هەنگاوێك بۆ پێشەوەو دوو هەنگاو بۆ دواوە

2 رۆژ پێش ئێستا

هەڵبژاردن لەكوردستان وەك نمونە
سەردەشت محەمەد

چەمكی هەڵبژاردن وەك هەر چەمك و پرسێكی دیكە چەندین پێناسە و ناساندنی جۆراوجۆری بۆكراوە، ئەگەر لەنێو ئەو پێناسانەدا بێن ‌و دەستبخەینە سەر ئەو پێناسەیەی كە دەڵێت هەڵبژاردن هەوڵێكە بۆ گواستنەوەی هەندێك كۆمەڵگا، لەكۆمەڵگایەكی خێڵەكی‌ و سەرەتاییەوە، بۆ كۆمەڵگایەكی مەدەنی‌ و شارستانی، ئەوا لێرەدا ئێمە دەكەوینە نێو نائومێدییەكی قوڵەوە، چونكە هەڵبژاردن وەك ئەو پرۆسەیەیی كەماوەی چەند دەیەیەكە لەهەرێمی كوردستاندا ئەنجامدەدرێت هێشتا نەیتوانییەوە گۆرانكارییەكی ئەوتۆ بێنێتەكاییەوە كە هیوابەخش بێت بۆ كۆمەڵگایی كوردی، بەڵكو بەپێچەوانە خودی هەڵبژاردن بووە بەئامرازی زیندوكردنەوەی گیانی خێڵگەرایی و ڕاكێشانی كۆمەڵگا لە كۆمەڵگایەكی ئارەزومەند بۆ كرانەوە و نوێبونەوە بەرە و كۆمەڵگایەك كە گرنگی و بایەخ بە هێشتنەوەی دەسەڵاتی خێڵ و بنەماڵە بدات.
هەر ئەمەشە وایی كردووە بۆ هەر وەخت و سەردەمێك كە هەڵبژاردن بێتە گۆڕێ ئامادەكارییەكان بۆ نزیك بونەوە و یەكتربینین و سەردانی كردنی كوڕانی خێڵ و بنەماڵە گەرموگوڕییەكی زیاتر بەخۆوە ببینێ، كەواتە لەم جۆرە هەڵبژاردنانەدا ناتوانرێت ئامانج و مەهامەكانی هەڵبژاردن وەك خۆی بێتەدی، هەرئەمەشە وادەكات كۆمەڵگا لەبری ئەوەی بییەوێت لەڕێگەی هەڵبژاردنەوە هەنگاوێك بۆ پێشەوە بچێت ئەوابە پێچەوانەوە دوو هەنگاو بۆدواوە دەگەڕێتەوە، دیار لە كۆمەڵگایەكی خێڵگەرایی وەك نەتەوەی كوردا مەبەست لەدرێژەدان و ئەنجامدانی ئەم جۆرە لەهەڵبژاردن بۆچییەو كێ سود لەم پرۆسەی هەڵبژاردنە دەبینێت.

 "هەڵبژاردن لەئێستادا ئەوەندەی ئامانجی هێشتنەوەی كۆمەڵگای كوردییە لەنێوبازنەی خێڵدا نیو هێندە بەلایەوە گرنگ نییە كە كۆمەڵگابەرەو مەدەنیبون‌ و شارستانیبوون ئاراستە بكات"

لەكۆمەڵگایی كوردیدا ئەوەی گرنگی بەزیندو هێشتنەوەی خێڵ‌ و بنەماڵە دەدات ‌و ڕێگرە لەبەردەم ئەو گۆڕانكاریانەیی كە دەتوانرێت هەڵبژاردن لەكۆمەڵگادا ئەنجامیبدات ڕوونە كە ئەو هێزە سیاسیانەن كە لەئێستاو ڕابردوشدا لەنێو ساحەی سیاسی هەرێمدا ڕۆڵی كاریگەر و باڵایان هەبووە لەئاراستەكردن‌ و بەڕێوەبردنی كۆمەڵگادا، چونكە خودی ئەم هێزانە خۆیان هەڵقوڵاوی نێو خێڵ‌و بنەماڵەن‌ و بڕوایانوایە دەرچونی كۆمەڵگا لەقاوغی خێڵگەرایەتی‌و هەنگاونان بۆ كۆمەڵگایەكی مەدەنی‌و شارستانی زیان بەهەیمەنەو دەسەڵاتی ئەوان دەگەیەنێت‌و هەر خودی ئەو هەڵبژاردنەی كە بانگەشەی بۆ دەكەن دەبێت بەمۆتەكەیەك بەسەریانەوە‌و زۆرنابات لەنێو ساحەی سیاسیدا پەراوێزیان دەخات‌و لەهێزی یەكەم‌ و دووهەمەوە ئەگەر لەناوییان نەبات ئەوادەیانكات بەهاوڕێ‌ و هاوئاستی ئەو هێزانەی كە ماوەی چەند ساڵێكە نەیانتوانییەوە ببن بەخاوەنی كورسییەكی پەڕلەمان.

كەواتە لێرەوە بۆمان ڕوون دەبێتەوە كە هەڵبژاردن لەئێستادا ئەوەندەی ئامانجی هێشتنەوەی كۆمەڵگای كوردییە لەنێوبازنەی خێڵدا نیو هێندە بەلایەوە گرنگ نییە كە كۆمەڵگابەرەو مەدەنیبون‌ و شارستانیبوون ئاراستە بكات.