ئایا كاندیدە سەربەخۆكانی هەڵبژاردن، سەربە خودی خۆیانن؟

2 رۆژ پێش ئێستا

بڵێسە جەبار فەرمان
یەكێك لە مەبەستەكانی هەمواركردنی یاسای هەڵبژاردن، بریتی بوو لە نەهێشتنی لیستی حزبی و رێگادان بە كەسانی رۆشنبیر و چالاكوانی كۆمەڵگای مەدەنی كە خۆیان لە ریزەكانی هیچ حزب و پارتێكدا نەدۆزیبووەوە، خۆیان كاندید بكەن و ئەگەر متمانەیان هێنا، لەو رێگایەوە خەبات بۆ بۆچوونەكانیان بكەن.

ئەوەی لە كۆی عێراقدا بەدیدەكرێت رفاندن و كوشتنی هەموو ئەو چالاكوانانەن كە سەربەخۆن، پێگەی جەماوەرییان هەیە و بوونەتە مەترسی لەسەر حزبە گەورەكان.

كاندیدە سەربەخۆكانی هەرێم بەشێكیان ساڵانێك لە ریزی حزبێكدا كاریان كردووە و بە تەكتیك بێت یا هەر هۆكارێكی دیكە، ئێستا وەكو سەربەخۆ خۆیان دەناسێنن و لەم هەڵبژاردنە بەشدار دەبن.
بەشێك لەو كاندیدانە چاویان لەوەیە كە تەكلیفیان لێبكرێت پاشگەزببنەوە لە خۆكاندیدكردن و لە بەرامبەردا قەرەبووی مادی یان مەعنەوی بكرێن.
ئەوانەی وەكو سەربەخۆ خۆیان كاندید كردووە، لە راستیدا سەربەخۆ نین و دژ بە خواستی حزبەكانیش نین.

لە ئێستاوە دیارە كە هەمواركردنەوەی یاسای هەڵبژاردن، ئامانجی خۆی نەپێكا و دووبارە حزبە گەورەكان یاساكەیان لە بەرژەوەندی خۆیان قۆستووەتەوە.

(مەبەستەكەم رێژەییە)