژ بەرەیێ سونی و پالپشتی کرنا وان شاشیەک بیت کو هەرێم کەفتیێ، چونکی بەرەیێ سونی د گوپیتکا لاوازیێ و بێ دەستهەلاتیا خۆ بوو، بەرامبەر وێ بەرەیێ شیعی هاتە پەراوێزخستن و کوردان خونێزیکی بەرەیێ شیعی نەکر وەک پێتڤیی، کو ئەڤەژی بوو ئەگەرێ پەیدابوونا چەندین قەیرانێن سیاسی دناڤبەرا حکومەتا هەرێمێ و حکومەتا ناڤەند .

ئیران د سیاسەت گێڕیا خو یا ناڤخویی و دەرەکی دەولەتەکا بهێزە و لسەر ئاستێ ئەقلیمی ژی سوپەر پاوەرە، هەروەسا خودان کەلتورەکێ چەند هزار سالیە و خودان ڕەوشەنبیرەکا بلندە، کو ئەڤە هەمی دشیان ببنە ئالاڤەک بو کوردان کو ب ڕێکا وان کورد بهێز ببن دعیراقێ دا، دا ژبیر نەکەین کو ئیران هەرگاڤ هەرێمێ دبینیت وەک ستراتیژی چونکی هەرێمێ ڕاستەوخو پەیوەندی یا هەی ب ئاسایشا ئیرانێ ڤە، لەورا هەرگاڤ ئیران ب چاڤەکێ گرنگ سەحدکەتە هەرێما کوردستانێ .

ل دووماهیێ من دڤێت بێژم خو نێزیکرنا کوردان ژ بەرەیێ سونی بوو ئەگەرێ هندێ کو گەلەک دەستکەفتێن مەزن ژمە بهێنە ستاندن ژلایێ بەرەیێ شیعی، لەورا دبینم دنوکەدا خو نێزیک کرن ژ بەرەیێ شیعی زێدەتر ژ بەرەیێ سونی یا دبەرژەوەندیا هەرێمێ و داهاتیێ وێ .