ئەگەر تە مەبەست (کۆڤارا مەتین) بیت، ئەڤە بەرسڤا مە یە!

سەرنڤیسەرێ کۆڤارا مەتین
بەرسڤەک بۆ گۆتارا کاک (دلێر کەمال)، یا ب ناڤێ (پەیامەک بۆ لایەنێن پشتەڤانییا دەرئێخستنا كۆڤاران دكەن)، ئەوا ل رۆژا ١٩ی گولانا ٢٠٢٣ێ ل مالپەڕا (روانگە و رەخنە) دا بەڵاڤبوویی.
هەر چەندە ب رەنگەکێ ئاشکەرا و ئێکسەر نڤیسەری ناڤێ (کۆڤارا مەتین) نەئینایە، لێ چونکی هندەک ئاماژە و دەستەواژە د گۆتارێ دا هەنە، ئەم دبینین، سۆر و سۆر بەحسی (مەتین)ێ یە. لەوڕا ئەگەر بەرێز نڤیسەرێ گۆتارێ، بەحسی (کۆڤارا مەتین) بیت، ئەم باش دبینین، کو ب ڤان خالێن خوارێ بەرسڤەکێ بۆ نڤیسەرێ گۆتارا ناڤبری بدەین، (دی دوبارە کەین، ئەگەر وی مەبەست - کۆڤارا مەتین - بیت)!:
سەبارەت ب رستەیا "هەتا كەنگی دێ وێنەیێن سیاسییان ل سەر بەرگێن كۆڤارێن خوە دانن". مە ل هەژمارا (٢٣٣) وێنەیێ بابێ روحی یێ نەتەوەیا کورد  بارزانیێ نەمر و ل هەژمارا (٢٣٥) وێنەیێ جەنابێ سەرۆک بارزانی دانایە؛ لەوڕا دبینین د گۆتارێ دا ئاماژەیێن سۆر و سۆر بۆ (مەتین)ێ هەنە. بەلێ د هەژمارا (٢٣٤)شێ دا مە وێنەیێ میقداد جەلادەت بەدرخان دانایە، چونکی هەیڤا نیسانێ بۆ رۆژنامەڤانییا  کوردی یا گرنگە، یانکو هەر وێنەیەک ل گۆری پێدڤیبوونێ بوویە و نە ژ بۆ خۆ شرینکرن و (تملق)ێ یە. هەمی سەرکردە و رێبەرێن مە ل جهێ رێزێ نە و ئەم شەهنازیێ ب وان و خەباتا وان دکەین، کو ئەڤ سەرفیرازییا ئەڤرۆ ئەم و نڤیسەرێ هێژا تێدا دژین ژ کەد و قوربانییا شەهید و خەباتا وان سەرکردە و پێشمەرگەیانە و ئەڤ سەرکردەیە، هێما و سیمبۆلێن گەلێ مەنە.
مەتین کۆڤارەکا رەوشەنبیری گشتی یا هەیڤانەیە، ژ لایێ ناڤەندا خانی یا رەوشەنبیری و راگەهاندنێ، کو سەر ب بەشی رەوشەنبیری و راگەهاندنا پارتی دیموکراتی کوردستانڤەیە، دەردکەڤین. نە یا بەر عاقلە ئەڤ کۆڤارە د خزمەتا رێبازا سیمبۆل و هێمایێن خۆ دا نەبیت.
سەبارەت ب دەستەواژەیا نڤیسەری "پارەیێ مللەتی ب هەدەر ددەن"، ئەرێ وەشانا کۆڤارەکا رەوشەنبیری - گشتی یا هەیڤانە و  بەڵاڤکرنا بابەت و ڤەکۆلینێن نڤیسەران بێی هیچ جوداهییەکا هزری و حزبایەتی، هەدەردانا پارەیە؟ یان خزمەتکرنا بیاڤێ رەوشەنبیری یە؟!
نڤیسەرێ هێژا، کو کەسەکێ ئەکادیمی یە ژی، مخابن هێشتا جوداهیێ د ناڤبەرا جۆرێن کۆڤاران دا ناکەت.. ئەو کۆڤارا کرییە نموونە (فۆلكلۆرا مە)، ل گەل رێزێن مە بۆ وێ کۆڤارا هێژا، پەیام و ناڤەرۆکا وێ گەلەک جودایە هەمبەر پەیام و ناڤەڕۆکا کۆڤارا مەتین. بۆ زانین، هەر کۆڤارەکێ پەیاما خۆ یا جودا هەیە ل گۆری پۆلینکرنان.
سەبارەت ب دەستەواژەیا نڤیسەری "دویڤچوونا پارەیێ مللەتی بكەن و بزانن ب پارەیێ مللەتی چ جۆرە كۆڤار دەردچن"، نزانین نڤیسەرێ هێژا چ بەڵگە و گرۆڤ ل بەردەست هەنە، کو داخوازا دویڤچوونێ بکەت. ئەرێ (کۆڤارا مەتین)، پارەیێ پاداشتێ نڤیسەرەکی یان یێ چاپکرنێ خواری یە؟ دیسان مە دڤێت بزانین، مەرەما وی چ جۆرە کۆڤارەکە؟ و تە چ بەلگە هەنە، کو ئەڤ پارە ژ وەبەرهینانا حزبی نینە؟
سەبارەت فۆرم و رێنڤیسێ، ئەڤە ئاریشەیەکا کەڤنە و مخابن هێشتا دو نڤیسەرێن مە ل سەر ئێک رێنڤیس دکۆک نینە. هەرچەندە ئەم هەمی بزاڤان دکەین، کو رێنڤیسەکا ئێکگرتی پەیڕەو بکەین، بەلێ نڤیسەر هەنە رێنڤیسا خۆ ب یا کەسی دی نادەن و رەنگە ئەو رێنڤسا تو ژی پێ دنڤیسی هندەکێن دی هەبن رەخنێ لێ دگرن! لێ ژبەرکو رێنڤیسا کۆڤارا (فۆلكلۆرا مە) لاتینی یە، تا رادەیەکێ ئێکگرتنەک بەرپابوویە. ژ بیر نەکە ژی، کو د گۆتارا تە دا ژی شاشیێن رێنڤیسینێ هەنە!
نڤیسەرێ هێژا، هندەک پەیڤ و رستە بکارئیناینە، ب دیتنا مە، نە ژ هەژی مامۆستایەکێ زانکۆیێ نە. ئەرێ پەیڤێن "تامساری"، رستەیا "ئەرێ هوین ژ دیزاینێن خوە یێن بێڕوح ژی تێرنەبووینە؟"، رستەیا "هوین ب ڕوح و ڕەهەندەكێ هونەری و ڕێكخستی كارێ خوە ناكەن"، رستەیا "ڕێیێ بدەنە نفشێ ئەلفا و زێدێ!" و رستەیا "هوین ب كێر كاری ناهێن و كەس ژی قەبێ هەوە ناخوازیت!".
 نزانین، ب چ حەق تو ڤان پەیڤێن نە ژ هەژی دبێژی، ئەگەر ژ ناخ و دلەکی کەربگرتی دەرنەکەڤن و ل سەر وی ب خۆ پراکتیزە نەبن؟!!