دیروک و ئێشان... ما دیروکێ ئێشان هەیە؟!!

فەرسەت عبدالرحمن
ئەرێ کەسانێن سەردەمێن کەڤن یان یێن نوی و سەردەم زاراڤێ "ئێشانا دیروکێ" دەرکریە؟؟؟ ئەرێ چێدبیت مرۆڤ پسیار بکەت، ما دیروکێ ئێشان هەیە؟؟؟
دەمێ زاراڤێ "ئێشانا دیروکێ" من دیتی، گەلەک پسیار د سەرێ مندا ئازرین و ئەز ل بەرسڤا گەریام و هەر مام دەست ڤالە... "ئێشان" ناڤەکێ گشتگیرە بۆ هەمی نەخوشیێن ب ئێش چ تاک بیت یان کو بیت، چ بۆ نێری بیت یان بۆ مێ، پاشگر و پێشگر هەبن یان نەبن ئەم دێ ڤێ چەندێ بۆ شارەزایێن زمانی هێلین... لێ یا خورست ئەوە کو ل دەمێ ئەم هەست ب ئێشانێ دکەین ل جهەکی ژ جەستەیێ مە وەکی زکئێشانێ، دێ بێژین "زکێ من یێ د ئێشیت" یان "ئێشان یاکەفتی د زکێ مندا، ئانکو بۆ وان جهێن هەست هەین...
لێ دیروک وەکی ئەم دزانین زاراڤەکە "کومەکا رویدان و بواران بخوڤە دگریت، ئەوێن تاکەک یان کومەلگەهەک تێدا دبوریت، و پەسەندا دیاردێن سروشتی و مرۆڤی دکەت و ژلایێ زمانی ڤە، نیشانێ ب دەمێ روودانا وێ دیاردێ ددەت و مەبەست و کارتێکرنێن رویدانێ دیار دکەت، ئانکو زانستەکە ڤەکولینێ ل دور دیاردە و رویدانێ بوری دکەت...
ل ڤێرێ مرۆڤ وەسان هزر دکەت کو "دیروک - ئێشان" دوو زاراڤن تێگەهێن وان ئێک و دوو ناگرن... ئەرێ لێکدانا وان دوو زاراڤان زوردایەک تێدا هەیە؟؟؟
بێ هزرکرن ئەم دا بەرسڤێ ل سەرڤێ پسیارێ دەین ب پوزەتیف، راستە ئەو باوەری مە یا هەی کو ئێشان ئەندامێن جەستەیێ مرۆڤی دگرن، چ سەر بیت یان زک یان دەست یان پشت یان...هتد. لێ ئێشانەکا دی یا هەی نەخوشیا وێ کێمتر نینە ژ ئێشانا ئەندامێن جەستەیێ مرۆڤی، ئەو ژی ئێشانا گیان و دەرونێ مرۆڤی یە. ئەو ئێشانە یا ژ ئەنجامێ ژ دەستدان و بێ هیڤیاتی و نەمانا باوەریێ پەیدا دبیت، ئەڤە ژی ئێشانەکا مەزن پەیدا دکەن و گەلەک یا بەربەلاف بوی د ژیانا مەدا. دبیت چارەسەریێن بەروەخت و تەناکەر ئێشێن جەستەیێ مرۆڤی کێمبکەن، لێ نەشێن ئێشانێن گیان و دەرونێ مرۆڤی کێم بکەن ئەو ئێشانێن دمینن دگەل مرۆڤی ب درێژیا تەمەنی...
من ژی زاراڤێ "ئێشانا دیروکێ" ل دەف خو پەسەند کر. بۆچی نە و مە دیروکەکا پڕ ژ نەهامەتی و شکەستن و بێ ڤیڤی بون و کومەلکوژی و داگیرکرن و خیانەت و کێمکرن و بێ رویمەتی و هەتا نامانا باوەریێ!!!
د ئەزمونێ دیروکی یێن گەلێ مە دا ژلایێ "ئێشانێن دیروکی" ڤە، د هندەک دەمێن کورت دا پیچەک یێن کێم بوین، لێ ژ نشکەکێ ڤە هندەک هەلویستا ئەو ئێش یێن ئازراندین ڤە و خرابتر و هەر وەکی ژ وی دەمی دەست پێ کر و نە ژ باب و باپیران ڤە دگەل مە دایە...
و دبیت ژی ژ ئەگەرا ڤێ چەندێ هندەک جارا دێ گوهـ ل زاراڤەکێ نوی بین ئەو ژی "تیمارکرنا ئێشێن کەڤن" ژ دەف وان کەسێ د هێنە نیاسین ب "خودانێن ناسنامێن بریندار"، کو دڤی بواریدا (نیلسون ماندیلا) نیشاندایە، زورینەیا رەش پیستان و ئازارێن وان ژ دەستێن سیستەمێ رەگەز پەرستی ل ئەفریقیا باشور دەمێ گوتی "ئەم لێبورینێ قەبیل دکەین لێ ئەم ژبیر ناکەین"...
ئەرێ پا ژبیرکرن دناف مللەتێ مە دا د چ ئاست دایە؟؟؟