تاڵەبانی ‌و ڕۆژنامەگەری عێراقی

15/07/2021

لەتیف فاتیح فەرەج
1
سەندیكای ڕۆژنامەنوسانی عێراقی ساڵێك دوای 14ی تەمموزی 1958 لەدایكبوو، سەندیكا لە15ی ئۆكتۆبەری 1959 لەبەغدا ڕاگەیەنراو یەكەم سەرۆك محەمەد مەهدی جەواهیری شاعیر و سیاسی بوو، یەكەم كوردیش لەناو سەندیكا مام جەلال بوو، مام جەلال لەوساتەوەو پێشتریش وەك ڕۆژنامەنوس‌و نوسەرێكی دیار بەكوردی ‌و عەرەبی كاری ڕۆژنامەنوسی دەستپێكرد، هەر لەو ڕۆژگارەشەوە تاڵەبانی بڕوای بەوە هێنا كە كاری ڕۆژنامەنوسی كارێكی زەحمەتە، بەڵام دەبێت ئازادانە بەڕێوەبچێت.
2
ئەگەر واز لەهەڵەو كەموكوڕی دیرۆكی بێنین كە كەسی لێدەرناچێت بەتاڵەبانیشەوە، لانی كەم ئەگەر بەپێی ئەو وتەیە قسە بكەین كە دەڵێ "مردو مرد شەیتان دەستی لێدەشوات" یان بەپێی ئەو گوتەیەی پەیامبەر كە دەڵێت "چاكەی مردوەكانتان بەیاد بێننەوە" دەبێت هەڵوەستە لەسەرئەوە بكەین كاتێ‌ محەمەد موكری سەگوەڕی نوسی هەبون شیرو تیریان لێدەسوو، لێ‌ تاڵەبانی وتی وەڵامی نوسین بەنوسین، دواتر هەر خۆیشی پێشەكی بۆ چاپە نوێیەكەی سەگوەڕنوسی.
3
سەردەمێك، كەمێك وەك ئەمڕۆژگارە كوردستانی نوێ‌ بواری ئازادی وتن‌و نوسینی بۆ خەڵكانێك كەمكردبوەوە، نامەی سەركردایەتیەكی  یەكێتی ئێستام لایە كە ئەو دەم بۆی نوسیوم لەشوێنێكا دەڵێت "كوردستانی نوێ‌ هەموو ڕێگەیەكی نوسینی لێگرتوین مەگەر ئیتر لەسەر مۆزەمبیق‌و سۆمال بنوسین"، هەر لەو سەرو بەندەدا مام لەكوردستانی نوێ‌ لاپەڕەی ئازادی بۆ جیاوازەكان كردەوە.
4
هەقم لەشەڕی سیاسی ‌و شەڕی حزبی‌ و ڕژانی ئەو هەموو خوێنە نییە، بەڵام بۆ ئازادی نوسین ‌و ڕادەربڕین تاڵەبانی‌ و هاوسەرەكەی زۆر جیاوازتربوون لەمانەی ئێستا، ئێستا كە ئەو هەموو سوكایەتیە بەمیدیا و میدیاكاران دەكرێت‌ و نوسەرو ڕۆژنامەوان دەگیرێن‌و فەلاقە دەكرێن كەس نییە بڵێت ئەمە بۆ، نەك هەر ئەوە دەگوترێ‌ نابێت كەسیش داكۆكی لەئازادی وتن‌و نوسین بكات، چونكە دەشێت توشی بەزمێكی بكەن.