بۆچی ناوی كوردی لەمنداڵەكانمان بنێین؟

1 مانگ پێش ئێستا

خالید گڕاوی
هەموو نەتەوەیەك ناوی تایبەت بەخۆی هەیە، هەندێك لەناوەكانیان گوزارشت لەكێو وبەرزایی و لوتكە و دۆڵ و روبار، واتە جوگرافیای وڵاتەكەیان دەكەن، هەندێكیشیان تەعبیر لەئازایەتی و شەڕو و سەركەوتنەكانیان دەكەن، هەندێكیشیان بەپێچەوانە بۆ یادكردنەوەو هێشتنەوەی مێژوو كارەساتە ناخۆشەكان، روداوە خۆشەكان دەكەن، هەندێكیش ناویان گوزارشت لەجوانی و سروشتی وڵاتەكەیان دەكەن، ناوەكان بەجوگرافیایەكی دیاریكراو تایبەت دەبن ...

ئێمەی كورد زیاتر كەوتوینەتە ژێر كاریگەری ناوی عەرەبی، هەندێك لەناوەكان بەپیرۆز سەیردەكرێن و لەدوای راپەڕینیش زۆر لایەنی ئیسلامی ناوی دینییان بەواجب داناوە و وەك ئەركێكی ئاینی، ئەو ناوانە لەهەموو ماڵێك دەبێ هەبێ، لەوانە (محمد، احمد)،كە هەردوكیان یەك واتایان هەیە (عبداللە) بەڵام بۆ ئێمەی كورد ئەو دوو ناوانە بەئاسانی فێری نابین، چونكە لەزمانی كوردی پیتی (ع، ح ) نیە ئەو دوو پیتە عەرەبین لەزۆربەی زمانەكانی دونیا ح بە (ه، H) و ، (ع) بە(ئێ، A ) دەنوسن، بۆ نمونە محمد دەبێتە موهەمەد و عبداللە دەبێتە ئەبدوڵا، كاتێ یەكێ بەموعەمەد بانگی بەرامبەرەكەی دەكات، جگە لەوەی ناوەكە دەشێوێنێ و شێوازێكی ناشیرین لەقسەكردنیش پێشكەش دەكات و لەناو خەڵكیشدا یەكسەر ئاستی رۆشنبیری كەسەكەمان لەزهنەوە بۆ نمایش دەبێت...

ناونانی منداڵانمان بەكوردی پێویستە چونكە:ـ
۱ـ بەئاسانی دەتوانین ناوی كوردی بێنین و خوێندەوارو نەخوێندەوار دەتوانی بەدورستی بانگی بكات..
۲ـ ئێمەش وەك هەموو گەلان دەتوانین منداڵەكانمان ناوی كوردی لێبنێن تا خۆیان شانازی بەناوی خۆیان بكەن وئێمەش شانازی بەوڵات و زمان و كەلتورمان بكەین..
۳ـ زۆر لە دایك و باوكان تا مردن ناتوانن بەمحمد بانگی منداڵەكانیان بكەن.
٤ـ لەكۆڵانە منداڵان لەكاتی شەڕ، رێز لەپیرۆزی ناوەكە ناگرن و جنێوو سوكایەتی بەناوی پیرۆزی دەكەن...
٥ـ هەندێ ناوی عەرەبی و دیار هەیە، گەر تەرجومەی كوردی بكرێن، شەرم دەكەین بەو ناوانە بانگیان بكەین.