كورد و دێوەزمەی چەك و مایك ی راگەیاندن

20/04/2021

قادر حسێن
لەمڕۆدا هیچ شتێك هێندەی (چەك) و (مایك) مەترسی نین لەسەر كۆمەڵگەی كوردی بە ڤایرۆسی كۆرۆناشەوە، (چەك) ئەمڕۆ بووە بە بەڵایەكی قورس بە گەردنی خەڵكەوە و هەندێكجار بۆ یەكلاكردنەوەی بچوكترین كێشە پەنای بۆ دەبرێت، هەر لە كێشەی زەوی و زار و پوش و پاوەنەوە تا كێشەی كۆڵان و شەڕەگەڕەك و دەمەبۆڵەی دراوسێ و كێشە لەسەر منداڵ و سەیارە و قەرزو و قۆڵە و كێشەی خێزانیی نێوان ژن و مێرد و كوڕ و باوك، ئەوەی مایەی نیگەرانی زیاترە ئەوەیە هەندێك جار قوربانییەكان دورو نزیك پەیوەندیان بە كێشەكانەوە نەبووە و كەسانێكی ڕاگوزەر یان ناوبژیكەر بوون، هەر بۆیە هۆكاری هەڵكشانی بەكارهێنانی چەك لە كێشەكاندا هەرچییەك بێت ناكرێت سوك و سانا سەیر بكرێت و ئاسایی وەربگیرێت.

لە كێشەی (چەك) قورستر لەمڕۆدا ئەوەیە كە هەر بەرپرس و پارەدار و خاوەن كۆمپانیایەك هەڵدەسێت كەناڵێكی تەلەفزێۆنی یان كەناڵێك لە سۆشیاڵ میدیا زەق دەكاتەوە و (مایك) دەداتە دەست كۆمەڵێك كوڕ و كچی لاوی بێكار و بەدبەخت و بۆ مەرامی تایبەتی خۆی بەریان دەداتە جەستەی شەكەتی كۆمەڵگەی كوردی (گەرچی ئەم دیاردەیە خۆی لە خۆیدا دیاردەیەكی جیهانییە).
تا ئەو شوێنەی ئەو كەناڵانە هەواڵی بابەتی و پێویست بڵاو دەكەنەوە دەكرێت دەستخۆشییان لێ بكرێت و بەچاوی ڕێزەوە سەیر بكرێن، بەڵام ئەوەی بەدی دەكرێت لە ئێستادا بەشێكی زۆری ئەو كەناڵانە سنوری كار و پیشەی خۆیان دەبەزێنن و دەچنە سنور و مەرزێكەوە دور و نزیك ناكرێت ڕاگەیاندن بەو شێوەیە توخنیان بكەوێت، ئاخر كابرا ماڵی وێران بووە كوڕ یان كچ، ژن یان مێرد و هەندێك جار زیاد لە كەسێكی بە هەر هۆیەك بێت تیاچوە و قوڕ كراوە بەسەریدا و هێشتا جەستەی مردوەكەی سارد نەبۆتەوە و خوێن لەسەر و پێی دەتكێت و كفن و دفن نەكراوە و شین و شەپۆڕێتی و تاساوە و لە خەمی مردوەكەیدا نەك قسە بەڵكو بە هەزارحاڵ هەناسەی پێدەدرێت، كەچی بابای (مایك) بەدەست لە بن لوتیدا حازرە و داوای ئەوەی لێ دەكات كە باسی خوالێخۆشبوی بۆ بكات و هۆكاری مردن و كوشتنەكەی بگێڕێتەوە.

هەر بەوەشەوە ناوەستێت بەخۆی و (مایك) و كامێرایەوە وەك ئەوەی لە ماڵی باوكیدا بێت بەرە و ناو ژنەكان دەكەوێتە ڕێ و دیمەنی گریان و لە خۆدانیان ڕاستەوخۆ و ناڕاستەوخۆ دەگوێزێتەوە ماڵی هەمومان، پاشتر دەچێتە سەرقەبران و كامێرا و (مایك) تا گۆڕیچە و بەردی ئەلحەد شۆڕ دەكاتەوە، هەندێكیتریان پێش پۆلیس و لێكۆڵەر (محقق) دەگەنە ماڵی كارەستبارێكی تر و لێی دەپرسن كە كوڕەكەی یان كچ و ژنەكەی بۆچی خۆی سوتاندوە و خۆی كوشتوە لە كاتێكدا كە هێشتا ئاگر بە جەستەیەوەیەتی یاخود لە پانكە و سەقفەكە نەكراوەتەوە، گەر هەر وەڵامیشیان دەست نەكەوت بە ئارەزووی خۆیان و بەبێ گوێدانە شكۆی كەس و خێزانەكانیان هۆكاری بۆ دادەتاشن و بانگەشەی ئەوە دەكەن یەكەم كەناڵن هۆكارەكانیان ئاشكرا كردوە.

 لەمانەش خراپتر هەندێك لەو مایك و كەناڵانە زوڕنای هەندێك بەرپرس و دەسەڵاتداری ئەم حیزب و ئەو حیزبن و خەریكی سوككردنی یەكتری و سەرقاڵكردنی خەڵكن بە بابەتگەلێكی كۆن و نوێوە كە هی ئەوە نین لە ڕاگەیاندن باسبكرێن و پیشان بدرێن.

 ترسناكی چەك و مایك لەوەدایە كە هەریەكەیان بۆتە تەواوكەری ئەویتریان بۆ ماڵ كاولكردنی خەڵك و دووهەمیان(مایك) خەریكی بازاڕگەرمییە بۆ ئەویتریان (چەك)، ئەوەی بۆی هەیە قوڕەكەش خەستتر بكاتەوە ئەوەیە كە بەرەو هەڵبژاردن دەڕۆین و ئەگەر هەیە هەریەك لەو دوانە بێ ڕەحمانە و نابەرپرسانەتر لە چەند مانگی داهاتودا بەكاربهێنرێن (هیوادارم من بە هەڵەدا چوبێتم و ئەمە ڕوو نەدات).

من نامەوێت لەوە زیاتر لەسەری بڕۆم، ئەوندە دەڵێم گەر بەكارهێنانی (چەك) و (مایك) بەو شێوەیەی ئێستا بەردەوام بێت ئەگەر هەیە كۆمەڵگە پڕ بكەن لە ‌كێشەگەلی سیاسی و كۆمەڵایەتی و تەنانەت فەرهەنگی وا كە بە زیان بۆسەر هەموومان بشكێتەوە.