یەكێتی كۆن و نوێ !

2 مانگ پێش ئێستا

نەشوان ئەحمەد
"كەس ناتوانێت بۆ ماوەیەكی زۆر ماسك بپۆشێت".. ئەم وتەیە پڕ بە پێستیەتی بۆ حاڵی ئێستای یەكێتی.
یەكێتی كە بەر لە ساڵ و چەند مانگێك كۆنگرەی لەژێر ناوی (نوێبونەوە!) گرێدا، ماسكی لە روی زۆر كەس هەڵماڵی، نوێبونەوەش بۆ خۆی بوە ماسكێك بۆ پەردەپۆش كردنی ئەو یاریە ناشرینەی كە بەرامبەر بە هەزاران كادر و بەرپرسی یەكێتی كرا ..

لەناو یەكێتیدا، هەبوون سەركردە كۆنەكانیان بە رابەرە گەورەكانی دنیای سیاسەت دەشوبهاند. 
هەبون، هەر رۆژە و لەبەر قاپی بەرپرسێكی كۆن كەوتبون، بەڵام لەگەڵ نوێبونەوەكەیان، ئەمانیش وەك روباری نیل سەرەو ژور هەڵگەران و سەركردە كۆنەكانیان بە پرۆ پارتی و سیاسەتی رابردویان بە شكستخوارد و وێنا دەكرد.

"لویسی چوارەم كە منداڵ بوو مامۆستاكەی وانەی كیمیای بۆ شی دەكردەوە دەكردەوەو، دەیوت: ئۆكسجین و هایدرۆجین شانازی دەكەن لە حزوری جەنابتان یەك بگرن و ئاو پێكبهێنن"!
كاسەلێسەكان، ئەو كات، ئەمە كاریان بو. ئەوان روی رەشی مامۆستاكەی لیوسیان سپی كردبۆوە، فەیسبوكیان قان دا بو بە وێنەكانیان، كۆرو كۆبونەوەی بەرپرسێك لە كوێ بوایە، لەبەر ئەمانە بەر كەسە دڵسۆزەكانیش نەدەكەوت.
بەڵام خۆشبەختانە چەرخی گەردون هەر زوو روی راستی ئەمانەیان بۆ هەڵماڵین.

دوای نوێ بونەوە!
یەكێتی لە دوای چوارەمین كۆنگرەوە گیرۆدەی چەندین كێشە بۆوە، بەشێك لە كێشەكان نوێ نەبون و هی پێش كۆنگرە و تەنانەت قۆناغێكی زوتر بون كە چارەسەر نەكرابون، بەڵام ئەوەی گرفتە، كێشەكانی دوای كۆنگرە كەس باسی نەدەكرد یان نەدەویسترا باس بكرێت، هیچ كەس لە خوارەوە بۆ سەری یەكێتی وا خۆی دەرنەدەخست كە لە كێشەدان، تا گەیشتە ئەم قۆناغەی ئێستا یەكێتی بە سەخترین بارودۆخدا تێدەپەرێت.
كادرانی یەكێتی، ئەوانەی دڵسۆزن بۆ حزب، دۆش داماون، ئەوانەشی دەمیان لە كاسەی ماستاودایە، بەردەوامن لە بوهتان و چەواشەكاری رایگشتی خەڵكیش.
هەبون و هەن، كە هیچ ئەرزشێكیان بۆ كارو كردەوەكانی خۆشیان نیە، شەرم نایانگرێت، هەر زوو لە پەنای ئەم بەرپرس و ئەو بەرپرس خۆیان حەشاردا، ئامانجیان تەنها چنگ گیركردن بۆ بەدەستهێنانی لە پلەو پۆست و پارەیەكی زیاتر.
سۆشیال میدیاكانیان قان دابوو بە وێنەی رەنگاو رەنگی بەرپرسەكانیان، لای ئەوان یەكێك خەمخۆرو یەكێك فریادرەس بو، رابردیان بیركردو تەبەنی داهاتویەكی نادیاریان دەكرد.
ئەم هەلپەرستانە، كە دنیایان لە خەڵك كردبوە فیردەوس ی بەرین، خەیاڵ پڵاوانە كەوتبونە دوای داهاتویەكی نادیار، داهاتویەك كە پر لە هەڵپە و ملشكاندن بۆ چونە پێشەوە لەپێناو بەدەستهێنانی كەمێك داهاتی بردراوی كادیرە ماندوەكانی یەكێتی.

٨ ی تەمموز!
روداوەكان خێراتر لە پێشبینییەكان رویاندا، كاتێك كە باس لە ناكۆكیەكانی یەكێتی دەكرا، باس لە لایەنە خامۆشەكانی چوارەمین كۆنگرە دەكرا، كاسەلێسەكان و ئەوانەی بەرژەوەندییان لە ئەم بۆشاییەی یەكێتی وەردەگرت، سەدەها تۆمەت و قسەی بێ بنەمایان دەهۆنەوەو تۆمەتیان دەخستە پاڵ خەمخۆرەكانی یەكێتی.
زوو هۆشداری درا كە یەكێتی بەم ستراكچەر و سەركردایەتی و ئاراستەكردنە بەرەو ئاقارێكی خراپ هەنگاو دەنێت، بەڵام گوی َنەگیرا.
زۆر شاباشی نوێبونەوەكە كرا، بەڵام ساڵێك و چەند مانگێك بەسەر چوارەم كۆنگرە تێ پەری، بەڵام تا ٨ ی تەمموز هیچ گۆرانكاری و هیچ ئومێد و نوێبونەوەیەكمان نەبینی.

روداوەكانی هەشتی تەمموز دەكرێـ وەرچەرخان بێت لە مێژووی یەكێتیدا، بەڵام ناتوانین دیاری بكەین ئایا وەرچەرخان دەبێت بەرەو گەشەكردن و بوژانەوە یان بەرەو شكست و هەڵدێر؟! چونكە هەنگاوەكانی داهاتوو سروشتی ئەو وەرچەرخانە دیاری دەكات.
بەڵام ئەوەی حەتمی یە و ئاشكرایە ئەو بە ناو كادیرانەی نەوەی نوێبونەوەكەی چوارەمین كۆنگرە و بەری كودەتای ناو مەكتەبەكانی یەكێتی، بە جۆرێك حەساوە بون، كە خۆشیان پێشبینی رودانی روداوێكی لەم جۆرەیان نەدەكرد.

ئەو هەلپەرستانە ئێستا كە دۆخەكە بەرەو ئاقارێكی تر رۆیشتوە، لە ماستاو و هەلپەرستی خۆیان نەكەوتون و ئێستا لەبری فریادڕەسی پێشوو و قائیدی هەر چوار پارچەكە، رویان كردۆتە سەركردەی نوێی یەكێتی و بەبێ شەرم دەیانەوێ لەم گۆرانكاریەش دا ئاشی بەرژەوەندیەكانیان بگەڕێ.
بۆیە پێویستە كاربەدەستانی یەكێتی هۆشیاربن بەرامبەر بەو كادر و بەناو سەركردایەتی یە هەلپەرست و بازرگانانەی كە جگە لە خۆیان بیر لە هیچی دیكە ناكەنەوە.
گرنگە ئەوانەی لەدوای 8 ی تەمموز بریار بەدەست دەبن لەناو یەكێتی، دور لە دروشمسازی و پاڵەوانسازی، چاكسازی راستەقینە لەناو یەكێتی و دەرەوەی یەكێتی و كایەی حوكمڕانی دەست پێ بكەن، گشت ئەو بنەمایانە بخەنەوە كار كە لەمێژە لەناو یەكێتی لەسایەی پەرچەمی بەرژەوەندی و تەكەتولدا سڕكراون كە گرنگترینیان پاداشت و سزایە، دانانی كەسانی شیاوە لە شوێنی شیاو، هەم لەناو حزب و هەم لەناو حكومەت.

مێژوو سەلماندویەتی، كەسانی هەلپەرست و بەرژەوەندخواز ناتوانن نە لە حزب و نە لە حكومەتدا خزمەت بە كەس بكەن، بۆیە گرنگە لەپاڵ رێكخستنەوەی چۆنێتی ڕێبەرایەتی كردنی یەكێتی، گشت ئۆرگان و مەكتەبەكانی یەكێتیش ڕێكبخرێنەوە، كەسانی هەلپەرست بخرێنە پێگەی راستەقینەی خۆیان و لە شوێنی ئەوان كەسانی لێوەشاوە دابنرێن.
چونكە هەنگاوەكانی لەمەودوا دەری دەخات ئایا 8 ی تەمموز كردەیەك بوو بۆ خزمەتی خەڵك و یەكێتی، یان كردەیەك بوو تا یەكێتی و خەڵك بخرێنە خزمەتی بەرنامەی دیكە.
ئەو هەنگاوانە دیاری دەكات، یەكێتی دیلكراوی دەستەواژەی نوێبونەوە، یان یەكێتی دوای دوای روداوەكانی 8 ی تەمموز، كامیان دەكرێت ببێتە حزبێك كە خەمی خەڵك و مێژوەكەی بخوات.
ئەو هەنگاوانە دیاری دەكات كامە یەكێتی كۆن و كامەیان یەكێتی نوێ یە!
بۆیە سەیر دەكەین و چاوەروانین!