پیڤەرێن خەلاتکرنێ چنە و کێ ماف هەیە خەلاتا پێشکێشبکەت و کێ مافێ وەرگرتنا حەلاتا هەیە؟

فەھمی بالایی
خەلاتکرن گرێدای هندەک پیڤەرێن ڕێزگرتنێ یە بەرامبەر وان کەسا یێن خزمەت و بەرهەمێن وان بووینە سومبۆل و موهرا خوە ل دیرۆکێ دای. بۆ وان کەسانە یێن ب درێژیا دیرۆکێ بۆ گەل و نیشتیمانی د هەموو بیاڤێن ژیانێ دا بێی راوەستان کارکری و هەست ب بێهیڤی و وەستیانێ نەکری، بۆ وان کەسایە یێن دناڤا باژێر، جڤاک و خەلکێ خوەدا دهێنە ناسکرن و خودان ڕابردویەکێ پاقژبن، بۆ وان کەسا یێن داهێنان د بیاڤەکێ ژیانێ دا کری.
 مخابن خەلاتکرن ژی ل کوردستانا باشور ژ پیڤەرێن خوەیێن زانستی و دادوەری دەربازی لیستا گەندەلیێ بوویە. لژنێن خەلاتا پێشنیاردکەن دڤێت دبێلایەن بن و شارەزا و پسپور بن، نە پیڤەرێ وان حزباتی، مرۆڤکانێ و مەلاقی بیت. کەسێن کو خودان خزمەت و شوینتلێن وان ل باژار و ناڤا گەلدا ددیار، خودانێن دیرۆکەکا تژی بەرهەم و کەسایەتیێن دلسۆز و ئافرێنەر دهێنە ژبیرکرن، کەسێن دو پەیڤ ب کوردی نەنڤێسای و مێهڤانێن دەمکی و ئێک بەرهەمێ هونەری نەبیت ب چ پیڤەر دکەڤیتە پێشیا وان کەسێن ژیانا خوە پێشکێشی گەل و نیشتیمانی کری؟ لێ خەلاتکرن و خەلات بخوە ژی گەلەک و گەلەک بێ بهابوویە. لەوما چافلێکرنەکا نە ل ئاست و دانا حەلانەکێ بەری، یان پارچەکا شیشەی  و ژ لایێ هندەک کەسێن پسپوریا وان ل سەر ئاستێ پەیوەندیێن کەسوکی و بەرژەوەندیا بهێنە دەستنیشانکرن. ئێدی پەیڤا خەلاتکرن ل هەرێما کوردستانێ بوویە جهێ پێکەنینێ و بێ بهاکرنا هونەر و ئافراندنێ ژ هەموو لایانڤە.
 ئەز دبێژمە بەرپرس و سازیێن پەیوەندیدار، بهایێ خەلات و کەسێن ژ هەژی بێ بهانەکەن. ئەگەر تشتەک کارێ هەوە نەبیت باشترە مایێ خوە تێنەکەن و ژێ دویربکەڤن. بهێلن ئافرێنەرێن مە دئارام بن و دەرونێ وان و وژدانا وان هەر پاقژ بمینیت. داهێنان ل سەر دەستێ تاکە کەسان دهێتە ئافراندن و ئەون دیرۆکێ دنڤێسن. نە ب دانا خەلاتێن هەوە و نە ب پەسنا هەوە مەزننابن و نابنە ئافرێنەر. بێدەنگیا سازیێن هونەری و ڕەوشەنبیری بەشەکێ مەزنن ژڤێ خەمساریێ و ژڤێ بێدەنگیێ.ل داویێ دێ بێژم:  وە خەلاتێن خوە پیرۆز بن یێن بهایێ خەلاتی نەزانن و یێن نەزانن دانا خەلاتا هەلبژێرن.