بەنزین هەرزان نابێتەوە

3 مانگ پێش ئێستا

چیا هاوار
لەوەتای كورد هەیە سیاسەت لەسەر بنەمای كاردانەوە و رق و موزایەدە پیادە ئەكات، هەر بۆیە نەمامتوانیوە نە سیاسەت بە سیستم و بنەما زانستیەكەی بكەین نە حوكمڕانیش دابماڵین لە رق و كینە و كاردانەوەی خراپ.

حكومەت نرخی بەنزینی دوو ئەوەندە گران كردووە گوێش بەوە نادات لە چ سەردەمێك ئەو كارەی كردووە چونكە وڵات غەرقی قەیران و بێ مووچەیی و نەداری بووە دەسەڵاتیش تەنها و تەنها خەمی كۆكردنەوەی زیاتری سامانیەتی.

كێشەی بەنزین كێشەی هەموو تاكێكی كۆمەڵگایە و دەبوایە چارەسەری بۆ بكرێت چونكە گرانی نرخی بەنزین بەواتای گرانی تێكڕای شتومەك دێت لەبازاڕەكان، تا ئەمڕۆش هیوایەك هەبوو بۆ دابەزاندنی نرخی بەنزین بەڵام سەرۆكی جوڵانەوەی نەوەی نوێ (شاسوار عبدلواحید) مۆری جێگیربوونی نرخی بەنزیندا و بەو نرخە گرانە جێگیری كرد و رەنگە ئیتر بەنزینی لەو نرخە هەرزانتر نەبینینەوە لەبەر دوو هۆكار، هۆكاری یەكەم دەسەڵات حەز ئەكات داهاتی زیاتر و زیاتر بكات و نەك تەنها نرخی بەنزین بەڵكو ئاوی خواردنەوەش بەو نرخە بدات.

هۆكاری دووەمیش ئەوەیە مادام سەرۆكی جوڵانەوەی نوێ نرخی بەنزینی كرد بە پێنج سەد دینار ئیتر كاردانەوەی حكومەت كاردانەوەیەكی ئەرێنی نابێت بێگومان نەرێنی ئەبێت چونكە ئامادەنابن لەژێر فشاری شاسوار نرخی بەنزین دابەزێنن و بیكەنە چالاكی و دەستكەوتێك بۆ جوڵانەوەی نەوەی نوێ، بەم شێوەیەش ئەوەی زەرەر ئەكات خودی هاوڵاتیانە نەك دەسەڵات و نەوەی نوێ.

دوواجار ئەبێ بڵێین ئەوەی مۆری كۆتایی لە نرخی بەنزیندا خودی شاسوار عبدلواحید بوو كە ڕەنگە هەر دەسەڵات مۆرەكەیان خستبێتەدەست!