ئەو قۆناغەی ریال مەدرید پێیدا تێپەڕ دەبێت

2 مانگ پێش ئێستا

هەكاری قانع 
هێشتا نەبووە بە سێ مانگ خولەكان كۆتاییان هاتووە، ریال مەدرید سێ كەسایەتی گرینگی لەدەستداوە، سەرەتا زیدان و دواتر رامۆس و دواتر ڤاڕانی لەدەستدا.

ئەوەی روودەدات چاكسازی و نوێبونەوە نیە، بەڵكوو هەمان ئەو قەیرانەیە كە ریال مەدرید لەدوای 2005 ەوە تێی كەوت، ریال مەدرید خۆی لە پێكهاتەكەیدا دوو وەرزی رابردوو دنیایەك كون و كەلەبەری تێدابوو ئێستاش بەرگری تیپەكە بە تەواوی كونی تێبوو.
بێگوومان یانە پێویستی بە نوێبونەوە هەیە بەڵام گۆڕانكاری و چاكسازی بەم شێوەیەی ئێستای ریال مەدرید نابێت، رەنگە ریال مەدرید كۆتا رۆژەكانی گواستنەوە گرێبەستی ئیمباپێ رابگەیەنێ بەڵام ئەمە بەسە بۆ ئەوەی ریال مەدرید پاڵێوراو بێت؟ 
بێگوومان نەخێر ئەوەی ریال مەدریدی لە وەرزی رابردوو لە كێبڕكێكان هێشتەوە تا رادەیەك بەرگری و گۆڵپارێز بوو بەڵام ئێستا ریال مەدرید لەم هاوینەدا بەرگریكارەكانی لەدەستدا، ناچۆ و میلیتاو كۆتاییەكانی وەرزی رابردوو ئاستێكی زۆر باشیان بەیەكەوە پێشكەشكرد بەڵام ئەوە دڵنیایی نیە كە دوو یاریزانی یەدەگ بتوانن وەرزێكی باش پێشكەش بكەن و سەركردایەتی گرینگترین هێڵی یاریگا بكەن.

سەرەتا گەڕانەوەی ئەنچێلۆتی و گرێبەست كردن لەگەڵ راهێنەرە ئیتاڵیەكە كارێكی هەڵە بوو چونكە ئەنچێلۆتی راهێنەری چاكسازی و دروستكردنی تیمی نوێ نیە دوای ئەویش لەدەستدانی ڤاڕان و رامۆس گورزێكی گەورەیە بەر تیپەكە كەوتووە و ئەگەر لە ماوەی ئەم مانگە ریال مەدرید كێشەكان چارەسەر نەكات هەمان ریال مەدریدی 8 ساڵی پێش 2012 دەبینین كە یانەكە بە قەیرانێكی گەورەی یاریی كردن یاریزاندا تێدەپەری .