پاشکەفت.. غەدر.. قەرەبوکرن

تێلێ ئەمین عەلی
براستی حکمەتا فدرالا عیراقێ، بەرپرسە ژ ڤەگەراندن و مەزاختنا باشکەفت و لێبرین و نەدانا مەعاشێ فەرمانبەر و خانەنشینا لکوردستانێ، چونکە برینا پارێ مەعاشا کارەکێ نە قانونی و نە دستوری بو، فەرمانبەر و خانەنشین لکوردستانێ نە بەرپرسن ژ ناکوکیێت  سیاسی و ئابوری و بکارهینانا جەوانیا دەسەلاتێ ژلایێ حکمەتا فدرال و حکمەتا کوردستانێ ڤە، دێ گرین حکمەتا کوردستانێ بفروتنا گازێ سەرپێجیا دستورا عراقێ یا کری، ئەڤە مافی نادەتە دەسەلاتا بەغدا مەعاشیت خەلکێ کوردستانێ ببریت و دەستەسەر و موسادەرە بکەت. حکمەتا کوردستانێ بەشەکە ژ حکمەتا فدرال. ژبو نمونە، وەختێ حکمەتا کوردستانێ سەرپێجیەکێ بکەت، حکمەتا فدرال رێکێت قانونی و دستوری هەنە بگرتە بەر، نابیت بهیچ رەنگەکی دەست دەتە تولڤەکرنێ دژی خەلکێ کوردستانێ و رەفتار و ئیجرائاتێت عەشاییری و کولانکی،
فەر دبینم فەرمابەرێت و خانشینێت کوردستانێ یێت زولم لێ هاتی یە کرن و دەستور هاتی یە بن پێ کرن، برێکا هندەک نوینەرا لدەف دادگەها بلندا فدرالێ و کومەلێت نیف دەولەتی ێت مافێت مروڤا شکایەتا بکەن دژی سەرپێجی و غەدرا  حکمەتا فدرال، ئەز باوەردکەم بڤێ ریکێ دێ مافێ وان هێتە فەگەراندن، لێ دڤێت حکمەتا کوردستانێ ژی پشتەڤان بیت و دویفچونا بابەتی بکەت دهەمی دان و ستاندنێت خودا دگەل حکمەتا فدرال و بکەتە مەرجەکێ پێکهینانا حکمەتا و هەڤپەیمانیا دگەل لایەنێت سیاسی ێت شیعە و سونه. ژبو ڤەگەراندنا مافێ ڤی خەلکی و سزادانا بەرپرسێت برینا بودجێ هەریمێ و قویتێ فەرمانبەر و خانەنشینا کو پرانیا وان فرمانبەر بون پێشی حکمەتا هەرێمێ بێتە دامەزراندن.
پسیار ئەوە، ئەرێ لدوی چ بەندا قانونی و دەستوری، سەروک وەزیرێت پێش لعیراقێ مەعاشیت فەرمانبەر و خانەنشینێت کوردستانێ بری و موسادەرەکر ؟ مە گوت (مە گرتی) حکمەتا کوردستانێ ئەرکێت خو بەرامبەر حکمەتا فدرال بجه نە ئیناینە، ئەرێ بوچی حکمەتا فدرال بئاوایەکێ ئاسایێ سەرەدەری دکەل حکمەتا کوردستانێ دکر ؟ ئەگەر بەرپرسێت حکمەتا فدرال دراست گو بان، بوچێ ئیجرائاتێت قانونێ نە وەردگرتن ؟ بو چی لچهێ وان ئیجرائاتا فەرمانبەر سزا دان ؟ ئەرێ گوننەها وەلاتیێ کوردێ عیراقی خو جهێ کوردستانێ چی یە ؟
ژلایەکێ دیتر، راستە حکمەتا فدرال غەدرا لخەلکێ کوردستانێ کری، بەلێ دهەمی حالەتادا حکمەتا هەرێمێ بەرپرسە ژچارەسەرکرنا کێش و داخازی و پێدڤیێت خەلکێ خو، هەر دەلیڤا هەبیت و پارە لبەر دەست بن، دڤێت بهەر رەنگێ هەبێت قەرەبویا ڤێ غەدرێ بکەت هەتا ئەگەر دەسەلاتا بەغدا خو بێ بەریکر.