نەوشیروان مستەفا، وردبین نەبوو

2 مانگ پێش ئێستا

ساڵح ژاژڵەیی *
بەبۆچونی خۆم كاك نەوشیروان لەئیدارەدانی بزوتنەوەی گوڕان بەگشتیی و مەكۆی سەرەكی بزوتنەوەی گۆڕاندا سەركەوتو نەبو. وردبین نەبو، بەرنامەی نەبو، كاك نەوشیروان لەهەمو شتیكدا زۆر دور بین بوەو پێش روداوەكان كەوتوە، ‌بەڵام بەداخەوە لەدروستبونی بزوتنەوەی گۆراندا دوای روداوەكان دەكەوت. 
كاك نەوشیروان هەڵسوكەوتی لەگەڵ هەمو گۆڕانخوازان وەكو یەك نەبو. نەیتوانی بێلایەنی خۆی بسەلمێنێت. نەیتوانی رۆڵی باوكێكی میهرەبان ببینیت. لەراستیدا ئیدارەدانی حیزبێك یان هەر دام و دەزگایەك پێویستی بە دامەزراندنی موئەسەسات هەیە. پێویستی بەعەقڵی كەسانی زور هەیە. بەرێوەبردنی حیزبێكی تازەی وەكو گۆڕان هەرگیز بەهەڕەمەكی بەرێوە ناچیت و ناكرێت ئایندەی ئەم حیزبە بدرێتە دەستی قەزاو قەدەر.
بەرێوەبردنی حیزبێكی سیاسی تازەی وەكو گۆڕان پێویستی بەبریارو عەقڵی دەستە جەمعی هەیە. یەكێك لەسیفەتە نەرێنیەكانی كاك نەوشیروان ئەوەبو بەمیزاج هەڵسوكەوتی دەكرد. ئەوەش خراپترین سیفەتی سەركردەیە. كەسێك كە بە میزاج كار بكات زو توڕە دەبێت، كە توڕەش بو هەڵەی كوشندە دەكات.

لەناو سەركردەكانی كورددا بە گشتی كەلتوریكی زۆر سەقەت هەیەو هەموان وەكو یەك پەیڕەوی دەكەن. سەركردەكان ئەوەندە خۆیان لەبەرزیدا دەبینن، خوار خویان وەكو مێرولەو مێگەلە ئاژەڵێك دەبینن و هەرگیز خۆیان لەو ئاستەدا نابینن كە پرس و رایان پێ بكەن.
دواجار دەبنە خاوەنی هەمو بڕیارێك و كەسیش ناتوانیت قسە لەقسەی ئەواندا بكات، هەرچی بیكەی سودی نییەو دواجار قسە هەر قسەی خۆیان دەبێت و كارەسات بەسەر میللەتدا دێنن و كەسیش ناتوانێت پرسینەوەیان لەگەڵ بكات. لەراستیدا بەرهەمهێنانی كەلتوری خۆ بەزلزانینە. بەڵام لەبیرتان نەچێت بەشێك لەتاوانی بەرهەم هێنانی ئەم كەلتورە، هۆكارەكەی ئێمە خۆمانین. 

كەس بەدیكتاتۆر لەدایك نابێت، ئەوە من و تۆین یان لەڕوانگەی نەشارەزایی و نەزانیینەوە، یان لەڕوانگەی دڵسوزیمانەوە بەدەستی خۆمان دیكتاتۆر دروست دەكەین. ئەوە ئێمەین بەبێ بیركردنەوە دەبینە دەروێش. ئەوە ئێمەین خۆمان بچوك دەكەینەوە و كەسانی تر دەكەین بە پاڵەوان . ئەوە ئێمەین دەبینە بت پەرست و ئەوان لەبری ئێمە بیر بكەنەوەو لەبری ئێمە بڕیار بدەین دواجار دەمانگەوجێنن. دەمانكەن بە پەیژەو پێماندا سەردەكەون و مەرامەكانی خۆیان دەهێننە دی.

* ئەندامی پێشوی جڤاتی نیشتمانی بزوتنەوەی گۆڕان