پەیامەك بۆ لایەنێن پشتەڤانییا دەرئێخستنا كۆڤاران دكەن

دلێر كەمال
ـ دویڤچوونا پارەیێ مللەتی بكەن و بزانن ب پارەیێ مللەتی چ جۆرە كۆڤار دەردچن ـ
خودانێن ئمتیازان و سەرنڤیسكارێن كۆڤاران، كەنگێ دێ هزرا كارەكێ وەها هونەری و بالكێش ژ ڕویێ ناڤەڕۆك و ڕوخسارێڤە بكن؟ ئەرێ هوین ژ نڤیسین و مژارێن دووبارە و تەقلیدی تێر نەبووینە؟ هەتا كەنگی دێ وێنەیێن سیاسییان ل سەر بەرگێن كۆڤارێن خوە دانن و هەر ئەوان ئاگەهـ ژ تامسارییێن هەوە نینە! ئەرێ هوین ژ دیزاینێن خوە یێن بێڕوح ژی تێرنەبووینە؟ ئەرێ پارەیێ پێدڤی ل بەر دەستێ هەوە نینە كو كارەكێ وەها بكن؟ بەلێ سەر بەختێ من، پارەیێ پێدڤی ل بەر دەستێ هەوە هەیە، بەلێ هوین ب ڕوح و ڕەهەندەكێ هونەری و ڕێكخستی كارێ خوە ناكەن. هوین دبینن، ل باكوور و ڕۆژئاڤایێ كوردستانێ، سەرەرای ئاستەنگی و زۆرییان، لێ بەلێ كەد و خەبات ب فیداكاری و ڕوحەكا هونەری بەردەوامە و دەولەتێن داگیركار ب هەمی هێز و شیانا خوەڤە ل دژی كەلتوور و هونەرا مە ڕادوەستن. خودانێن ئمتیازان و سەرنڤیسكارێن تەقلیدی، ژ كەرەما خوە مەیدانێ چوول بكەن و ڕێیێ بدەنە نفشێ ئەلفا و زێدێ! ژبەر كو، هەوە سەلماند كو هوین ب كێر كاری ناهێن و كەس ژی قەبێ هەوە ناخوازیت!
تەماشە بكن، ئەڤ كۆڤارە ب ناڤێ "فۆلكلۆرا مە" یە، ل باكوورێ وەلاتی ژ لایێ سازییا وەقفا مەزۆپۆتامیایێڤە دەردچیت. ژ مژاران هەتا دیزاینێ، وەها ڕێزێ ل خواندەڤانی دگرت و ب حوورمەت هەر تشتی پێشكێش دكەت. ژ خوە ژ ڕوییێ زمانی و ڕاستنڤیسینێڤە، خەباتەك مەدەنی و بێهەمپا دكەن. بۆ نموونە د كۆڤارێدا تو یێ خواندەڤان دوو پەیڤان نابینی كو ب دوو فۆرمێن جودا هاتبنەنڤیسین! و كۆڤارێن مە چاوانە! ئێك پەیڤ، نە ب تنێ ب فۆرمەكێ، لێ بەلێ ب دەهـ فۆرمان هاتینەنڤیسین و ئەڤە ژی خوەلیپسەرییە! نموونە پێدڤی ژی ل بەردەستێ مە هەنە و ئەم دێ ب نڤیسینەك دی ب ب بەلگەڤە هەر تشتی بەرچاڤ بكەین.
ئەز پێشنیار دكەم، كو ناڤەندێن ئەكادیمی و كەسێن پسپۆر خوە ل كۆڤاران بكەنە خودان و هەلسەنگاندنەكا گشتی و فڕەئالی بۆ كۆڤاران بكەن و ل گەل كەسێن كو پشتەڤانییا دەرئێخستنا ئەڤان كۆڤاران دكەن، كۆمبوونان ساز بكەن و هەلسەنگاندنێن خوە پێشكێش بكەن. داكو ئێدی كارێن بێسەروبەر و كەسێن تەقلیدی یێن كو ب تنێ ڕووپەلان دادگرن و پارەیێ مللەتی ب هەدەر ددەن، ژ ناڤ كاروبارێن ڕەوشەنبیری و هونەری دەربكەڤن و ل دویڤ پیڤ و بنەمایێن سەردەمیانە و ب گیانەكێ هونەری كار بهێتەكرن.
ـ ئەڤ نڤیسینە، وەكو هەستكرن ب بەرپرسیارییی ل بەرامبەر ب هەدەردانا پارەیێ مللەتی و دەرئێخستنا هندەك كۆڤارێن بێی ئاست هاتییەنڤیسین.