بكوژەكان كێن؟

19/04/2021

سنور ساڵح
بەڵێ بكوژی زەهرا دایك و باوكی بوون نەوەك هاوسەرەكەی.
لەڕووداوی كوشتن و خۆكوژیدا گرنگترین ڕەهەند كە پێویستە هەڵوەستەی لەسەر بكرێت،  هــۆكارە.
زەهراو بكوژی زەهرا هەردوكیان قوربانین، قوربانی سەقەتیی پەروەردەی خێزانین، زەهرا بەرلەوەی فیشەك بەر لاشەی بكەوێت و بەرلەوەی فیزیكیەن بكوژرێت، لەلایەن خێزانەكەیەوە بەشێوەی واتایی كوژرابوو، بەوەی ناچار كراوە یاخود ڕێگەی پێدراوە لە تەمەنی (١٢) دوانزە ساڵیدا شو بكات !
هاوسەرەكەشی بەهەمان شێوە وا گۆش كراوە كە ژن وەك موڵك سەیر بكات و خۆی بەخاوەنی بزانێت، بۆیە ئەویش قوربانی پەروەردەی نادروستی خێزانەكەیەتی. 

كاتێك ئارەزووی دوو منداڵ (گەنجی ناكامڵ) زەمینەسازیان بۆ دەكرێت و لەلایەن كەس و كاریانەوە هان دەدەرێن تا هاوسەرگیری بكەن لەتەمەنێكی ئاوا بچوكدا، لەو بەروارەوە هەموان (دایك، باوك، مامۆستای ئاینی، شاهیدی ئامادەبوو لەپڕۆسەی هاوسەرگیریەكەدا.....) دەبن بە بكوژی مەعنەوی منداڵەكانیان. 
بۆیە بكوژی زەهرا دایك و باوكی بوون نەوەك هاوسەرەكەی. 
هەموو ئەوانەشی كە هۆكار بوون لەڕوودانی ئەم كارەساتە لەماڵەوە ئیسراحەت پاڵدەكەون و درێژە بەژیان و پەروەردەی سەقەتی منداڵەكانیان دەدەن، بەبێ ئەوەی سزابدرێن زۆرجار بۆشیان دەكەوینە گریان لەكاتێكدا تاوانباری سەرەكی ئەم دایك و باوكەن جا دەور و بەر و كۆمەڵگە.

بۆیە پێویستە یاسا سزاییەكان هەموار بكرێنەوە و بەجۆرێك دابڕێژرێن هەموو داب و نەریتە باوە ناشازەكان پوچەڵ بكەنەوە و لەسەرەتاوە ڕێگە لە ڕوودانی ئەم جۆرە كارەساتانە بگرن، چونكە زەهراكان زۆرن لە هەرچەند كوچەیەكدا بەدەیان زەهرا هەن.

ئەوەی زۆر مایەی پێكەنینە، هەڵوێستە ساختە و درۆینەكەی دەسەڵاتە، گوایە بەجددی هەڵوەستە لەسەر سزادانی بكەری ئەو تاوانانە دەكەن، لەكاتێكدا خۆیان بەرهەمهێنەری ژنكوژەكان و تۆخكەرەوەی كلتوری ژن كوشتنن.
سەرەڕای هەموو ئەوانە كەس نازانێ شازادە خەوتوەكانی ناو كۆشك و تەلارەكانیان كێن و چكارەن؟ كەدەبوو ڕۆڵی خانمی یەكەمی هەرێمی هەبێ و قەڵغان و پشتیوانی ژنانبێت لەو هەرێمە پڕ لەژنكوژەدا.

باسی ڕێكخراوی ژنان هەرناكەم  كە مانگانە موچە و بودجەیەكی زەبەلاح وەردەگرن بێ ئەوەی تا ئێستا توانیبێتیان كاریگەری لەسەر ئەقڵی هیچ دایك و باوكێك یان ژن و مێردێك و كچ و كوڕێك دروست بكەن، هەر لەسەر قوتی هەموو ئەوژنانەی ڕۆژانە دەكوژرێن خەریكی ژیانی پڕكەیف و سەفای خۆیانن و نوقەیان لێوەنایەت، مەگەر بەسازی ئەوان بێنە سەما بۆ سەرقاڵكردنی خەڵك و لەبەرژەوەندی خۆیان و دەسەڵاتداران.