تاكى كورد و تینوێتی بۆ سێكس و كوشتن

2 مانگ پێش ئێستا

لەنجە ئەحمەد
مرۆڤ بە سروشتی خۆی بوونەوەرێكی تینووە بە سێكس و دەسەڵات و كوشتن (كوشتن تەنها مەبەست لێی كوشتنی فیزیكی و مێتافیزیكی مرۆڤێك نیە، بەڵكو كوشتنی ئاژەڵ و زیندەوەری ئاویی و باڵندە و هەموو ئەو تەنە زیندوانەیە كە زۆرجار هیچ زیانێكیان بۆ مرۆڤ نیە بەڵام چونكە مرۆڤ حەزی بە كوشتنە بۆیە ئەیانكوژێت).

تاكی كورد و مرۆڤی ڕۆژهەڵاتی بەشێوەیەكی گشتی لەهەر كەسێكیتری ئەم گۆی زەوییە زیاتر ئالودەی سێكس و پۆست و كوشتنە، بوونەوەرگەلێك خاڵی لە هەموو بەهایەكی مرۆڤ بوون و پڕ لە هەموو حەزە ئاژەڵیەكان.

لە دوو هەفتەی ڕابردووا گەلی كوردستان فیچەرێكیان لەسەر من كرد وەك نمونەیەك بۆ هەموو ئەو ژنانەی ڕۆژانە ڕێگایەكی دوور ئەبڕن و دڵسۆزانە كار ئەكەن، كەچی كۆمێنتەكان ئەوەنەی هەوڵی پچوك كردنەوەیان ئەیا لەوەی لەبەر خاتری جوانی و سمت و ڕان و قاچ بوو (كە بەفلاشباكێك ئەگەینە ئەوەی بۆ پەنجا شەست ساڵی ڕابردووش تەنورەیەكی لەوجۆرە زۆر زۆر ئاسایی بوو)، نیو هێندە بیریان بۆ ئەوە نەچووبوو كە ئەشێت بێ هیچ باكگراوندێكی سیاسی و بێ هیچ پاڵپشتێكی حیزبی ئەم كەسە گەیشتبێتە پۆستێكی هێندە پچوك كەبەڕای من جێی بایەخ و گرنگی نییە و ئەركێكی قورسە ئەگەر بتەوێ بە دڵسۆزی و خەمخۆرییەوە كاری تیا بكەی، یا فیچەرێكی وا هێندە بەشەوق بووە بۆیان بەزۆریان زانیووە خۆ ئەگەر لەسەر یەكێك لەوان بكرێ بڕواناكەم بتوانن چوار دێڕ بەرامبەر كامێرا بڵێن، زۆربەی كۆمێنتەكان وەك ئەوە بوون كابرا لە مەجلیسێكا بایەكی بەهێزی لێ بووبێتەوە ئەوەنە مایەی پێكەنین بووم بۆم (هەربەجدیش بەو كۆمێنت و كاردانەوانە زۆر پێكەنیم) ئاخر پیاوێك كە تەنها چاوی سێكسی ئەبینێ و ژنێك كە هەموو هێز و توانای تۆ لە تەنورەیەكی كورتا ئەبینێتەوە و خۆشی خاڵییە لەهەموو بەهرە و توانایەك ئیتر ئەبێ جگە لەو بایە چیتری لێ بێتەوە، قابیلە عەتر و گوڵاومان بۆ بڕێژن. 

ئەمە بۆ دەركەوتنی ژنێك تا ڕادەیەكی زۆر نورماڵە چونكە زۆرینەی پیاوی ئێمە تینوی سێكسە و هەموو ئەقڵی لەچاوییایەتی و ژنیشمان دڵگەرمە بە پچوككردنەوەی هاوڕەگەزی خۆی تا پیشانی بات ئەم بۆیە هیچی بۆ ناكرێ وپێی ناكرێ چونكە وەك خۆیان ئەڵێن ڕووت نیە (وەك ئەوەی ئەگەر هەنێكیان ڕووت بن زۆر جوان بن)، بەڵام بێمانایە كاتێك پیاوێكی حەفتا و پێنج ساڵ لەكەناڵێكی تی ڤی دەرەكەوێت كە دە ساڵە خەریكی ڕاهێنانی لەش جوانییە، كاك و دادەی بینەریش چاویان تەنها ناوگەڵی پیاوەكەیان بینیوە، ئاخر كاكم كە ناتوانێ كرێكاری بكا و خەریكی دەسپان كردنەوەیە لە دایك و باوكی و تەنانەت ناتوانێ چوار پێنج چڵ گوڵ بفرۆشێ لە ترافیكەكانا تا پێویستی ڕۆژانەی خۆی پێ دابین كا كەچی لە كۆمێنتا ئەنوسێ ئەو بەچكە پشیلەیە چی بوو لەناو گەڵیا، یا ئەنوسێ ئەمە ڕاهێنانی لەشجوانی كردووە یا ناوگەڵ جوانی؟ 
ئاخر مرۆڤێك كە توانا و بەهرەیەكی نەبێ جگە لەو كۆمێنتە سەقەت و بێ نرخانە چیتری  لێ چاوەڕوان ئەكرێ!؟

ژنێك، پیاوێك، كوڕێكی گەنج ،كچێكی گەنج ، تازە دەرچوویەكی زانكۆ كە هەر چاوەڕێییە وەك ڕۆبۆت بەكار بخرێ و خۆی هیچی لێ سەوز نابێ، هەر ئەو كۆمێنتانەی لێ ئەوەشێتەوە كە هەڵقوڵاوی ئەقڵ و بیر و هۆشیانە و لەوپەڕی قەناعەتەوە ئەو قسانە ئەكەن بۆ ئەوەی شكست و پچوكی خۆیانی پێ بشارنەوە و بەرامبەریشیان وەك خۆیان پچوككەنەوە.
دەی كەواتە هەر بەرەو دواوە بڕۆ كوردی داماو!