ژنی كورد لەگەمەی ڕێكخراوەكانی ژناندا

2 مانگ پێش ئێستا

لانە عەزیز حەمە
ڕێكخراوەكانی ژنان تەنیا پردی پەڕینەوەبوون بۆ هەموو ئەو كارە نائینسانیانەی بەرانبەر بە ژن دەكرێت.ئەوان داوای ئازادی بۆ ژن دەكەن بەڵام ناتوانن بیانپارێزن لەجەلادەكانی كۆمەڵگە.

گەر بەمێژوی گەلاندا بچینەوەو ئاوڕێك لەڕابوردوو بدەینەوە جەنجاڵترین و سەفسەتەترینی بابەت كە مشتومڕی لەسەركراوە و تا ئەمڕۆكەش بەردەوامی هەیە مافی ژنانە. ژن لەمێژوودا دووەم كاراكتەری وەرچەرخانی ڕووداوو پێشهاتەكانی كۆمەڵگەی مرۆیی بووە هەر ئەمەش وای كردووە بابەتی فێمێنستی ببێتە بابەتێكی هەستیار و جێ قسەو باس لە ناوەندە جیهانیەكاندا.

تاڕادەیەكی باش ژنان لەكۆمەڵكە پێشكەوتوەكاندا ماف و ئیمتیازاتیان بەدەست هێناوە و گەشتونەتە جۆرێك لە ئاستی یەكسانی، بەو پێیەی دەبنە سەرۆك و ئەندام پەرلەمان و بەڕێوەبەر یان خاوەن كۆمپانیا و دامەزراوە و ئابوری سەربەخۆی خۆیان، بەڵام گەر چاوێك بە ڕەوشی ژنی كورددا بخشێنین دەبینین كە تا ئێستاش بابەتی زەعیفەیی و خەتەنە كردن و پلەدوویی، برەو و مەودای خۆی هەیە هەرچەند كە چەندین ڕێكخراوو ناوەند هەیە بۆ داكۆكی كردن لەمافی ژنان بەڵام دیسان ئەمانە ڕێژەیەكی كەمە و چونكە پاشكۆی ڕێكخراوی حزبیشن نەیانتوانیوە وەكو پێویست داكۆكی لەمافی ژنی كورد بكەن و ڕایانكێشنە ناوەندە زانستی و سیاسیەكان، هەندێ هەوڵدراوە لە نێو دەسەڵاتی كوردیدا و بەیاساش كراوە بەڵام ئەوەندە بۆماف و ئازادی ژن و ئازادی پۆشین و ئازادی بەشداریكردن لەپرۆسە سیاسیەكاندا بەس نیە .
بەڕای من پێویستە پێداچونەوەی بنچینەیی بەهەموو ئەو كاروو چالاكی و پرۆسە فێمینیستیانەدا بكرێتەوە و سەرلەنوێ سیاقێكی بناغە پتەو بە ئەركومافی ژنی كوردا بچێتەوە.
پرسیارەكە ئەوەیە:
بۆچی تا ئێستاش لەكۆمەڵگەی كوردیدا ژن دەكوژرێت؟
بۆچی تا ئێستاش لەبەشێكی ناوچەكانی كوردستاندا خەتەنەی مێیینە هەر برەوی هەیە؟
دیاردەی فرەژنی تادێ زیاتر دەبێ؟
ئێمە تەنیا ناتوانین ئەمانە لە ئەستۆی نێرینە كورد دابنێین بەشێك لەو مەرگەساتی و و دیاردە دزێوانەی ژن كوشتن و خەتەنەكردن و فرەژنی دەگەڕێتەوە بۆ بێتوانایی و نا ئاگایی ژن خۆی، جگە لەوەی كەئاین بۆ جەخت كردنەوە لەم بابەتانە و مانەوەی ئاسەواریان ڕۆڵێكی بەرچاوی هەیە و كارگێڕی سەرەكی دابو نەریتی كوردی پێك دەهێنێت.

ژن هەمیشە قوربانی بوە لە كۆمەڵگەی كوردیدا، بۆیە تا ئێستا لەبەرانبەر ئەركەكانیدا نەیتوانیوە بەشێكی كەمی مافەكانی بەدەست بێنێ. وابەستە بەو كلتورە ئایینیەوە و فشاری تۆقاندنی لایەنە ئیسلامیەكان لەسەر ژنان و بەحیجاب كردنیان و هێشتنەوەیان لەماڵەوەو دابڕینیان لەكاری سەربەخۆی خۆیان و بەناوی پاراستنی شەرەف وناموسەوە گەورەترین ترااژیدیای لەبەرانبەر مافی ژندا خولقاندووە.
شكاندنی ئەو تەوق و كۆتوبەندە ئایینیە لەسەر هزرو فكری ژنی كورد و كارێكی ئاسان نیە بۆیە ژنی كورد دیسانەوە دەبێت ڕیجستەری بكاتەوەو سەرلەنوێ ڕێگای ئازدی بگرێتەبەر.