هەژاری هەرگیز نابێتە هۆی خۆكوشتن، بەڵكو بێهیوایی هۆكارە

20/04/2021

شنیار ئەنوەر
كاتێك بیستم كیژان ئەو كچە نۆزدە ساڵە خۆی خنكاندوە، بۆ ساتێك هەستم كرد تەواوی ئێسقانەكانی گیانم ورد دەبن!
 
من ئەزمونی چەندین ساڵ كاری توێژەری كۆمەڵایەتی و كاری رێكخراوەییم هەیە، ئەزانم تاكەكانی ئەم كۆمەڵگەیە بەردەوام لە ژێر فشاردان بە كور و بە كچەوە بەڵام چونكە كچان كەمترین دەرفەتییان هەیە فشارەكانی سەریان زیاترە و ئەگەر هۆشیارییان نەبێت ئەوا بە زویی كۆتایی بەژیانی خۆیان ئەهێنن.

بێ هیوابوون و نەدۆزینەوەی رێگای رزگاری پەیوەندی بە هەژاری و بێ پارەییەوە نییە، بەڵكو خۆكوشتن لوتكەی نەمانی هیوایە، كە بەداخەوە نە خێزانەكان و نە قوتابخانەكان و نە میدیا كار لەسەر دروستكردنی هۆشیاری و بنیاتنانی تاكی بەهێز ناكەن، بەڵكو هەموان بێ هیوایی بڵاو دەكەنەوە و ئیرادەی مرۆڤی ئێمە دەشكێنن.

 ئەم خۆكوشتنانە بەرهەمی پەروەردەی خێزان و كۆمەڵگەن كە مرۆڤ توشی بێهیوایی و ئیرادەشكان دەكەن، لە بری خۆشویستنی ژیان و كۆڵنەدان فێرییان دەكەن بە دۆخی خۆیان رازی بن و وەك قیسمەت و ویستی خودا ئەو ژیانە گولە مەرگییە و سوكایەتییە قبوڵ بكەن، لە بری ئەوەی پشتیبگرن و یارمەتیبدەن ژیانێكی نوێ تاقیبكاتەوە

بیستم كە هاوسەرەكەی ڕۆژێك بەر لەئاهەنگی گواستنەوە لێیداوە. دوای پێنج مانگ لەهاوسەرگیری بەهەمان شێوە. 
بۆ ساتێك بیرمكردوە بۆچی دەنگی هەڵنەبڕی پێشئەوەی دەستی بچێتە خۆی؟ بۆ داوای هاوكاری نەكرد؟ یان هاواری كردوەو كەس پشتگیری نەكردوە! یان جارێكی تر لەبەر لۆمەو عەیبەی كۆمەڵایەتی كەس نەبو پشتگیری بكات تا كۆتای بەو هاوسەرگیریە بێنێت. ئاخر قورسترین ونالەبارترین شتە كەرامەت شكاندنە. بەڵام بۆ لەبری بیركردنەوە لە خۆكوشتن ڕوبەری زەحمەتیەكان نابنەوە؟

لەماوەی زیاتر هەشت ساڵ كاركردنم هەم وەك توێژەری كۆمەڵایەتی و هەمیش كاركردن لەپرسی ژندا، یەك شت كە هەمو كات بەو ژنانەم ئەوتەوە كەڕوبەری توندوتیژی ئەبونەوە لەلایەن هاوسەرەكانیانەوە ئەمەبو ئەگەر یەكەم جار هاوسەرەكەت دەستی لێبەرزكردیتەوە ئەوا چاوەڕێ بكە ئەو یەكجارە ببێتە دەیان جاری تر. ئەگەر هەمو دكتۆرو محامی و توێژەر هەوڵبەن ئەمە چارەسەبكەن ناتوان ئەگەر بێتو خۆت نەڵێیت STOP بەسە. 

چیرۆكی كچێكی ترم لەیاد ناچێت هاتەلام و وتی: “هاوسەرەكەم و خەسوم زۆریان بۆهێنام پێم وتن كە “ خۆم ئەسوتێنم” بەڵام باوەڕیان پێنەكردم”
 “پێیان وتم بیكە”. ئەویش وتی بەڵێ گڕم لەخۆم بەردا، ڕاستە نەمردم بەڵام ئێستا تێگەیشتم كە هەڵەبوم لەبری ئەوە دەبو ڕوبەروریان بومایەتەوە.

روبەروبوەوە پێویستی بە هۆشیاری و هیوای یە، چونكە دوژمنەكانی ژیان و ژن لەكۆمەڵگەی ئێمە دا بەهێزن، دەبێت تاكەكانی ئێمەش بە جۆرە چەكێك روبەرویان ببنەوە كە ئەستەم بێت راگرتنی، چەكی هۆشیاری و هیوا كە لە سایەی تەكنەلۆژیان لە ماڵەكانی خۆتانەوە ئەتوانن دەستان بە دونیا بگات.