ماكەكانی خراپ مامەڵەكردن لەگەڵ منداڵان

14/07/2021

د.لاڤە دارا علی 
منداڵان بەباوان پشت دەبەستن بۆپارێزگاری كردن و فەراهەم كردنی ژیانێكی شایستە.تەنها شت كەمنداڵان پێویست دەكات بیكەن بریتی یە لەیاری كردن و چێژوەرگرتن لەمنداڵیان، هەروەها فێربوون و ئەزمون كردنی ژیان تاكو تاكێكی تەندروست بنیات بنرێت.

ئاخۆ ئەوخێزانەی كەئەم هەموو شتەیان لێ چاوەڕوان دەكرێت ئەگەر خراپ مامەڵەی منداڵاكانیان بكەن لەڕووی جەستەیی، دەروونی، سێكسی….هتد دەبێت چ زیانێك بگەیەنن؟

قوربانیان متمانەیان بە كەسەنزیكەكان وخەڵكی بەگشتی نامێنێت، بەكۆمەڵێك گرێ و برینی دەروونییەوە گرفتادەبن ، كەدەرئەنجام تاكێكی نەخۆش بەرهەم دێت هیچ سودێكی بۆ خۆی و دەووروبەر نابێت و بگرە لەوانەشە لە داهاتوودا هەمان ڕێچكەبگرێتەبەر.

هەربۆیە دەتوانین ماكەكان لەم خاڵانەی خوارەوەداكورت بكەینەوە:
‌‌1- لە دەست دانی توانای متمانەپێكردن.
2- قوربانیانی دەست درێژیە سێكسییەكان لەداهاتوودا تووشی كێشە سێكسی یەكان دەبن وقورس دەبێت بۆیان كە پەیوەندی ببەستن.
3- قوربانیانی توندوتیژی جەستەیی، ترس و تۆقین بەرامبەر (ژن/پیاو )درووست دەكەن و لەداهاتوودا ئەو ئامێر و ئامرازانەی بەكارهاتووە وەك زەنگێكی وەبیرهێنانەوە كاردەكەن كە كۆی پرۆسەی توندوتیژیەكەی دێننەوە یاد، بەمەش لەبیركردن و تێپەڕاندنی زەبرەكە قورس دەبێت.
4- گەڕان بەدوای پیاهەڵدان وستایش كردن بەشێوەیەكی بەردەوام بۆسارێژكردنی برینەكان لەنێوقوربانیان دەبینرێت وە هەمووكارێك دەكەن بۆ بەدیهێنانی.
5- هەست بەكەم زانین.
6- دەركەوتنی نەخۆشی دەروونی، وەك خەمۆكی، جۆرەكانی دڵەڕاوكێ، وەسواس وقەلەقی، تەنگژەی كەسێتی ..هتد.
7- لەدەستدانی توانای كۆنتڕۆڵكردنی هەست وسۆزەكان.
8- گرفت لەدۆزینەوەی هاوژین و پێكهێنانی خێزان وپرۆسەی هاوسەرگیری.
9- نەخۆشی یەجەستەییەكانی فشاری دەروونی(سترێس) و دەرهاویشتەكانی وەك بەرزی فشاری خوێن، شەكرە، نەخۆشی یەكانی دڵ…..هتد.
10- بەكارهێنانی ماددەی هۆشبەرو ئالوودەبون.
11- ڕق و توڕەیی بەرامبەر هەمووخەڵكی و جیهان بەگشتی.
12- كێشەكانی خەو و بینینی دێوەزمەو خەوی ناخۆش.

 

ئامادەكردنی/ د.لاڤە دارا علی؛ پسپۆری نەخۆشی یە دەروونی یەكان