گازیا ل دویف گورگی یە!

نایف مەحمود
چەندین سالە کێشە و قەیران د بەردەوامن و بوینە سەرئێشە بۆ خەلکێ کوردستانێ، ب ڕاستی ژی خەلکێ کوردستانێ و چینا موچەخۆر و فەرمانبەران ژ ڤی سەروبەری د بێزارن و توشی تەنگەنەفەسی و تێکچوونا بارێ دەرونی بوینە. بارودوخێن وەها دهێنە پێش و ئەڤ کاودانێن سەختێن خەلک دناڤڕا دەربازدبیت سەدان پسیاران د سەرێ خەلکیدا چێدکەت و د غولغولینیت! ئایا ئەڤ وەڵاتێ ژێر عەردو سەرعەرد هوسا یێ بێ زاخ و هیچ سەروەت دناڤدا نینە تا گەهەشتیە ڤی ڕاددەی، کوردستان بگەهیتە حالێ لاڤەلاڤێ ژ بەغدا؟ چ وەکر هەتا ژێرخانا مەیا ئابوری یا بهێز و دەولەمەند نەبیت تاکو بشێین بەرگێ هندەک قەیران و کریزێن ئابوری بگرین؟ ئو گەلەک پرسێن دی....
هەلبەت ئەم یێ دبینین کورد چەند د پەرتەوازە و ژ هەڤ دوورن ژبوی بەرژەوەندیا گشتی! هەر پەزو پێپکا خۆ، هەر لایەنەک ئاوازەکێ دژەنیت و دخازیت دربێ خو ل یێ دی بدەت و بشکێنیت، هەرکەسەکی دڤێت شەیێ خۆ دسەرێ یێ دی ڕا بشکێنیت! مخابن کو گەهایە ڤێ چەندێ خەلک ببیتە قوربانی بەرژەوندیێن حزبی و بنەمالەیی و کەسوکی، مخابن گەهایێ وێ یێ کێ یێ ژدل و جان خەبات و تێکوشان پێشکێشی دۆزا گەلێ خۆ کری و ئەڤرو خوها پەشێمانیێ ژ خۆ ڤەدمالیت! هەوار و شیرەتێن خەلکەکێ دلسوز گەهانە پەرێن ئاسمانا بو سەرکردێن گەلێ کورد ژبو یەکبون و ئێک قولپیا لایەنێن کوردستانی بەرامبەر لایەنێن دەرەکی و ب تایبەت ب غدا، بەلێ زۆر مخابن ل ئەردی هەچەکو کەسێ گولێ نینە و گازیا لدیف گورگیە و پەز برو ڕەڤاندو چو هندی گازیکەیێ فایدە ناکەت!؟
لەوما ئەوا مەچاندی مە هلاند ژی، ئەڤا دهێتە سەرێ مە بەرهەمێ بێ دادی و گەندەلی و نە ئێک رێزیا لایەنێن سیاسیە و هەر ئێک بۆ خۆ ئو بەرژەوەندیێن خۆ بلا خەلک ژی دناڤ خۆها قەیران و بێ موچەیی و کریزێن ئابوری دا بژیت و تالیا کوردستانێ ژی کا دێ بەرەف کیش ئاقار ڤە چیت!