مین ھەر مینە! چ یێن حكومەتا فیدرالی بن یان یێن حكومەتا ھەرێمێ

عبدالرحمن بامەرنی
ژبەركو ئەز دێ بابەتێ كامیرا ترافیكێ ب حكومەتا فیدرال ڤەگرێدەم، رەنگە ئەڤێن دخوینن زێدەتر ھەست ب مەترسیێن داھاتی ژی بكەن، كو گەلەك جاران من ئاماژە بۆ دایێ، كو گەلەك مینێن چاندی لبن پێن قەوارەیێ ھەرێمێ ھێشتا د ڤەدایینە! بوچی كامیرە و بوچی حكومەتا فیدرال؟! دھی دادگەھا پاریسێ حكومەتا ھەرێما كوردستانێ سنگەپێكر و نەچار كر كو رێكەفتنێ دگەل حكومەتا بەغدا ئیمزا بكەت، پێنەڤێت لدویڤ مەرجێن حكومەتا بەغدا و ئەڤرو ژی لیژنا دارایی ل پەرلەمانێ عیراقێ فلاشەك ل ناڤ چاڤێن حكومەتا ھەرێما كوردستانێ دا و ئەڤە ھەمی ژی ژبەركو، حكومەتا ھەرێما كوردستانێ كار ژبۆ راكرنا ڤان مینان نەكریە و خەمساری دگەلەك دەرفەتاندا كرییە!!
ھەمان تشت ئەڤرو ل ھاتنەڤەیێ، كامیرەیەكا ڤەشارتی فلاشەك بۆ ترومبێلا ل بەر سینگا من لێدا، ئەرێ وەك پرسیار، ئەگەر راپرسیەكا سەر پێ ژی وەربگرین، چەند ژ ترومبێلێن پارێزگەھێ، نویكرنا سەنەوەیێ ب سەر ڤە چوویە؟ چەندان تابلویێن ترومبێلێن خوە نوینەكرینە؟ چەندان سەرەدانا كاشێ نەكریە و چەندا و چەندا و چەندا و ئەگەر سزایێ كامیرێ ژێ بینیە دەرێ ژی، رەنگە ھەر كەسێ بڤێت سەنەوییا ترۆمبێلا خوە نوی بكەت، پارێ سزایێ گیروكرنێ بۆ ھەر سالەكێ كا چەندە و پارێ ژینگەھێ و جاددێ و تابلو و كاشێ و نزانم چ و چ، باوەردكەم ب ملیون دیناران ژێ دەرناكەڤیت!!
 ئەرێ كی ژڤێ چەندێ بەرپرسە؟ كو ئەڤە ھەمی بكەڤنە سەرئێك؟ ئەز بخوە نزانم، لێ ئەز دزانم بێ سەروبەری و ئالوزیەك درێڤەبرنێدا یا ھەی، ھەمی پێكڤە گرێدایی بن یان نە؟ لێ یا ئەز دزانم چاوان حكومەتا فیدرال ب نەچاری حكومەتا ھەرێما كوردستانێ ئێخستە بن باری، ئھا ھوسا ئەم شوفێر ژی دێ كەڤینە بن بارێ رێڤەبەرییا ھاتن و چوونێ.