فێربوون ژ سەربورێن کەسانێن بەرێ یان ئەنجامدانا كاران و فێربوون ژێ؟!

نورھان عەلی
دڤی سەردەمێ نها ئەم تێدا رۆژانە رویبرووی ڤێ چەندێ دبن، زۆربەیا مە چاڤێن وی لسەر دەوروبەر و مە ئاگەهه ژ ژیانا ئێکودوو هەیە و چاوانیا سەرەدەریکرنا دگەل ژیانێ و ئاریشە و ئالۆزیێن وێ. هندەک دێ بێژن فێربوون ژ سەربورێن کەسانێن بەری خۆ بنیاتێ سەرکەفتنێ یە، ئەز دژی ڤێ چەندێ نینم، لێ نە هەر تشتەکێ بزانین باشە دێ کەین ژبەر جاران دکەڤنە ژێر کۆنترۆلا حەزێن خۆ و دێ دژی وێ چەندێ بین یا مە هزر تێداکری و دبینن باش.
دێ بینین هەر مرۆڤەک دێ بەحسێ خۆ و ژیانا خۆ کەت و ئەو باردۆخێن تێدا دەرباز بوی، کا چاوا سەرەدەری دگەل کر و سەرکەفتن ئینا، هەروەسا ل تۆرێن کۆمەلایەتی هەتا کۆ ل سەر شاشەیێن TV دێ خەلک هێت و بەحسێ ئەزموونێن ژیانا خۆ کەت، هەروەسا دنهادە گەلەک پەرتووکێن ل بەردەستێ مە هەین تێدا بەحس ل وان کەسان دکەت یێن خودان دەستکەفتەکێ مەزن و جیاواز ژ مرۆڤێن دی.
ئەڤە هەمی ب ئارمانجا هندێ کو تشتەکی بزانین ل پێش کو بچنە دناڤدا و دەمێ دچنە ناڤدا بزانین سەرەدەریا دروست بکەین، ئەڤە دبیت تشتەکێ باش بیت لێ نە ب تەمامی ئانکو درستە دێ مرۆڤ زانیت، لێ رامانا هندێ نادەت کو دێ دژیانا خۆ دا پراکتیک کەت، ژبەرکو پشتراست ئەو کەسێ لدەمەکی سەرکەفتن د ئەزمونەیەکێ دا ئینای و نها هاتی و بەحسێ ئەزموونێن خۆ بۆ دەوروبەر کری ژ گەلەک لایان ڤە جودایە ژ کەسەکێ دی یێ کو چیرۆکا وی بزانیت و لسەر فەر بیت ژێ فێربیت.
هەر تاکەکی ژ گەلەک لایان ڤە جودایە ژ تاکەکێ دی و ئەو باردۆخێن تێدا دەرباز دبن جودانە ژ کەسەکی بۆ ئێکێ دی، ڤێجا دێ ئەزموون ژی جودا بیت و دێ چاوانیا سەرەدەریکرن و چارەسەرکرنێ ژی جودا بیت.
ژبەر ڤێ چەندێ بلا پتر نەبێژنە ئێکودوو فلانی وەکر و تە دیت خەلەتی بوو ما بۆچی تە ژی هەمان خەلەتی کر، دێ زانین لێ دبیت پراکتیک نەکەین.
هەمی مرۆڤان مافێ هەی خەلەتیان بکەن و هزر تێدا بکەن و بکەڤن و بزانن و رابەن تا لدوماهیکێ ژ ئەزمونا خۆ فێردبن.