بكوژەكان پیاوی خۆتانن.!

2 رۆژ پێش ئێستا

گەرمیان خالید گڕاوی
كوشتن یەكێكە لە كارە هەرە قێزەوەن و قورسەكان، كاتێك مرۆڤ بەقوڵی بیری لێدەكاتەوە.
بە شێوەیەكی گشتی هیچ وڵات و كۆمەڵگایەك بێ بەش نیە لە حاڵەتەكانی كوشتن، كە بە سەدان جۆر و شێوەی جیاواز ئەنجام دەدرێت.

ڕۆژانەش بەچاوی خۆمان دەبینین چی دەگوزەرێ لەم هەرێمە، ئەوەی مایەی ترس و هەڵوەستە لەسەر كردنە، كوشتن بۆتە دیاردەیەكی رۆتینی. دیارە هەرێمی كوردستان ووردە ووردە دەیەوێ هەنگاو بنێ بۆ گەیشتن بە وڵاتێكی وەك (باشوری ئەفریقا) كەكوشتن بۆتە دیاردەی رۆژانەی، بەڵام بەرواردی ژمارەی دانیشتوان، هەر نزیكی پەنجا ملیۆنێلێك جیاوازی هەیە.!
واتا هەرێمی كوردستان (5) ملیۆن كەسە، دەیەوێ پێشبركێ ئەفریقیای باشور بكات لە كوشتن كە دانیشتوانی (54) ملیۆن كەسە.!

- ئایا ئەو هۆكارانە چین وادەكات كە هەرێمی كوردستان لەم پێشبركێی كوشتنە بێ؟
- كێن ئەوانەی ڕێگا خۆشكەرن؟
- یاسا و دادگاكان چیان كردووە بۆ ڕێگری؟ 
- سۆشیال میدیا ڕۆڵی هەیە لەم نێوەندەدا؟ 
- زۆری ڕێژەی چەك لەنێو بازاڕەكانی هەرێمی كوردستان كێ لێی بەرپرسیارە؟  
- وەزارەتە ئەمنی و سەربازییەكان چ دەورێكی ئەرێنییان گێڕاوە؟
- ڕۆڵی سەرۆك هۆز و پیاو ماقولەكان و ناوەندە كۆمەڵاییەتیەكان چییە لەم تێكدان و كوشتنە؟ 
- حكومەتی هەرێم لە سەرووی هەموویان چۆن سەیری دۆخەكە دەكات؟ 

كۆمەڵێك هۆكاری دیار و زەق هەن، وایكردووە كار ئاسانی  لە كوشتن دروستبێت، پیلانی پێشوەختە و ئامانجەكانی تاوانباران بپێكێندرێن، یەكێك لە هۆكارە دیارەكان زۆری ڕێژەی چەكە، ئەوەش لە ڕێگەی كۆمەڵێك گروپ و  چەند بەرپرسێك ئەنجام دەدرێت، بەشێوەی ڕێكەوتن، بۆ هێنان و هاوردەكردنی چەك، بێگومان بۆ تێكدانی ئارامی و  دۆخ و ژیانی هاوڵاتیان.
لە كاتی ڕوودانی ڕووداوێكی كوشتن، ناوەندی خۆشكردنی گەمەكان و بە ئاسایی وەرگرتنی دۆخەكان،  ڕۆڵی هاندانی هاوڵاتیان بۆ ئەنجامدانی تاوانی كوشتن، سۆشیال میدیایە، كە دەورەكە وەك خۆی و زیاتر و گەورەتریش دەگێڕێت.
زۆربەی دەزگاكانیش بە هەمان شێوەی یەكتر دیمەنەكان پیشان دەدەن، بێ ئەوەی هەستبكەن بە بەرپرسیاری و ترسناكی لە نیشاندانی دۆخ و دیمەنەكان.

زۆر جار یاسا و دادگا هیچی بۆ نامێنێتەوە لە هەمبەر سەرۆك هۆز و پیاو ماقولان، كە بۆتە پەناگەیەكی مەترسیدار بۆ لەخۆگرتنی تۆمەتبارە ترسناكەكان، 
خۆ هەڵقورتانیان  بۆ ناو كێشە هەستیارەكان، بوونەتە هۆكارێك بۆ پەكخستنی ڕێڕەوی دادگایی كردن و وەرنەگرتنی سزای شایشتە بە تاوانەكانیان. 

لەماددەكانی (405) و (406)، لە یاسای سزادان عیراقی كە تایبەتن بە؛ تاوانی كوشتنی بە ئەنقەستە (قتل العمد)، بەتایبەتی ماددەی(406) كە بارودۆخی توندكەرە، كە سزاكەی توندكراوە بۆ لە سێدارەدان (اعدام) بەڵام بەهۆی وەستانی سزای لەسێدارەدان، لە عێڕاق و هەرێمی كوردستان، ئەم سزاییە جێ بەجێ ناكرێت، لێرەش زەمینەی باشتر ڕەخسا بۆ بكوژان. 

حكومەتی هەرێم سەرەڕای زانینی هەموو ئەم دۆخانە و ئاشنا بوون و ئاگادار بوون پێیان، بەڵام زەمینە خۆشكەری زیاتر بووە، نەك ڕێگر لەبەردم هۆكارە دیارەكان، پێی وابووە ئەمانە بابەتی باش و كەرستەی باشن بۆ غافلاندن و سەرقاڵ كردنی خەڵكی بۆ ئەوەی كێشەی بوجە و مووچە و كارەبا و ئاو رێگا و بان و قەیرانەكان و دەیانی دیكەی لەبیر بچێتەوە، بۆیە دەڵێن؛ بكوژەكان پیاوی خۆتانن، چوونكە زەمینە سازی كراوە نەك ڕێگری و سەپاندنی سزای توند.