هیچ نیە عەزیزان

1 مانگ پێش ئێستا

عەزیز رەئوف
چاوەڕوانیتان لەكەس نەبێت دۆخەكە باش بكات، شەقاوەكانی خۆیانە و جارجار سەرخۆش دەبن و شار بە هی خۆیان دەزانن و بەسەرگەرمی تەقە دەكەن. هیچ نیە عەزیزان، دوو ڕۆژی تر هەموو شت دەچێتەوە شوێنی خوی. پیاوكوژەكان هی خۆیان و منداڵەكانیش هەر هی خۆیانن و سبەی دەچنە ماڵی قوربانیەكان و سوڵح دەكەن. 

هیچ نیە عەزیزان، كۆماندۆكان زەرورن بۆ سەركوتكردنی خۆپیشاندانەكان و كوشتنی گەنجی خێرلەخۆنەدیو، ئاسایشەكانیش هەر زەروورن بۆ شەقدان لە خەڵكی مەدەنی و گرتنی جادەكانی ناڕەزایی. ئیدی بەرپرسێكیش سبەی دێت و جارجارێ لەو زەلكاوەوەی كە خۆی دروستی كردووە سەردەردەهێنێ و دەڵێ: قبوڵی ناكەین،  بەم بۆنەیەشەوە چەند ڕۆژێك گەمژەكان دڵخۆش دەبن.

چاوەڕوانیتان لە ئۆپۆزسیۆنیش نەبێ، ئەوە پارێزگاری شار هەر دۆخەكە تەقەی تێكەوت تەداخول لە سیاسەت ناكات و هەردوێنێ هەردوولا ڕێكەوتنیان ئیمزا كرد و ئیتر بە بێدەنگی دۆخەكە تێدەپەڕێ.
هیچ نیە عەزیزان، ئەم ڕووداوەش تێدەپەڕێ.