سلێمانی بۆ وا دەكات؟

1 مانگ پێش ئێستا

هیوا حەسەن
سلێمانی یەكێكە لەشارە زیندووەكانی ناوچەكە،ئەم شارە چەندین خەسڵەتی تێدایە كە لەشارەكانی دیكەی كوردستان و ناوچەكە جیای دەكاتەوە، هەر لەخۆڕاگری و بەرەنگاری ستەم تا دەگاتە ئەوەی زۆرترین شاعیرو كەسایەتی سیاسی و رۆشنبیرو كۆمەڵایەتی لەئامێزی خۆیدا پەروەردە بكات و تا دونیا مابێت گەلەكەمان شانازیان پێوە بكات.

لەدوای ڕاپەڕینی ساڵی 1991 و دامەزراندنی حكومەتی هەرێم ،سلێمانی پێشەنگ بووە لە فەراهەمكردنی ئازادیەكانی تاك و مەڵبەندێك بووە بۆ برەودان بە بوارەكانی زانست و مەعریفە، بەڵام ئەم تەوژمە فكرییە نەیتوانی یان راستر بڵێین نەیانهێشت بەردەوام بێت لە رۆڵی مێژویی خۆی، ئەویش دوای ئەوەوە هات كە ئەم شارە بووە ململانێی توندی نێوان باڵەكانی حزبی دەسەڵات كە یەكێتی نیشتمانی كوردستان بوو، ئەم ململانیە ناوخۆییە بەشێوەیەك پەرەی سەند كە هەموو سێكتەرەكانی حوكمڕانی لەم زۆنە بكەوێتە بەردەم رەحمەتی شەڕی باڵەكان و وەك غەنیمەی شەڕ لەنێوان خۆیاندا دابەشی بكەن.

دوای دروست بوونی ئۆپۆزسیۆن لە چەقی شاری سلێمانی، ململانیەكان بەشێوەیەكی زۆر ئەكتیف ترو بێ شەرمنانەتر كەوتنە دابەشكردنی كێكی دەسەڵات و مۆنۆپۆل كردنی تەواوی جومگەكانی حوكمڕانی لەم زۆنەدا، هەروەها دوای مردنی نەوشێروان مستەفا و جەلال تاڵەبانی ئیتر شتێك نەما بەناوی دەسەڵات و دام و دەزگای حكومی هەموو ئەمانە خرانە ژێر ركێفی بنەماڵەو باڵەكانی نێو یەكێتی و بەشێكیشی بەر بزوتنەوەی گۆڕان كەوت.

بڕوا ناكەم لەمێژوی دروست بوونی سلێمانی هێندەی ئەم چوار ساڵەی دوایی دەستدرێژی بەسەر موڵك و داهات و سامانی ئەم شارەدا كرابێ، ئاخر لەچی سەردەمێكدا بەئاشكراو بێ پەردە دەست بگیرێت بەسەر هەزاران دۆنمی زەوی و دارو درەختی ئەم شارە لەلایەن میرنشینەكانی حزبەوە؟ لەكام سەردەمی حوكمڕانی هێندەی ئێستا فەرماندەو میلشیاو هێزی تایبەت بوونی هەبووە لەم شارەدا؟ جگە لەسەردەمی ملازم محسن لەچی سەردەمێكدا بەرۆژی روناك پاسەوانی بەرپرسی حزبی و حكومی هەبووە وەك ئێستا هێرش بكەنە سەر بازگەو مەفرەزەكانی ئاسایش و پاشان هەر بەمامەگوندەیی بەناوی سوڵحی عەشایەرییەوە كۆتایی بەو تاوانانە بهێنن و هیچ حسابێك بۆ یاساو دادگا نەكرێت.

ئەوەی ئێستا لەسلێمانی ئەگوزەرێ خەڵكی ئەم شارە لێی بێ بەرین ، بەڵام نابێ ئەوە بەهانەیەك بێت بۆ بێدەنگی و درێژە پێدانی ئەم دۆخە نالەبارەی كە باڵی بەسەر ئەم شارەدا كێشاوە، پێویستە ئیتر سلێمانی قسەی خۆی هەبێت، هەروەك و چۆن لەمێژوی دروستبونی ئەم شارەدا لەهەموو رووداو و كارەساتەكاندا قسەو بڕیاری خۆی هەبووە، بەڵام پرسیارە جددیەكە ئەوەیە ئایا خەڵكی سلێمانی بۆ هەتا ئێستا بێدەنگە ؟ ئایا رازیە بەم شێوازە حوكمڕانیە؟ ئایا توانای گۆڕانكاریان نەماوە یان دەستیان گرتووە بە كڵاوەكەیان بۆ ئەوەی با نەیبات؟
ئەوەی خەڵكی ئەم شارە بناسێت زۆر بە ئاسانی ئەتوانی وەڵامی ئەم پرسیارە بداتەوە ئەویش ئەوەیە كە ئەم شارە هەرگیز هەتا سەر بێدەنگ نابێت و لەكۆتاییدا بڕیاری خۆی ئەدات.

ئەبێ رۆشنبیران و كەسایەتی شار و دڵسۆزانی نێو حزبەكانی دەسەڵات سنوورێك بۆ ئەم فەوزاو بەڕەڵاییانەی هەندێك لە فەرمانڕەوایان دابنێن و بڕیارە قورسەكەی خۆیان بدەن و نەهێڵن ئەم شارە جوانەی كوردستان ناو و ناوبانگە پیرۆزەكەی لەكەدار بكرێت، هەرچەندە بەشێكی ئەم كێشانە پەیوەستە بە نەبونی سیستەمێكی حوكمڕانی رەشید كە بتوانێت بەشێوەیەكی مەدەنیانەو سەردەمیانە دام و دەزگاكانی ڕێك بخاتەوەو عەدالەتی كۆمەڵایەتی لەهەموو ناوچەكانی كوردستان وەك یەك بچەسپێنێت، ئەمە جگە لە دەیان هۆكاری تر كە ڕێگرن لەبەردەم ئاسایی بونەوەی دۆخی كوردستان بەگشتی و سلێمانی بە تایبەتی.